Nzumbululo 7:1-17
7 Nga murahu ha zwenezwo, nda vhona vharuṅwa vhaṋa vho ima khuḓani nṋa dza ḽifhasi, vho fara mimuya miṋa ya ḽifhasi, uri hu si vhe na muya une wa vhudzula kha ḽifhasi kana lwanzheni kana u vhudzula muri naho u ufhio.
2 Nda vhona muṅwe muruṅwa a tshi khou gonya a tshi bva vhubvaḓuvha, e na luswayo lwa Mudzimu a tshilaho; nahone a vhidzelela vharuṅwa vhaṋa nga ipfi ḽihulu vhe vha vha vho tendelwa u tshinya ḽifhasi na lwanzhe,
3 a ri: “Ni songo tshinya ḽifhasi kana lwanzhe kana miri, u swikela ri tshi swaya vhalanda vha Mudzimu washu kha phanḓa dzavho.”
4 Nda pfa uri tshivhalo tsha vhe vha swaiwa ndi 144 000, vho swaiwaho vha bva kha tshaka dzoṱhe dza vharwa vha Isiraele:
5 Kha lushaka lwa Yuda ho swaiwa vha zwigidi zwa fumi-mbili (12 000);
kha lushaka lwa Rubeni ndi zwigidi zwa fumi-mbili;kha lushaka lwa Gada ndi zwigidi zwa fumi-mbili;
6 kha lushaka lwa Asere ndi zwigidi zwa fumi-mbili;kha lushaka lwa Nafutali ndi zwigidi zwa fumi-mbili;kha lushaka lwa Manase ndi zwigidi zwa fumi-mbili;
7 kha lushaka lwa Simeoni ndi zwigidi zwa fumi-mbili;kha lushaka lwa Levi ndi zwigidi zwa fumi-mbili;kha lushaka lwa Isashari ndi zwigidi zwa fumi-mbili;
8 kha lushaka lwa Sebuloni ndi zwigidi zwa fumi-mbili;kha lushaka lwa Yosefa ndi zwigidi zwa fumi-mbili;kha lushaka lwa Benyamini ho swaiwa vha zwigidi zwa fumi-mbili.
9 Nga murahu ha zwenezwo, nda lavhelesa, nda vhona gogo ḽihulu, ḽi sa koni u vhalwa nga muthu, ḽi bvaho kha tshaka dzoṱhe na ndimi dzoṱhe, ḽo ima phanḓa ha khuluṋoni na phanḓa ha Ngwana, ḽo ambara zwiambaro zwitshena; ḽo fara maṱari a mitshevho.
10 Ḽa vhidzelela nga ipfi ḽihulu, ḽa ri: “U tshidzwa hu bva ha Mudzimu washu, o dzulaho kha khuluṋoni, na kha Ngwana.”
11 Vharuṅwa vhoṱhe vho vha vho ima vho tanga khuluṋoni na vhahulwane na zwivhumbwa zwiṋa zwi tshilaho, vha gwadama phanḓa ha khuluṋoni, vha rabela Mudzimu,
12 vha ri: “Amen! Thendo na vhugala na vhuṱali na ndivhuho na khuliso na maanḓa na nungo nga zwi vhe zwa Mudzimu washu lini na lini. Amen.”
13 Muṅwe wa vhahulwane a amba na nṋe a ri: “Avha vho ambaraho zwiambaro zwitshena ndi vhonnyi, nahone vha bva ngafhi?”
14 Ngauralo, nda mbo ḓi mu fhindula nda ri: “Murena wanga, ndi iwe ane wa zwi ḓivha.” A ri kha nṋe: “Havha ndi vho bvaho maṱunguni mahulu, vho ṱanzwa zwiambaro zwavho vha zwi tshenisa nga malofha a Ngwana.
15 Ndi ngazwo vho ima phanḓa ha khuluṋoni ya Mudzimu; vha tshi khou mu itela tshumelo khethwa masiari na vhusiku thembeleni yawe; nahone O dzulaho kha khuluṋoni u ḓo atha dennde ḽa u vha tsireledza.
16 A vha tsha ḓo pfa nḓala na u farwa nga ḓora, a vha tsha ḓo fhiswa nga ḓuvha,
17 ngauri Ngwana, i re vhukati ha khuluṋoni, i ḓo vha lisa, ya vha isa zwisimani zwa maḓi a vhutshilo. Huno Mudzimu u ḓo phumula miṱodzi yoṱhe maṱoni avho.”
