Nzumbululo 8:1-13
8 Musi Ngwana i tshi pfuṋulula pfundo ḽa vhusumbe, ha fhumulwa ṱaḓulu lu ṱoḓaho u vha hafu ya awara.
2 Nda vhona vharuṅwa vha sumbe vhane vha ima phanḓa ha Mudzimu, huno vha ṋewa phalaphala dza sumbe.
3 Ha swika muṅwe muruṅwa a ima phanḓa ha aletare o fara mudzio wa musuku wa zwioro; a ṋewa zwioro zwinzhi uri a zwi ṋekedze kha aletare ya musuku ye ya vha i phanḓa ha khuluṋoni khathihi na thabelo dzoṱhe dza vhakhethwa.
4 Huno vhutsi ha zwioro ha gonya vhu tshi bva tshanḓani tsha muruṅwa khathihi na thabelo dza vhakhethwa phanḓa ha Mudzimu.
5 Fhedzi nga u ṱavhanya onoyo muruṅwa a dzhia mudzio wa zwioro, a u ḓadza nga muṅwe wa mulilo u bvaho kha aletare a u posa kha ḽifhasi. Ha vha na mibvumo na maipfi na dziphenyo na mudzinginyo.
6 Vharuṅwa vha sumbe vhe vha vha vhe na phalaphala dza sumbe vha ḓilugisela uri vha dzi lidze.
7 Wa u thoma a lidza phalaphala yawe. Ha vha na tshifhango na mulilo zwo ṱangana na malofha, zwa poswa kha ḽifhasi; ha swa tshipiḓa tshithihi kha zwiraru tsha ḽifhasi, ha swa tshipiḓa tshithihi kha zwiraru tsha miri, na zwimela zwoṱhe zwidala zwa swa.
8 Muruṅwa wa vhuvhili a lidza phalaphala yawe. Tshiṅwe tshithu tshine tsha nga thavha khulwane i dugaho mulilo tsha poswa lwanzheni. Tshipiḓa tshithihi kha zwiraru tsha lwanzhe tsha mbo ḓi vha malofha;
9 na tshipiḓa tshithihi kha zwiraru tsha zwivhumbwa zwa lwanzheni zwi tshilaho tsha fa, na tshipiḓa tshithihi tsha zwiraru tsha zwikepe tsha pwashea.
10 Muruṅwa wa vhuraru a lidza phalaphala yawe. Ha wa ṋaledzi khulu i dugaho sa luvhone i tshi bva ṱaḓulu, ya wela kha tshipiḓa tshithihi kha zwiraru tsha milambo na kha zwisima zwa maḓi.
11 Ṋaledzi yeneyo yo vha i tshi pfi Tshikalakati.* Tshipiḓa tshithihi kha zwiraru tsha maḓi tsha kalakata, vhathu vhanzhi vha fa nga eneo maḓi, ngauri o vha o itwa uri a kalakate.
12 Muruṅwa wa vhuṋa a lidza phalaphala yawe. Huno tshipiḓa tshithihi kha zwiraru tsha ḓuvha tsha rwiwa na tshipiḓa tshithihi kha zwiraru tsha ṅwedzi na tsha dziṋaledzi, u itela uri tshipiḓa tshithihi kha zwiraru zwazwo tsha masiari na tsha vhusiku zwi swifhale.
13 Nda vhona goni ḽi tshi khou fhufha makoleni ḽi tshi khou amba nga ipfi ḽihulu ḽi tshi ri: “Khombo, khombo, khombo kha vho dzulaho kha ḽifhasi nga nṱhani ha phalaphala dzine dza ḓo lidzwa nga vharuṅwa vhararu vhane vha ḓo lidza phalaphala dzavho hu si kale!”
Ṱhaluso dzi re magumoni a siaṱari
^ Ndi mufuda wa tshimela tshine tsha vha na maḓi a vhavhaho a re na mulimo.
