Nzumbululo 9:1-21
9 Muruṅwa wa vhuṱanu a lidza phalaphala yawe. Nda vhona ṋaledzi ye ya wela kha ḽifhasi i tshi bva ṱaḓulu, yeneyo ṋaledzi ya ṋewa khoṋo ya mugodi.
2 Ya vula mugodi, nahone vhutsi vhu bvaho mugodini ho vha vhu tshi nga vhutsi ha ṋanḓo khulu, ḓuvha na muya zwa swifhadzwa nga vhutsi vhu bvaho mugodini.
3 Ha bva nzie kha vhutsi honoho dza ḓa kha ḽifhasi; dza ṋewa maanḓa, eneo maanḓa o vha a tshi fana na e a vha o ṋewa phame dza ḽifhasi.
4 Dzo vha dzo vhudzwa uri dzi songo tshinya zwimela zwa ḽifhasi kana hatsi vhudala kana muri naho u ufhio, fhedzi dzi lume vhathu vha si na luswayo lwa Mudzimu kha phanḓa dzavho.
5 Huno dzenedzo nzie dzo vha dzi songo tendelwa uri dzi vha vhulahe, fhedzi dzo vha dzi tshi fanela u vha tambudza miṅwedzi miṱanu, vhuṱungu ha hone ho vha vhu tshi fana na ha musi muthu o luṅwa nga phame.
6 Misini yeneyo vhathu vha ḓo ṱoḓa nḓila ya uri vha fe, fhedzi vha nga si i wane, nahone vha ḓo tama u fa huno lufu lu nga si vha ḓele.
7 Tshivhumbeo tsha idzo nzie tsho vha tshi tshi fana na tsha bere dzo lugela u lwa; ṱhohoni dzadzo ho vha hu na zwithu zwine zwa nga khare dza musuku, khofheni hadzo ho vha hu tshi nga khofheni ha vhathu,
8 fhedzi dzo vha dzi na mavhudzi ane a nga a vhafumakadzi. Maṋo adzo a tshi nga a ndau;
9 dzo vha dzi na zwipilakhana zwine zwa nga tsimbi. Mibvumo ya phapha dzadzo yo vha i tshi nga mibvumo ya gariki dzi tshi khou kokodzwa nga bere dzine dza khou gada dzi tshi ya nndwani.
10 Dzo vha dzi na mitshila ine ya luma u fana na phame; mitshilani yadzo dzo vha dzi na maanḓa a u luma vhathu miṅwedzi miṱanu.
11 Dzi na khosi yadzo i dzi vhusaho, ine ya vha muruṅwa wa mugodini. Dzina ḽawe nga Luheberu ndi Abadoni,* fhedzi nga Lugerika ndi Apolioni.*
12 Khombo ya u thoma yo fhira. Huno dziṅwe khombo mbili dzi khou tevhela nga murahu ha zwenezwi.
13 Huno muruṅwa wa vhurathi a lidza phalaphala yawe. Nda pfa ḽiṅwe ipfi ḽi tshi bva kha ṋanga dza aletare ine ya vha phanḓa ha Mudzimu
14 ḽi tshi amba na muruṅwa wa vhurathi, we a vha e na phalaphala ḽa ri: “Vhofholola vharuṅwa vhaḽa vho vhofhiwaho mulamboni muhulu wa Furata.”
15 Vhenevho vharuṅwa vhaṋa, vhe vha vha vho lugiselelwa awara, ḓuvha, ṅwedzi na ṅwaha, uri vha vhulahe tshipiḓa tshithihi kha zwiraru tsha vhathu, vha vhofhololwa.
16 Ndo pfa uri tshivhalo tsha mmbi ya vhaṋameli vha dzibere tsho vha tshi zwigidi zwa fumbili zwi tshi andiswa nga zwigidi zwa fumi.*
17 Nḓila ye nda vhona ngayo bere kha bono, na vhe vha vha vho dzi ṋamela kheyi: vho vha vhe na zwipilakhana zwa muvhala mutswuku na wa lutombo na wa ṱaḓa; nahone ṱhoho dza bere dzo vha dzi tshi nga ṱhoho dza dzindau, milomoni yadzo ho vha hu tshi bva mulilo, vhutsi na tsevhela.
18 Tshipiḓa tshithihi kha zwiraru tsha vhathu tsha vhulahwa nga dzenedzo ṱhamu tharu, dzine dza vha mulilo, vhutsi na tsevhela zwi bvaho milomoni yadzo.
19 Maanḓa a dzenedzi bere a milomoni yadzo na mitshilani yadzo; mitshila yadzo i fana na ṋowa dzine dza luma nga ṱhoho dzadzo.
20 Fhedzi vhathu vho salaho vhe vha si vhulahwe nga dzenedzo ṱhamu, a vho ngo rembuluwa kha mishumo ya zwanḓa zwavho; a vho ngo litsha u rabela madimoni na midzimu ya zwifanyiso ya musuku, tsimbi-tseṱha na tsimbi-tswuku na tombo na thanda, zwine zwi si kone u vhona, u pfa kana u tshimbila.
21 A vho ngo rembuluwa vha litsha u vhulaha na u ita zwa vhungome na vhupombwe na u tswa.
Ṱhaluso dzi re magumoni a siaṱari
^ Zwine zwa amba uri “Ndozwo.”
^ Zwine zwa amba uri “Mulozwi.”
^ Kana “20 000 i tshi andiswa nga 10 000,” zwine zwa vha 200 000 000.
