Nzumbululo 3:1-22
3 “Ṅwalela muruṅwa wa tshivhidzo tsha Saradesi uri: Khezwi zwine zwa ambiwa nga ane a vha na mimuya ya Mudzimu ya sumbe na ṋaledzi dza sumbe, ‘ndi a ḓivha mishumo yau, u ḓivhelwa uri u a tshila, fhedzi wo fa.
2 Fhaṱuwa, nahone u khwaṱhise zwithu zwo salaho zwe zwa vha zwi tshi khou ṱoḓa u fa, ngauri a wo ngo ita mishumo yau nga vhuḓalo phanḓa ha Mudzimu wanga.
3 Nga zwenezwo, bvela phanḓa u tshi humbula zwe wa zwi ṱanganedza na zwe wa zwi pfa, u bvele phanḓa u tshi zwi tevhedza, u rembuluwe. Vhukuma, arali wa sa vuwa, ndi ḓo ḓa sa mbava nahone a u nga ḓo ḓivha tshifhinga tshine nda ḓo u ḓela ngatsho.
4 “‘Naho zwo ralo, u na vha si gathi ngeo Saradesi vhe vha si tshikafhadze zwiambaro zwavho zwa nga nnḓa, ndi vhone vhane vha ḓo tshimbila na nṋe vho ambara zwiambaro zwitshena, ngauri vha a fanelea.
5 Ane a ḓo kunda u ḓo ambadzwa zwiambaro zwitshena zwa nga nnḓa; a thi nga thuthi dzina ḽawe kha bugu ya vhutshilo, ndi ḓo amba dzina ḽawe phanḓa ha Khotsi anga na phanḓa ha vharuṅwa vhawe.
6 Ane a vha na nḓevhe nga a pfe zwine muya wa vhudza zwivhidzo.’
7 “Ṅwalela muruṅwa wa tshivhidzo tsha Filadelefia uri: Hezwi ndi zwithu zwine zwa ambiwa nga ane a vha mukhethwa, ane a vha wa ngoho, ane a vha na khoṋo ya Davida, ane a vula hu si vhe na ane a vala, ane a vala hu si vhe na ane a vula,
8 ‘ndi a ḓivha mishumo yau—ndo u vulela muṋango, une hu si vhe na ane a nga u vala. Ndi a zwi ḓivha zwa uri a u na nungo, wo ita zwe nda amba nahone wo dzula u tshi fulufhedzea kha dzina ḽanga.
9 Ndi ḓo ita uri vhane vha bva kha sinagogo ya Sathane vhane vha ri vha Vhayuda ngeno vhe si Vhayuda, fhedzi vha tshi khou zwifha—vha ḓe vha gwadame phanḓa ha milenzhe yau nahone vha ḓivhe uri ndi a u funa.
10 Ngauri wo tevhedza ipfi ḽi ambaho nga ha u konḓelela hanga, ndi ḓo dovha nda u tsireledza nga tshifhinga tsha mulingo, tshine tsha ḓo ḓela ḽifhasi ḽoṱhe, uri hu lingwe vho dzulaho kha ḽifhasi.
11 Ndi khou ḓa nga u ṱavhanya. Dzula wo farelela zwine wa vha nazwo, uri hu si vhe na ane a u dzhiela khare yau.
12 “‘Ane a kunda ndi ḓo mu ita phuphu thembeleni ya Mudzimu wanga, huno ha nga ḓo bva khayo na luthihi, ndi ḓo mu ṅwala dzina ḽa Mudzimu wanga na dzina ḽa muḓi wa Mudzimu wanga, Yerusalema muswa une wa tsa u tshi bva ṱaḓulu ha Mudzimu wanga, nda ṅwala na dzina ḽanga ḽiswa.
13 Ane a vha na nḓevhe nga a pfe zwine muya wa vhudza zwivhidzo.’
14 “Ṅwalela muruṅwa wa tshivhidzo tsha Laodikea uri: Hezwi ndi zwithu zwine zwa ambiwa nga Amen, ṱhanzi i fulufhedzeaho na ya ngoho, tsiko ya u thoma ya Mudzimu,
15 ‘ndi a ḓivha mishumo yau, uri a u rotholi kana u fhisa. Ndi tama arali wo vha u tshi rothola kana u tshi fhisa.
16 Ngauri u a dudela, a u fhisi kana u rothola, ndi ḓo u pfela kule wa bva mulomoni wanga.
17 Ngauri u ri: “Ndo pfuma, ndo kuvhanganya lupfumo, a hu na tshine nda tshi shaya na luthihi,” fhedzi a wo ngo takala, u pfisa vhuṱungu, u mushai, wo pofula nahone u fhedzi,
18 ndi u eletshedza uri u renge kha nṋe musuku wo kunakiswaho nga mulilo uri u kone u pfuma, na zwiambaro zwitshena zwa nga nnḓa uri u kone u ambara uri u si farwe nga ṱhoni ngauri a wo ngo ambara, u renge na mushonga wa u ḓodza maṱoni uri u kone u vhona.
19 “‘Vhoṱhe vhane nda vha funa ndi a vha kaidza na u vha laya. Nga zwenezwo, fhiseani nahone ni rembuluwe.
20 Ndo ima muṋangoni ndi khou khokhonya. Arali muthu a pfa ipfi ḽanga nahone a vula muṋango, ndi ḓo dzhena nḓuni yawe nda ḽa tshilalelo nae na ene a ḽa na nṋe.
21 Ane a kunda ndi ḓo mu tendela uri a dzule na nṋe kha khuluṋoni yanga, samusi na nṋe ndo kunda nda dzula na Khotsi anga kha khuluṋoni yawe.
22 Ane a vha na nḓevhe nga a pfe zwine muya wa vhudza zwivhidzo.’”
