Vhagalata 1:1-24
1 Nṋe Paulo, muapostola, zwi sa bvi kha vhathu kana muthu ndo nangwa nga Yesu Kristo na Mudzimu Khotsi, we a mu vusa vhafuni,
2 na vhahashu vhoṱhe vhane vha vha na nṋe ndi ṅwalela zwivhidzo zwa Galata ndi ri:
3 Vhuthu vhuhulu na mulalo zwa Mudzimu Khotsi ashu na Murena Yesu Kristo nga zwi vhe na inwi.
4 O ḓiṋekedza a tshi itela zwivhi zwashu uri a ri vhofholole kha ano maitele mavhi a zwithu u ya nga u funa ha Mudzimu ane a vha Khotsi ashu,
5 ane a tea u rendwa lini na lini. Amen.
6 Ndi a mangala ngauri no ṱavhanya na ṱutshela Mudzimu we a ni vhidza nga vhuthu vhuhulu ha Kristo na iswa kha muṅwe mufuda wa mafhungo maḓifha.
7 Fhedzi a hu na maṅwe; huno hu na vhaṅwe vhane vha khou ni dina na vhane vha khou ṱoḓa u shanda mafhungo maḓifha a ambaho nga ha Kristo.
8 Naho zwo ralo, arali riṋe kana muruṅwa a bvaho ṱaḓulu o vha a tshi nga ni ḓivhadza mafhungo maḓifha o fhambanaho na e ra ni ḓivhadza one, nga a semiwe.
9 Samusi ro zwi amba afho nṱha, ndi khou dovha nda zwi amba nda ri: Naho e nnyi ane a ni ḓivhadza mafhungo maḓifha o fhambanaho na e na a ṱanganedza, nga a semiwe.
10 Zwi re zwone ndi uri, naa ndi khou lingedza u takalelwa nga vhathu kana nga Mudzimu? Kana naa ndi khou ṱoḓa u takadza vhathu? Arali ndo vha ndi tshi kha ḓi takadza vhathu, ndo vha ndi tshi ḓo vha ndi si mulanda wa Kristo.
11 Vhahashu, ndi ṱoḓa ni tshi ḓivha uri mafhungo maḓifha ane nda ni ḓivhadza one a si ane a bva kha vhathu;
12 ngauri a tho ngo a wana a tshi bva kha muthu, nahone a tho ngo tou a gudiswa, fhedzi ndo tou dzumbululelwa nga Yesu Kristo.
13 Vhukuma, no pfa nga ha vhuḓifari hanga musi ndi tshi kha ḓi vha kha Vhuyuda, uri ndo vha ndi tshi dzulela u tovhola lwa tshiṱuhu tshivhidzo tsha Mudzimu na u lingedza u tshi fhelisa,
14 nahone ndo vha ndi tshi khou bvelela vhukuma kha Vhuyuda u fhira vhanzhi vha murole wanga vha lushaka lwa hashu, samusi ndo vha ndi tshi fhisetshela nga maanḓa masialala a vhokhotsi anga.
15 Fhedzi musi Mudzimu we a ita uri ndi bebwe nahone a mmbidza a tshi shumisa vhuthu hawe vhuhulu, o vhona zwo tea
16 u ndzumbululela Murwa wawe, uri ndi ḓivhadze vhathu vha dziṅwe tshaka mafhungo maḓifha, vha ḓivhe Murwa wawe. Musi a tshi nnanga uri ndi ite zwenezwi, a tho ngo humbela nyeletshedzo kha muthu na muthihi.
17 A tho ngo gonya Yerusalema kha vhe vha vha vhaapostola phanḓa hanga, fhedzi ndo ya Arabia, nahone nda dovha nda vhuyelela Damaseko.
18 Nga murahu ha miṅwaha miraru nda gonya Yerusalema u dalela Kefa, nda dzula nae maḓuvha a fumi-ṱhanu (15).
19 Fhedzi a tho ngo vhona na muthihi wa vhaapostola nga nnḓa ha Yakobo murathu wa Murena.
20 Malugana na zwe nda ni ṅwalela zwone, ndi a ni khwaṱhisedza phanḓa ha Mudzimu uri a thi khou zwifha.
21 Nga murahu ha zwenezwo, nda ya dzinguni ḽa Siria na ḽa Kilikia.
22 Fhedzi ndo vha ndi sa ḓivhiwi zwivhidzoni zwa Yudea zwe zwa vha zwi na vhuthihi na Kristo;
23 zwo vha zwi tshi dzulela u pfa uri: “Muthu we a vha a tshi ri tovhola, zwino u khou ḓivhadza mafhungo maḓifha nga ha lutendo lwe a vha a tshi khou ṱoḓa u lu fhelisa.”
24 Ngauralo, vha thoma u renda Mudzimu nga nṱhani hanga.
