Vhafilipi 3:1-21
3 Tsha u fhedza vhahashu, bvelani phanḓa ni tshi takala Murenani. A thi na thaidzo ya u dovha nda ni ṅwalela zwenezwi zwithu zwithihi, samusi hu u ni tsireledza.
2 Ni ṱhogomele vhathu vha songo kunaho,* ni ṱhogomele vhaitazwivhi, ni ṱhogomele vhane vha ṱuṱuwedza u fumba.*
3 Ngauri riṋe ro fumba zwa vhukuma, samusi ri tshi khou ita tshumelo khethwa nga muya wa Mudzimu na u zuwa nga Kristo Yesu nahone a ri vhei fulufhelo ḽashu kha zwithu zwa ṋama,
4 arali hu na muthu naho e ufhio ane a vha na zwiitisi zwa uri a fulufhele zwithu zwa ṋama, onoyo muthu ndi nṋe.
Arali muṅwe muthu a tshi humbula uri u na zwiitisi zwa uri a fulufhele zwithu zwa ṋama, nṋe ndi a mu fhira:
5 ndo fumbiswa nga ḓuvha ḽa vhumalo, ndi muḓuhulu wa Isiraele, wa lushaka lwa Benyamini, ndi Muheberu o bebwaho nga Vhaheberu; malugana na mulayo, ndo vha ndi Mufarisei;
6 malugana na u fhisea, ndo vha ndi tshi tovhola tshivhidzo; malugana na u luga hu ḓiswaho nga mulayo, ndo vha ndi tshi ḓidzhia ndi sa solei.
7 Zwithu zwe zwa vha zwi tshi mmbuyedza, ndo zwi ṱutshela nga u ḓifunela ndi tshi itela Kristo.
8 Nga zwenezwo, ndo ṱutshela zwithu zwoṱhe ndi tshi itela nḓivho ya ndeme vhukuma ya Kristo Yesu Murena wanga. Nga nṱhani hawe, ndo ṱutshela zwithu zwoṱhe nahone nda zwi dzhia zwi mathukhwi, uri ndi wane Kristo
9 na uri ndi wanwe ndi na vhuthihi nae, hu si nga nṱhani ha u luga hanga nga u tevhedza mulayo, fhedzi nga nṱhani ha u luga nga u vha na lutendo kha Kristo—u luga hu bvaho ha Mudzimu ho thewaho kha lutendo.
10 Ndivho yanga ndi u mu ḓivha na u ḓivha maanḓa awe a mvuwo na u tambula nae, na u fa u fana nae,
11 ndi vhone arali zwi tshi nga konadzea uri ndi swikelele u vuswa vhafuni kha mvuwo ya u thoma.
12 A si uri ndo no zwi wana kana ndo no itwa o fhelelaho, fhedzi ndi khou bvela phanḓa uri ndi vhone arali ndi tshi nga kona u fara zwe Kristo Yesu a nnangela zwone.
13 Vhahashu, a thi ḓidzhii ndo no zwi wana; fhedzi zwine nda vha na vhuṱanzi nazwo ndi zwa uri: Ndi hangwa zwithu zwi re murahu nda hovhelela zwi re phanḓa,
14 ndi khou bvela phanḓa uri ndi swikelele tshipikwa tsha u wana malamba ngei ṱaḓulu a zwe Mudzimu a ri vhidzela zwone nga Kristo Yesu.
15 Nga zwenezwo-ha, vhoṱhe vho vhibvaho nga vha vhe na muhumbulo wonoyu; nahone arali muhumbulo waṋu u muṅwe-vho nga nḓila naho i ifhio, Mudzimu u ḓo ni dzumbululela muhumbulo wo teaho.
16 Naho zwo ralo, hu sa londwi mvelaphanḓa ye ra i ita, kha ri bvele phanḓa ri tshi tshimbila nga yeneyo nḓila yo dzudzanyeaho.
17 Vhahashu, ivhani vhane vha edzisa nṋe, ni vhee iṱo vhane vha tshimbila nga nḓila i tendelanaho na tsumbo ye na ṋewa yone.
18 Ngauri hu na vhanzhi vhe nda vha ndi tshi dzulela u amba nga havho, fhedzi zwino ndi amba ndi tshi khou lila, vhenevho vha tshimbila sa maswina a danda ḽa tshengedzo ḽa Kristo.
19 Vha ḓo fheleledza nga u lozwiwa, nahone mudzimu wavho ndi thumbu dzavho, vha ḓihudza nga zwithu zwine zwa shonisa, vha dzula vha tshi humbula zwithu zwa kha ḽifhasi.
20 Fhedzi hayani hashu ndi ngei ṱaḓulu, nahone ro lindela mutshidzi a bvaho henengei nga maṱo matswuku, ane a vha Murena Yesu Kristo,
21 ane a ḓo shumisa maanḓa awe mahulu uri a shandule mivhili yashu i nyadzeaho uri i fane na muvhili wawe wa vhugala, na u ita uri zwithu zwoṱhe zwi ḓiṱukufhadzele ene.
Ṱhaluso dzi re magumoni a siaṱari
^ Ṱhalutshedzelo ya ipfi nga ipfi i ri “dzimmbwa.”
^ Nga Lugerika ndi “vhane vha tshea ṋama.”
