Tito 2:1-15
2 Naho zwo ralo, bvela phanḓa u tshi amba zwine zwa tendelana na pfunzo i pfalaho.
2 Vhanna vhahulwane vha ite zwithu nga u linganyisela, nga u ḓiimisela, vha vhe vho tshaho muhumbuloni, vho khwaṱhaho lutendoni, lufunoni, na kha u konḓelela.
3 Na vhafumakadzi vhahulwane vha fanela u ḓifara nga nḓila i ṱhonifheaho, vha songo vha na zwitshele, vha songo vha phuli dza u nwesa waini, vha gudise zwivhuya;
4 vha humbudze vhafumakadzi vhaswa uri vha fune vhanna vhavho, khathihi na u funa vhana vhavho,
5 vha vhe vho tshaho muhumbuloni, vho kunaho, vha shume mahayani, vha vhe na vhuthu, vha ḓiṱukufhadzele vhanna vhavho, uri ipfi ḽa Mudzimu ḽi si ambiwe luvhi.
6 U bvele phanḓa u tshi ṱuṱuwedza vhanna vhaṱuku uri na vhone vha vhe na muhumbulo wo tshaho.
7 U vhe tsumbo ya mishumo yavhuḓi nga nḓila dzoṱhe. U gudise zwo kunaho nga u ḓiimisela hoṱhe,
8 u ambe nga nḓila yavhuḓi ine ya sa ḓo sasaladzwa, uri vhane vha hanedza vha farwe nga ṱhoni, vha si vhe na tshithu na tshithihi tshi si tshavhuḓi tshine vha nga tshi amba nga ha riṋe.
9 Vhalanda nga vha ḓiṱukufhadzele vhaṋe vhavho kha zwithu zwoṱhe, nahone vha lingedze u vha takadza, vha songo vha na tshiambela,
10 vha songo vha tswela, fhedzi vha fulufhedzee tshoṱhe, uri vha nakise nga nḓila dzoṱhe pfunzo ya Mutshidzi washu, Mudzimu.
11 Ngauri vhuthu vhuhulu ha Mudzimu ho vhonala, nahone vhu ita uri vhathu vha mifuda yoṱhe vha tshidzwe.
12 Vhu ri gudisa uri ri iledze vhuḓifari ha u sa ofha Mudzimu na nyemulo dza shango, uri ri tshile ri na muhumbulo wo tshaho na u luga na u ḓikumedza kha Mudzimu kha ano maitele a zwithu,
13 musi ro lindela fulufhelo ḽavhuḓi na u vhonala ha vhugala ha Mudzimu muhulu na ha Mutshidzi washu, Kristo Yesu,
14 we a ḓikumedza a tshi itela riṋe uri a ri vhofholole kha vhutshinyi hoṱhe na uri a ḓiṱanzwele vhathu vhawe vho khetheaho, vha fhisetshelaho mishumo yavhuḓi.
15 Bvela phanḓa u tshi amba zwenezwi zwithu na u ṱuṱuwedza na u kaidza nga maanḓa oṱhe. U songo tendela muthu a tshi u nyadza.
