Nzumbululo 6:1-17
6 Nda vhona Ngwana i tshi pfuṋulula ḽiṅwe ḽa mapfundo a sumbe, nda pfa tshiṅwe tsha zwivhumbwa zwiṋa zwi tshilaho tshi tshi amba nga ipfi ḽi ngaho mubvumo tshi tshi ri: “Iḓa!”
2 Nda lavhelesa, nda vhona bere tshena; we a vha o i ṋamela o vha o fara vhura; a ṋewa khare, a bvela phanḓa a tshi kunda na u khunyeledza gundo ḽawe.
3 Musi i tshi pfuṋulula pfundo ḽa vhuvhili, nda pfa tshivhumbwa tsha vhuvhili tshi tshilaho tshi tshi ri: “Iḓa!”
4 Ha bvelela bere tswuku; we a vha o i ṋamela a tendelwa uri a dzhie mulalo kha ḽifhasi uri vha vhulahane nga tshavho; a ṋewa banga ḽihulu.
5 Musi i tshi pfuṋulula pfundo ḽa vhuraru, nda pfa tshivhumbwa tsha vhuraru tshi tshilaho tshi tshi ri: “Iḓa!” Nda lavhelesa, nda vhona bere ntswu; we a vha o i ṋamela o vha o fara tshikalo tshanḓani tshawe.
6 Nda pfa zwine zwa nga ipfi vhukati ha zwivhumbwa zwiṋa zwi tshilaho ḽi tshi ri: “Khilogiramu ya goroi ndi dinari,* khilogiramu tharu dza baḽi ndi dinari; u songo tshinya mapfura a muṱwari na waini.”
7 Musi i tshi pfuṋulula pfundo ḽa vhuṋa, nda pfa tshivhumbwa tsha vhuṋa tshi tshilaho tshi tshi ri: “Iḓa!”
8 Nda lavhelesa, nda vhona bere yo tshenuluwaho; we a vha o i ṋamela o vha a tshi pfi Lufu. Vhudzulavhafu* ho vha vhu tshi khou mu tevhela vhu tsini-tsini nae. Zwo vha zwo ṋewa maanḓa a u vhusa tshipiḓa tsha vhuṋa tsha ḽifhasi, na u vhulaha nga banga ḽilapfu na nga u ṱahela ha zwiḽiwa na nga dwadze na nga zwivhanda zwa ḽifhasi.
9 Musi i tshi pfuṋulula pfundo ḽa vhuṱanu, nda vhona nga fhasi ha aletare hu na malofha a vho vhulahwaho nga nṱhani ha ipfi ḽa Mudzimu na nga nṱhani ha vhuṱanzi he vha vhu ṋea.
10 Huno vha huwelela nga ipfi ḽihulu vha ri: “Murena Muvhusahoṱhe mukhethwa na wa ngoho, u ḓo haṱula lini na u lifhedza malofha ashu kha vho dzulaho kha ḽifhasi?”
11 Nahone muṅwe na muṅwe wavho a ṋewa tshiambaro tshitshena; vha vhudzwa uri vha awele lwa tshifhinganyana, u swikela hu tshi ḓadzea tshivhalo tsha vhalanda ngavho na vhahavho vhe vha vha vha tshi khou ṱoḓou vhulahwa u fana navho.
12 Nda vhona i tshi pfuṋulula pfundo ḽa vhurathi, ha vha na mudzinginyo; ḓuvha ḽa swifhala sa dzadza ḽa vhukuse, ṅwedzi woṱhe wa nga malofha,
13 nahone ṋaledzi dza ṱaḓulu dza wela kha ḽifhasi, u fana na musi muhuyu wo dzinginyiswa nga muya muhulu wa wisa mahuyu a magaga.
14 Ḽiṱaḓulu ḽa ṱuwa sa mupombo u tshi pombiwa, thavha iṅwe na iṅwe na tshiṱangadzime tshiṅwe na tshiṅwe zwa sudzuluswa vhudzuloni hazwo.
15 Mahosi a ḽifhasi na vhaḓivhalea na vhalangammbi, vhapfumi na vha re na nungo na mulanda muṅwe na muṅwe na muthu muṅwe na muṅwe o vhofholowaho vha dzumbama mabakoni na nngwani dza dzithavha.
16 Vha amba na dzithavha na dzinngwa vha ri: “Ri weleni ni ri dzumbamise tshifhaṱuwo tsha O dzulaho kha khuluṋoni na kha mbiti dza Ngwana,
17 ngauri ḓuvha ḽihulu ḽa mbiti dzavho ḽo swika, ndi nnyi ane a ḓo kona u ima?”
Ṱhaluso dzi re magumoni a siaṱari
^ Ndi tshelede ya Vharoma ya tsimbi.
^ Nga Lugerika ndi haiʹdes. Sedzani Ṱhumetshedzo 7.
