Vhafilipi 4:1-23
4 Nga nṱhani ha zwenezwo, vhahashu vhane nda vha funa na vhane nda vha ṱulutshelwa, inwi vhane na ntakadza na u vha dzanga ḽanga, imani no khwaṱha nga yeneyo nḓila Murenani, inwi vhane nda ni funa.
2 Inwi Euodia na inwi Sintixe ndi a ni ṱuṱuwedza uri ni vhe na muhumbulo u fanaho Murenani.
3 Na inwi ndi a ni humbela samusi ni vhashumisani na nṋe vha fulufhedzeaho, uri ni dzule ni tshi thusa vhenevho vhafumakadzi vhe vha ḓidina vhukuma vhe na nṋe, vha tshi itela mafhungo maḓifha khathihi na Klementhe na vhashumisani na nṋe vhoṱhe, vhe madzina avho a ṅwalwa buguni ya vhutshilo.
4 Takalani Murenani tshifhinga tshoṱhe. Ndi dovha nda ri, Takalani!
5 Itani uri u humbulela haṋu hu ḓivhiwe nga vhathu vhoṱhe. Murena u tsini.
6 Ni songo vhilaela nga tshithu na tshithihi, fhedzi zwoṱhe zwine na zwi ṱoḓa ni humbele Mudzimu nga thabelo khathihi na u livhuha;
7 nahone mulalo wa Mudzimu une wa fhira u ṱalukanya hoṱhe u ḓo tsireledza mbilu dzaṋu na maanḓa aṋu a muhumbulo nga Kristo Yesu.
8 Vhahashu, zwithu naho zwi zwifhio zwine zwa vha ngoho, zwine zwa vha zwa ndeme, zwo lugaho, zwo kunaho, zwi funeaho, zwi re na bvumo ḽavhuḓi, zwivhuya, zwi khoḓwaho, bvelani phanḓa ni tshi humbula nga ha zwenezwi zwithu.
9 Zwithu zwe na zwi guda khathihi na zwe na zwi ṱanganedza na zwe na zwi pfa na zwe na zwi vhona malugana na nṋe, dzulani ni tshi zwi ita; Mudzimu wa mulalo u ḓo vha na inwi.
10 Ndi a takala zwihulu Murenani uri mafheleloni no dovha na humbula nga ha nṋe. Naho no vha ni tshi khou nkhumbula, fhedzi a no ngo wana tshibuli tsha u zwi sumbedza.
11 A thi khou amba zwenezwi ngauri hu na zwine nda khou zwi shaya, ngauri ndo guda u fushea hu sa londwi zwiimo zwanga.
12 Ndi a ḓivha u ṱahelelwa nga zwithu na u ḓalelwa nga zwithu. Kha zwithu zwoṱhe na kha zwiimo zwoṱhe ndo guda tshiphiri tsha u fura na u farwa nga nḓala, u ḓalelwa nga zwithu na u shaya.
13 Ngauri zwithu zwoṱhe ndi zwi koniswa nga ane a nṋea maanḓa.
14 Naho zwo ralo, no ita zwone nga u ṱanganela na nṋe maṱunguni anga.
15 Zwi re zwone ndi uri inwi Vhafilipi ni a zwi ḓivha uri musi no no guda mafhungo maḓifha, musi ndi tshi ṱuwa Makedonia a hu na tshivhidzo na tshithihi tshe tsha nthusa kana u ṱanganedza thuso yanga, nga nnḓa ha inwi;
16 ngauri na musi ndi ngei Thesalonika, no nthumela zwine nda zwi shaya luvhili lwoṱhe.
17 A si uri ndi khou ṱoḓa tshifhiwa, fhedzi ndi khou ṱoḓa tshiaṋwiwa tshine tsha ḓo ni vhuyedza vhukuma.
18 Naho zwo ralo, ndi na zwoṱhe zwine nda zwi shaya nahone ndi zwinzhi. A thi shayi tshithu, ngauri ndo wana zwithu zwe na nthumela kha Epafrodito, tshiṱhavhelo tshi nukhelelaho, tshi ṱanganedzeaho, tshi takadzaho Mudzimu vhukuma.
19 Nga hu fanaho, Mudzimu wanga a re na zwithu zwinzhi u ḓo shumisa Kristo Yesu uri a ni ṋee zwoṱhe zwine na zwi shaya.
20 Huno Mudzimu ane a vha Khotsi ashu nga a rendwe lini na lini. Amen.
21 Ni lumelise vhakhethwa vhoṱhe vha re vhathihi na Kristo Yesu. Vhahashu vhane nda vha navho na vhone vha a ni lumelisa.
22 Vhakhethwa vhoṱhe, zwihuluhulu vhane vha dzula muṱani wa Kesare,* vha a ni lumelisa.
23 Vhuthu vhuhulu ha Murena Yesu Kristo kha vhu vhe na mavhonele avhuḓi ane na a sumbedza.
Ṱhaluso dzi re magumoni a siaṱari
^ Kana “Khosi.”
