Tito 3:1-15
3 Bvela phanḓa u tshi vha humbudza uri vha ḓiṱukufhadze na uri vha thetshelese mivhuso na vhavhusi, vha dzule vho ḓilugisela mishumo yoṱhe yavhuḓi,
2 uri vha si ambe luvhi nga ha muthu na muthihi, vha si vuse khani, vha humbulele, vha sumbedze u vuḓa kha vhathu vhoṱhe.
3 Ngauri na riṋe ro vha ri si na ṱhalukanyo, ri sa thetshelesi, ro xedzwa, ri phuli dza nyemulo na miḓifho zwo fhamba-fhambanaho, ri tshi ita vhuvhi, ri na vhutshivha, ri tshi nengisa, ri tshi vhengana.
4 Naho zwo ralo, musi vhuthu ha Mutshidzi washu, Mudzimu, na u funa hawe vhathu zwi tshi vhonala,
5 (hu si nga nṱhani ha mishumo naho i ifhio yo lugaho ye ra i ita, fhedzi nge a ri khathutshela) o ri tshidza nga u ri ṱanzwa, zwe zwa ita uri ri tshile na u ita uri ri vhe vhaswa nga muya mukhethwa.
6 O ri shululela wonoyu muya nga vhunzhi a tshi shumisa Yesu Kristo Mutshidzi washu,
7 uri musi ho no pfi ro luga nga nṱhani ha vhuthu vhuhulu ha Mudzimu, ri vhe maḽaifa u ya nga fulufhelo ḽa vhutshilo vhu sa fheli.
8 Enea mafhungo a a fulufhedzea, nahone ndi ṱoḓa uri u zwi ambe wo khwaṱha tshifhinga tshoṱhe, uri vhe vha tenda Mudzimu vha dzule vho livhisa ṱhogomelo kha mishumo yavhuḓi. Hezwi zwithu ndi zwavhuḓi nahone zwi a vhuyedza vhathu.
9 Fhedzi iledza khani dza vhutsilu na u ita ṱhoḓisiso nga ha mutevhe wa lushaka na u ṱaṱa khani na u lwela Mulayo, ngauri zwenezwo zwithu a zwi vhuyedzi nahone ndi zwa mahandana.
10 Iledza u konana na muthu ane a ṱuṱuwedza pfunzo yo fhambanaho na yeneyi musi wo no mu kaidza luthihi kana luvhili;
11 u tshi ḓivha uri muthu onoyo o pambuwa nḓilani, o ita tshivhi na uri o ḓihaṱula.
12 Musi ndi tshi ruma Aritema kana Tixiko ha iwe, u ite zwoṱhe zwi re maanḓani au uri u ḓe kha nṋe ngei Nikopoli ngauri ndo humbula u fhedza vhuriha henefho.
13 Ita zwoṱhe zwine wa nga kona uri u thuse Zena, muḓivhi wa Mulayo, na Apolo musi vhe lwendoni lwavho nga u vha ṋea zwoṱhe zwine vha zwi shaya.
14 Fhedzi u dovhe u ite uri vhathu vhahashu vha gude u ita mishumo yavhuḓi uri vha kone u swikelela zwine vha zwi shaya vhukuma, uri vha si vhe vhane vha si aṋwe mitshelo tshumeloni yavho.
15 Vhoṱhe vha re na nṋe vha a u lumelisa. U lumelise vhane vha ri funa lutendoni.
Vhuthu vhuhulu nga vhu vhe na inwi noṱhe.
