Vhafilipi 2:1-30
2 Samusi ni vhathihi na Kristo, ni tshi ṱuṱuwedza na u khuthadza vhaṅwe ni tshi itiswa nga lufuno, ni tshi ṱhogomela vhaṅwe, ni tshi vha funa, na u vha pfela vhuṱungu,
2 itani uri dakalo ḽanga ḽi engedzee nga u dzula ni tshi elekanya nga nḓila i fanaho na u funana nga nḓila i fanaho, na u vha na vhuthihi nga ho fhelelaho, na u vha na mahumbulele a fanaho.
3 Ni songo ita tshithu na tshithihi nga u ṱaṱisana khani kana nga u ḓihudza, fhedzi ni ḓiṱukufhadze ni dzhie vhaṅwe vhe vhahulwane kha inwi.
4 Ni songo vha na dzangalelo kha mafhungo aṋu fhedzi, fhedzi ni vhe na dzangalelo na kha mafhungo a vhaṅwe.
5 Dzulani ni na muhumbulo wonoyu u fanaho na we Kristo Yesu a vha e nawo,
6 we naho o vha e kha tshivhumbeo tsha Mudzimu, a si humbule u dzhia vhuimo ha Mudzimu, uri a lingane nae.
7 Fhedzi o ṱutshela zwoṱhe zwe a vha e nazwo nahone a fana na mulanda. A vha muthu.
8 Zwi fhiraho zwenezwo, musi a tshi vha muthu, o ḓiṱukufhadza na u thetshelesa u swika a tshi fa kha danda ḽa tshengedzo.
9 Nga nṱhani ha zwenezwo, Mudzimu o dovha a mu hulisa a mu ṋea vhuimo ha nṱha nahone nga vhuthu a mu ṋea dzina ḽi fhiraho madzina oṱhe,
10 uri nga dzina ḽa Yesu muṅwe na muṅwe a gwadame—vhane vha vha ngei ṱaḓulu na vhane vha vha kha ḽifhasi na vhane vha vha fhasi ha mavu—
11 na uri muṅwe na muṅwe u fanela u ṱhogomela uri Yesu Kristo ndi Murena, uri hu rendwe Mudzimu ane a vha Khotsi.
12 Nga zwenezwo, inwi vhane nda ni funa, samusi no vha ni tshi dzulela u thetshelesa, hu si musi ndi hone fhedzi, fhedzi zwihuluhulu na musi ndi siho henefho, itani vhuḓidini hoṱhe nga nyofho na nga u tetemela uri ni tshidzwe.
13 Ngauri Mudzimu ndi ene a ni ṋeaho nungo, u khwaṱhisa lutamo lwaṋu uri ni ite zwithu zwoṱhe zwine a zwi funa.
14 Dzulani ni tshi ita zwithu zwoṱhe ni sa gunguli nahone ni sa ṱaṱisani khani,
15 uri ni vhe vha sa solei na vha si na mulandu, ni vhe vhana vha Mudzimu vha si na tshilavhi vhukati ha murafho u sa fulufhedzei na u sa ḓivhalekani, ni vhonetshele vhukati hawo sa maḓenzhe shangoni.
16 Dzulani no farelela ipfi ḽa vhutshilo, uri ndi kone u vha na tshiitisi tsha u takala nga ḓuvha ḽa Kristo, ndi tshi ḓivha uri a tho ngo gidima lwa fhedzi kana u ḓinetisa lwa fhedzi.
17 Naho ndi tshi khou shululwa sa tshinwiwa tshi shelwaho kha tshiṱhavhelo na kha mushumo we na u ita no ṱuṱuwedzwa nga u vha na lutendo, ndi a takala na inwi noṱhe.
18 Na inwi ni fanela u takala na nṋe nga nḓila i fanaho.
19 Naho zwo ralo, ndi fulufhela uri arali zwi zwine Murena Yesu a zwi funa, ndi ḓo ruma Timotheo ha inwi hu si kale, uri na nṋe ndi ṱuṱuwedzee musi ndi tshi pfa nga ha inwi.
20 Ngauri a thi na muṅwe ane a vha na mavhonele ane a fana na awe ane a ḓo ṱhogomela vhukuma zwithu zwine zwa ni kwama.
21 Ngauri vhaṅwe vhoṱhe vha ṱoḓa zwine zwa vha takadza, hu si zwa Kristo Yesu.
22 Fhedzi ni a ḓivha vhuṱanzi he a vhu sumbedza, uri o shuma na nṋe uri mafhungo maḓifha a ye phanḓa u fana na ṅwana a tshi shumisana na khotsi.
23 Nga zwenezwo, ndi ene ane nda khou fulufhela uri ndi mu rume nga u ṱavhanya musi ndo no vhona uri hu ḓo itea mini nga nṋe.
24 Vhukuma, ndi fulufhela Murena uri na nṋe ndi ḓo ḓa hu si kale.
25 Fhedzi ndi vhona zwi tshi ṱoḓea uri ndi ni rumele Epafrodito, wahashu ane a vha mushumisani na nṋe na ḽiswole nga nṋe, fhedzi ane a vha muḓinḓa waṋu na ane a ntshumela u itela u fusha zwishaiwa zwanga,
26 samusi a tshi khou ṱulutshelwa u ni vhona noṱhe nahone o tsikeledzea ngauri no zwi pfa zwa uri o vha a tshi khou lwala.
27 Vhukuma, o vha a tshi khou lwala nga maanḓa lwe a ṱoḓou fa; fhedzi Mudzimu a mu khathutshela, zwi re zwone ndi uri ho ngo khathutshela ene fhedzi, fhedzi o khathutshela na nṋe, uri ndi songo dzula ndi tshi khou pfa vhuṱungu.
28 Ngauralo, ndi ḓo mu rumela nga u ṱavhanya uri musi ni tshi mu vhona ni dovhe ni takale uri na nṋe ndi si tsha vhilaela nga maanḓa.
29 Mu ṱanganedzeni nga dakalo samusi vhane vha shumela Murena vho ḓowela u ita nga u ralo; ni dzule ni tshi ṱhonifha vhathu vho raloho,
30 ngauri o ṱoḓou fela mushumo wa Murena, o vhea vhutshilo hawe khomboni a tshi itela u vala tshikhala tsha u sa vha hone haṋu uri ni ntshumele.
