Nzumbululo 22:1-21
22 A ntsumbedza mulambo wa maḓi a vhutshilo, une wa vhonadza sa ngilasi, u tshi elela u tshi bva kha khuluṋoni ya Mudzimu na ya Ngwana
2 u tshi fhira nga vhukati ha nḓila khulwane ya muḓi. Nahone matungo oṱhe a mulambo ho vha hu na miri ya vhutshilo ine ya aṋwa mitshelo lwa fumi-mbili (12) ṅwaha muṅwe na muṅwe. Maṱari a yeneyo miri o vha e a u fhodza dzitshaka.
3 A hu tsha ḓo vha na samba na ḽithihi. Fhedzi khuluṋoni ya Mudzimu na ya Ngwana dzi ḓo vha henefho muḓini, huno vhalanda vhawe vha ḓo mu itela tshumelo khethwa;
4 nahone vha ḓo vhona tshifhaṱuwo tshawe, dzina ḽawe ḽi ḓo vha kha phanḓa dzavho.
5 Zwiṅwe hafhu, vhusiku a vhu tsha ḓo vha hone, a vha nga ṱoḓi tshedza tsha luvhone, kana tshedza tsha ḓuvha, ngauri Yehova Mudzimu u ḓo vha vhonetshela, vha ḓo vhusa sa mahosi lini na lini.
6 A amba na nṋe a ri: “Haya maipfi ndi a fulufhedzeaho na a ngoho; Yehova Mudzimu we a hevhedza vhaporofita o rumela muruṅwa wawe uri a sumbedze vhalanda vhawe zwithu zwine zwa ḓo vha hone nga u ṱavhanya.
7 Ndi khou ḓa nga u ṱavhanya. Hu takala naho e nnyi ane a tevhedza maipfi a vhuporofita a hoyu mupombo.”
8 Ndi nṋe Yohane we a pfa na u vhona zwenezwi zwithu. Musi ndi tshi zwi pfa na u zwi vhona, nda gwadama uri ndi rabele milenzheni ya muruṅwa we a ntsumbedza zwenezwi zwithu.
9 Fhedzi a amba na nṋe a ri: “U songo ita nga u ralo! Na nṋe ndi mulanda sa iwe na vhahau vha re vhaporofita na vhane vha tevhedza maipfi a hoyu mupombo. Rabela Mudzimu.”
10 A dovha a amba na nṋe a ri: “Haya maipfi a vhuporofita a hoyu mupombo u songo a ita tshiphiri, ngauri tshifhinga tsho vhewaho tshi tsini.
11 A songo lugaho kha bvele phanḓa a tshi ita zwi songo lugaho; ane a vha na vhuyaḓa kha bvele phanḓa na vhuyaḓa hawe; fhedzi o lugaho kha bvele phanḓa a tshi ita zwo lugaho, na a re mukhethwa kha bvele phanḓa e mukhethwa.
12 “‘Ndi khou ḓa nga u ṱavhanya. Ndi ḓo ṋea malamba muthu muṅwe na muṅwe u ya nga mishumo yawe.
13 Ndi nṋe Alfa na Omega, wa u thoma na wa u fhedzisela, mathomo na magumo.
14 Vha a takala vhane vha kuvha zwiambaro zwavho, uri vha vhe na ndugelo ya u ya mirini ya vhutshilo na uri vha dzhene muḓini nga khoro dzawo.
15 Nnḓa ha muḓi hu wanala dzimmbwa* na vhadzia-vhungome na dziphombwe na vhavhulahi na vhane vha gwadamela midzimu ya zwifanyiso na vhane vha funa mazwifhi na u bvela phanḓa vha tshi zwifha.’
16 “‘Nṋe Yesu ndo ruma muruṅwa wanga uri a ni ṱanziele nga ha zwenezwi zwithu uri zwivhidzo zwi vhuyelwe. Ndi nṋe mudzi na ṅwana wa Davida, ṋaledzi i penyaho ya nga matsheloni.’”*
17 Muya na muselwa zwi bvela phanḓa zwi tshi ri: “Iḓa!” Na a zwi pfaho nga a ri: “Iḓa!” Na a re na ḓora nga a ḓe; ane a funa nga a dzhie maḓi a vhutshilo nga fhedzi.
18 “Ndi khou ṱanziela kha ane a pfa maipfi a vhuporofita a hoyu mupombo ndi ri: Arali muthu a tshi engedza kha zwenezwi zwithu, Mudzimu u ḓo mu engedzela ṱhamu dzo ṅwalwaho kha hoyu mupombo;
19 arali muthu a fhungudza maipfi a vhuporofita a hoyu mupombo, Mudzimu u ḓo mu dzhiela mukovhe wawe kha zwe zwa ṅwalwa kha hoyu mupombo—ha nga mu tendeli a tshi ḽa mitshelo i bvaho kha miri ya vhutshilo nahone ha nga mu tendeli a tshi dzhena muḓini mukhethwa.
20 “Ane a ṱanziela nga ha zwenezwi zwithu u ri, ‘Ndi khou ḓa nga u ṱavhanya.’”
“Amen! Iḓa, Murena Yesu.”
21 Ngavhe vhuthu vhuhulu ha Murena Yesu Kristo vhu tshi vha na vhakhethwa.
Ṱhaluso dzi re magumoni a siaṱari
^ Ndi vhane vha ita zwithu zwi nengisaho phanḓa ha Mudzimu.
^ Masase.
