Nzumbululo 4:1-11
4 Nga murahu ha zwenezwi zwithu nda lavhelesa nahone nda vhona muṋango wa ṱaḓulu wo vulea, huno ipfi ḽe nda thoma u ḽi pfa ḽo vha ḽi tshi nga ḽa phalaphala, ḽi tshi khou amba na nṋe, ḽi tshi ri: “Gonya ngeno ndi u sumbedze zwithu zwine zwa fanela u itea.”
2 Nga u ṱavhanya nga murahu ha zwenezwi, muya wa Mudzimu wa ḓa kha nṋe: nda vhona khuluṋoni i fhethu hayo ṱaḓulu, hu na we a vha o dzula khayo.
3 We a vha o dzula khayo o vha a tshi nga tombo ḽi ṱoḓaho u fana na daimane na tombo ḽitswuku ḽa thengokhulu, u mona na khuluṋoni ho vha hu na musengavhadzimu une wa fana na emeralidi.
4 U mona na yeneyo khuluṋoni ho vha hu na khuluṋoni dza fumbili-iṋa (24), kha dzenedzo khuluṋoni nda vhona ho dzula vhahulwane vha fumbili-iṋa vho ambara zwiambaro zwitshena zwa nga nnḓa, ṱhohoni dzavho vho vha vho ambara khare dza musuku.
5 Henefho kha khuluṋoni ho vha hu tshi bva lupenyo na maipfi na mibvumo; ho vha hu na mbone dza sumbe dza mulilo dzi tshi khou duga phanḓa ha khuluṋoni, nahone zwenezwi zwi imela mimuya ya sumbe ya Mudzimu.
6 Phanḓa ha khuluṋoni ho vha hu na tshiṅwe tshithu tshi ngaho lwanzhe lu penyaho sa ngilasi, tshi ngaho munyaka.
Vhukati ha khuluṋoni na u mona nayo ho vha hu na zwivhumbwa zwiṋa zwi tshilaho zwo ḓalaho maṱo nga phanḓa na nga murahu.
7 Tshivhumbwa tshi tshilaho tsha u thoma tsho vha tshi tshi nga ndau, tshivhumbwa tshi tshilaho tsha vhuvhili tsho vha tshi tshi nga mbohwana, tshivhumbwa tshi tshilaho tsha vhuraru tsho vha tshi na tshifhaṱuwo tshi ngaho tsha muthu, nahone tshivhumbwa tshi tshilaho tsha vhuṋa tsho vha tshi tshi nga goni ḽi fhufhaho.
8 Tshiṅwe na tshiṅwe tsha zwiḽa zwivhumbwa zwiṋa zwi tshilaho tsho vha tshi na phapha dza rathi; dzo vha dzi na maṱo nga nnḓa na nga ngomu. Tshifhinga tshoṱhe, vhusiku na masiari, zwi tshi ri: “Mukhethwa, mukhethwa, mukhethwa ndi Yehova Mudzimu, Ramaanḓaoṱhe, we a vha e hone, ane a vha hone na ane a khou ḓa.”
9 Tshifhinga tshoṱhe musi zwivhumbwa zwi tshilaho zwi tshi ṋea vhugala na u hulisa na u livhuha O dzulaho kha khuluṋoni, Ane a tshila lini na lini,
10 vhahulwane vha fumbili-iṋa vho vha vha tshi gwadama phanḓa ha O dzulaho kha khuluṋoni na u rabela A tshilaho lini na lini, vha bvula khare dzavho vha dzi vhea phanḓa ha khuluṋoni, vha ri:
11 “Iwe Yehova Mudzimu, ndi iwe wo fanelwaho nga vhugala na u huliswa na maanḓa, ngauri wo sika zwithu zwoṱhe, huno zwo vha hone na u sikwa nge wa zwi funa.”
