Vhafilipi 1:1-30
1 Nṋe Paulo na Timotheo, riṋe vhalanda vha Kristo Yesu. Ndi ṅwalela vhakhethwa vhoṱhe vha re vhathihi na Kristo Yesu vha re ngei Filipi, khathihi na vhalavhelesi na vhashumeli:
2 Vhuthu vhuhulu na mulalo zwi bvaho ha Mudzimu ane a vha Khotsi ashu na Murena Yesu Kristo nga zwi vhe na inwi.
3 Tshifhinga tshoṱhe ndi livhuha Mudzimu wanga musi ndi tshi ni humbula
4 kha zwoṱhe zwine nda ni humbelela zwone noṱhe. Ndi ni humbelela ndo takala,
5 nga nṱhani ha uri no ṱanganela kha mafhungo maḓifha u bva ḓuvha ḽe na a ṱanganedza u swika zwino.
6 Ngauri ndi fulufhela zwenezwi, uri we a thoma wonoyu mushumo wavhuḓi kha inwi u ḓo u vuledza u swika nga ḓuvha ḽa Yesu Kristo.
7 Zwo tea uri ndi humbule zwenezwi malugana na inwi noṱhe, samusi ni mbiluni yanga, inwi vhe na vha ni na nṋe nga vhuthu vhuhulu musi ndi dzhele na musi ndi tshi imelela u ḓivhadzwa ha mafhungo maḓifha nga lwa mulayo.
8 Ngauri Mudzimu ndi ṱhanzi yanga ya uri inwi noṱhe ndi a ni ṱuvha vhukuma, ndi a ni funa nga nḓila ye Kristo Yesu a vha a tshi ni funa ngayo.
9 Ndi bvela phanḓa ndi tshi rabela nga ha zwenezwi, uri lufuno lwaṋu lu ḓi engedzea lu tshi ya ni na nḓivho yo teaho na u ṱalukanya nga vhuḓalo;
10 uri ni ṱhogomele zwithu zwa ndeme vhukuma, uri ri si solee nahone ni si khukhulise vhaṅwe u vhuya u swika nga ḓuvha ḽa Kristo,
11 uri ni ḓadzwe nga mutshelo wa u luga, une wa vha hone nga Yesu Kristo, uri Mudzimu a huliswe na u rendwa.
12 Vhahashu, ndi ṱoḓa ni tshi ḓivha uri zwithu zwe zwa itea kha nṋe zwo ita uri mafhungo maḓifha a bvele phanḓa a tshi ḓivhadzwa,
13 ngauri u vha hanga dzhele ndi tshi itela Kristo zwi vho ḓivhiwa vhukati ha Vhalindi vhoṱhe vha Pfamo na nga vhathu vhoṱhe.
14 Huno vhunzhi ha vhahashu Murenani vho no vha na fulufhelo nga nṱhani ha u vha hanga dzhele, nahone vha khou sumbedza u vha na tshivhindi tsha u amba ipfi ḽa Mudzimu vha sa ofhi.
15 Ndi ngoho, vhaṅwe vha khou huwelela nga ha Kristo vha tshi itiswa nga vivho na nga khani, fhedzi vhaṅwe vha zwi ita vhe na zwiṱuṱuwedzi zwavhuḓi.
16 Vhane vha huwelela nga zwiṱuṱuwedzi zwavhuḓi vha khou ḓivhadza Kristo nga lufuno, ngauri vha a zwi ḓivha uri ndo nangwa uri ndi imelele mafhungo maḓifha;
17 fhedzi vhane vha huwelela nga vivho na nga khani, vha itiswa nga dziphambano, a vha na tshiṱuṱuwedzi tshavhuḓi, ngauri vho ḓiimisela u mvusela khakhathi musi ndi dzhele.
18 Uri hu itee mini? U itela uri vhathu vha pfe mulaedza nga ha Kristo hu sa londwi uri vhane vha u huwelela vha khou ita nga u ralo nga tshiṱuṱuwedzi tshavhuḓi kana tshi si tshavhuḓi, nahone zwenezwo zwi a ntakadza. Zwi re zwone ndi uri ndi ḓo dzula ndo takala,
19 ngauri ndi a ḓivha uri zwenezwi zwi ḓo ntshidza nga nṱhani ha zwine na nkhumbelela zwone na u tikedzwa nga muya mukhethwa wa Yesu Kristo.
20 Zwenezwi zwi tendelana na zwe nda zwi lavhelela nga maṱo matswuku na u zwi fulufhela uri a thi nga ḓo shoniswa nga nḓila naho i ifhio, fhedzi nga u amba ndo vhofholowa, Kristo u ḓo huliswa zwino, samusi o vha a tshi dzulela u huliswa na tshifhingani tsho fhiraho nga muvhili wanga. U ḓo huliswa nga muvhili wanga hu sa lwondwi uri ndi a tshila kana ndi a fa.
21 Arali ndi tshi tshila ndi tshilela Kristo, arali ndi tshi fa ndi a vhuyelwa.
22 Huno arali ndi tshi tshila nga lwa ṋama, zwenezwi zwo bveledzwa nga mushumo wanga—fhedzi a thi ḓivhi tshine nda nga nanga tshone.
23 A thi ḓivhi uri ndi nange tshifhio vhukati ha izwi zwivhili; ngauri ndi tama u vhofhololwa na u vha na Kristo, ndi zwone zwa khwine nga maanḓa.
24 Naho zwo ralo, kha nṋe ndi zwa ndeme uri ndi dzule ndi muthu wa ṋama ndi tshi itela inwi.
25 Ngauralo, nge nda vha na fulufhelo ḽa zwenezwi, ndi a zwi ḓivha uri ndi ḓo dzula na inwi noṱhe u itela mvelaphanḓa yaṋu na dakalo ḽine na vha naḽo nga u vha na lutendo,
26 uri dakalo ḽaṋu ḽi fhufhume kha Kristo Yesu nga nṱhani hanga musi ndi tshi dovha nda vha na inwi.
27 Ni ḓifare nga nḓila yo teaho mafhungo maḓifha nga ha Kristo, uri naho arali nda ḓa u ni vhona kana ndi si ḓe, ndi pfe nga ha inwi uri no ima no khwaṱha muhumbulo u muthihi, ni tshi lwela lutendo lwa mafhungo maḓifha nga vhuthihi,
28 ni sa ofhiswi nga nḓila naho i ifhio nga vhane vha ni hanedza. Zwenezwi ndi vhuṱanzi ha uri vha ḓo fheliswa, fhedzi inwi ni ḓo tshidzwa; nahone Mudzimu u bvisela zwenezwi khagala.
29 Ngauri a no ngo ṋewa ndugelo ya u vha na lutendo kha Kristo fhedzi, fhedzi no ṋewa na ndugelo ya u tambulela ene.
30 Ngauri ni kha nndwa ye na mmbona ndi khayo, ine na pfa uri ndi kha ḓi vha khayo.
