Nzumbululo 5:1-14
5 Nda vhona tshanḓani tsha u ḽa tsha O dzulaho kha khuluṋoni hu na mupombo wo ṅwalwaho thungo dzoṱhe, wo pfuṋelwa mapfundo a sumbe.
2 Nda vhona muruṅwa a re na maanḓa a tshi khou huwelela nga ipfi ḽihulu a tshi ri: “Ndi nnyi ane a fanelea u vula mupombo na u pfuṋulula mapfundo awo?”
3 Huno ho vha hu si na muthu ṱaḓulu kana kha ḽifhasi kana nga fhasi ha ḽifhasi we a vha a tshi nga kona u vula mupombo kana u sedza zwi re khawo.
4 Nda lila zwihulu ngauri a ho ngo wanala we a vha a tshi fanelea u vula mupombo kana u sedza zwi re khawo.
5 Fhedzi muṅwe wa vhahulwane a amba na nṋe a ri: “Litsha u lila. Vhona! Ndau ine ya vha ya lushaka lwa Yuda, mudzi wa Davida, yo kunda uri i kone u vula mupombo na mapfundo awo a sumbe.”
6 Huno nda vhona ngwana yo ima vhukati ha khuluṋoni na vhukati ha zwivhumbwa zwiṋa zwi tshilaho na vhukati ha vhahulwane i tshi nga yo ṱhavhiwa, i na ṋanga dza sumbe na maṱo a sumbe, nahone maṱo eneo a imela mimuya ya Mudzimu ya sumbe yo rumiwaho ḽifhasini ḽoṱhe.
7 Ngwana ya ya nahone ya dzhia mupombo tshanḓani tsha u ḽa tsha O dzulaho kha khuluṋoni.
8 Musi yo no dzhia mupombo, zwivhumbwa zwiṋa zwi tshilaho na vhahulwane vha fumbili-iṋa (24) vha gwadama phanḓa ha Ngwana, muṅwe na muṅwe wavho o vha e na tshihwana na mudzio wa musuku wo ḓalaho nga zwioro. Zwioro zwi imela thabelo dza vhakhethwa.
9 Vha imba luimbo luswa, vha ri: “Wo fanelwa nga u dzhia mupombo na u pfuṋulula mapfundo awo, ngauri wo ṱhavhiwa nahone nga malofha au wo rengululela Mudzimu vhathu vha bvaho kha tshaka dzoṱhe na ndimi dzoṱhe,
10 wa vha ita muvhuso na vhotshifhe vha Mudzimu washu, na vhane vha ḓo vhusa sa mahosi kha ḽifhasi.”
11 Nda lavhelesa, nda pfa maipfi a vharuṅwa vhanzhi vho tangaho khuluṋoni na zwivhumbwa zwi tshilaho na vhahulwane, vho vha vhe zwigidi zwa fumi zwi tshi andiswa nga zwigidi zwa fumi, na vha zwigidi na zwigidi,
12 vha tshi khou huwelela nga ipfi ḽihulu vha tshi ri: “Ngwana ye ya ṱhavhiwa yo fanelwa nga u ṋewa maanḓa na lupfumo na vhuṱali na nungo na u huliswa na vhugala na phaṱhutshedzo.”
13 Nda pfa tshivhumbwa tshiṅwe na tshiṅwe tshine tsha vha ṱaḓulu na kha ḽifhasi na fhasi ha ḽifhasi na lwanzheni, na zwithu zwoṱhe zwi re khalwo zwi tshi ri: “Thendo na khuliso na vhugala na maanḓa ndi zwa O dzulaho kha khuluṋoni na zwa Ngwana, lini na lini.”
14 Huno zwivhumbwa zwiṋa zwi tshilaho zwa ri: “Amen!” na vhahulwane vha gwadama vha rabela.
