Tito 1:1-16
1 Nṋe Paulo, mulanda wa Mudzimu na muapostola wa Yesu Kristo u ya nga lutendo lwa vho nangwaho nga Mudzimu na nḓivho yo teaho ya ngoho, ine ya tshimbidzana na u ḓikumedza kha Mudzimu
2 ho thewaho kha fulufhelo ḽa vhutshilo vhu sa fheli he ha fulufhedziswa kale-kale nga Mudzimu a sa zwifhi,
3 we nga zwifhinga zwawe zwo teaho a ita uri ipfi ḽawe ḽi ḓivhiwe nga mushumo wa u huwelela we nda ṋewa wone, u ya nga ndaela ya Mutshidzi washu, Mudzimu;
4 ndi ṅwalela iwe Tito ṅwana’nga vhukuma u ya nga u tenda hashu roṱhe ndi ri:
Vhuthu vhuhulu na mulalo zwi bvaho ha Mudzimu Khotsi na Kristo Yesu Mutshidzi washu nga zwi vhe na iwe.
5 Ndo u sia ngei Kereta uri u khakhulule zwithu zwo khakheaho na u vhea vhahulwane miḓini yoṱhe, u ya nga he nda u laedza ngaho.
6 Muhulwane u fanela u vha muthu a sa solei, munna a re na mufumakadzi muthihi, na vhana vha tendaho vha si na phungo mmbi ya u sa londa kana u vha mashandukwa.
7 Ngauri mulavhelesi u fanela u vha a sa solei vhunga e mulanda wa Mudzimu, a songo vha e na swili, e na mbilwana, e tshidakwa, e mudzia-dzinndwa, a tshi ṱoḓa nḓila dza u ḓivhuyedza nga nḓila dza vhupangwa,
8 fhedzi a vhe a ṱanganedzaho vhaeni, e mufuni wa zwivhuya, o tshaho muhumbuloni, o lugaho, a fulufhedzeaho, a ḓifaraho,
9 a farelelaho nga ho khwaṱhaho kha fhungo ḽi fulufhedzeaho malugana na vhutsila ha u funza, uri a kone u ṱuṱuwedza nga pfunzo i pfalaho na u kaidza vhane vha i hanedza.
10 Ngauri hu na vhathu vhanzhi vha mashandukwa, vhafhafhaḓi na vhafhuri, zwihuluhulu vhathu vhane vha tevhedza zwa u fumba.
11 Zwi a ṱoḓea uri vha thivhiwe milomo, samusi vhenevho vhathu vha tshi fhiriṱanya miṱa yoṱhe nga u funza pfunzo ine vha si tee u i funza uri vha vhuyelwe nga vhufhura.
12 Muṅwe wavho, ane a vha muporofita wavho, o ri: “Vhakereta vha dzulela u zwifha, ndi zwivhanda zwi re na khombo, phangwa dza vhubva.”
13 Hovhu vhuṱanzi ndi ha ngoho. Nga zwenezwo, bvela phanḓa u tshi vha kaidza nga ho khwaṱhaho, uri vha vhe na lutendo lwo khwaṱhaho,
14 uri vha si thetshelese ngano dza Vhayuda na ndaela dza vhathu vhane vha hana ngoho.
15 Zwithu zwoṱhe zwo kuna kha vhathu vho kunaho. Fhedzi kha vhathu vha re na tshika na vha si na lutendo a hu na tshithu tsho kunaho, ngauri mihumbulo yavho na mvalo dzavho zwi na tshika.
16 Vha ḓivhadza khagala uri vha ḓivha Mudzimu, fhedzi vha a mu landula nga mishumo yavho, ngauri vha a nengisa nahone a vha thetshelesi, huno a vha fanelei u ita mushumo naho u ufhio wavhuḓi.
