Vhagalata 2:1-21
2 Nga murahu ha miṅwaha ya fumi-iṋa (14) ndo dovha nda gonya Yerusalema ndi na Baranaba, ra ṱuwa na Tito.
2 Ngauri ndo vha ndo dzumbululelwa uri ndi ye, nahone nda vha vhudza mafhungo maḓifha ane nda khou a huwelela kha dzitshaka. Naho zwo ralo, zwenezwo ndo zwi amba musi ndi na muṱangano na vhanna vhe vha vha vha tshi dzhielwa nṱha, uri ndi khwaṱhisedze uri vhuḓinḓa he nda vha ndi tshi khou vhu ita kana he nda vhu ita a si ha fhedzi.
3 Naho zwo ralo, na Tito we nda vha ndi nae, ho ngo kombetshedzwa uri a fumbiswe, naho o vha e Mugerika.
4 Fhedzi eneo mafhungo o bvela khagala nga nṱhani ha vhahashu vha mazwifhi vho dzhenaho nga u ṋangavhedza uri vha wane nḓila ya u tshinya mbofholowo yashu ine ra vha nayo na Kristo Yesu, uri vha ri ite phuli dzavho—
5 a ro ngo ḓiṱukufhadza kha vhenevho, naho lu lwa tshifhinganyana, uri ni dzule ni na ngoho ya mafhungo maḓifha.
6 Fhedzi malugana na vhe vha vha vha tshi dzhiiwa vhe vha ndeme—hu sa lwondwi uri vho vha vhe vhathu vha mufuda-ḓe, zwi a fana kha nṋe—Mudzimu ha sedzi mbonalo ya muthu—zwi re zwone ndi uri vhenevho vhanna vhe vha vha vha tshi dzhielwa nṱha a hu na tshithu na tshithihi tshe vha nngudisa tshone.
7 Zwo fhambanaho na zwenezwo, musi vha tshi ṱhogomela uri ndo kumedzwa u ḓivhadza mafhungo maḓifha kha vha songo fumbaho, u fana na Petro we a kumedzwa u ḓivhadza mafhungo maḓifha kha vho fumbaho,
8 ngauri we a ṋea Petro maanḓa a vhuapostola kha vho fumbaho, o dovha a nṋea maanḓa kha vha dzitshaka;
9 musi vha tshi ṱhogomela vhuthu vhuhulu he nda ṋewa hone, Yakobo, Kefa na Yohane, vhe vha vha vha tshi vhonala vhe vhone phuphu, vho sumbedza nṋe na Baranaba uri vha khou ri tendela u ya kha vha dzitshaka, fhedzi vhone vha ya kha vho fumbaho.
10 Vho humbela uri ri dzule ri tshi humbula vha shayaho, nahone ndi zwenezwi zwe nda vha ndi tshi dzula ndi tshi ṱoḓa u zwi ita nga mbilu yoṱhe.
11 Naho zwo ralo, musi Kefa a tshi ḓa Antiokia, ndo mu hanedza ro livhana zwifhaṱuwo, ngauri zwo vha zwi tshi tou vha khagala uri u khou khakha.
12 Musi hu sa athu ḓa vhaṅwe vhathu vha bvaho ha Yakobo, o vha a tshi anzela u ḽa na vha dzitshaka; fhedzi musi vha tshi swika, a mbo ḓi litsha u ita nga u ralo nahone a ḓifhambanya navho, a tshi ofha vho fumbiswaho.
13 Na vhaṅwe Vhayuda vhoṱhe vho mu edzisa kha honoho vhufhura, lwe na Baranaba a ṱuṱuwedzea uri a edzise honoho vhufhura havho.
14 Fhedzi musi ndi tshi vhona uri vho vha vha sa khou tevhela ngoho ya mafhungo maḓifha, nda amba na Kefa phanḓa ha vhoṱhe nda ri: “Arali u Muyuda, u tshi tshila u fana na vha dzitshaka, u sa tshili u fana na Vhayuda, u nga kombetshedza hani vhathu vha dzitshaka uri vha tevhele maitele a Tshiyuda?”
15 Riṋe ro bebwaho ri Vhayuda, ri si vhaitazwivhi vha bvaho kha dzitshaka,
16 ri a zwi ḓivha uri muthu ha pfi o luga nga nṱhani ha u tevhedza mulayo, fhedzi hu pfi o luga nga u vha na lutendo kha Kristo Yesu fhedzi. Nga zwenezwo, ri na lutendo kha Kristo Yesu, uri hu pfi ro luga nga lutendo kha Kristo, hu si nga u tevhedza mulayo, ngauri a hu na muthu ane a ḓo pfi o luga nga mishumo ya mulayo.
17 Arali ra dovha ra wanwa ri vhaitazwivhi ngeno ri tshi ṱoḓa u itwa vho lugaho nga nṱhani ha Kristo, naa zwenezwo zwi amba uri Kristo u khou ri ṱuṱuwedza uri ri ite tshivhi? Na kathihi!
18 Ngauri arali ndi tshi dovha nda fhaṱa zwe nda thutha, ndi sumbedza uri ndi mupfuki wa mulayo.
19 Ngauri ndo fa siani ḽa mulayo ndi tshi itiswa nga wonoyo mulayo, uri ndi kone u tshilela Mudzimu.
20 Huno ndo ombelwa kha danda na Kristo. A thi tsha ḓitshilela, fhedzi ndi Kristo ane a khou tshila e na vhuthihi na nṋe. I ngoho, vhutshilo vhune nda vhu tshila ṋamani ndi vhu tshila nga lutendo kha Murwa wa Mudzimu, we a mpfuna na u ḓiṋekedza a tshi itela nṋe.
21 A thi khou hana vhuthu vhuhulu ha Mudzimu; arali u luga hu tshi itiswa nga mulayo, zwi re zwone ndi uri Kristo o fa lwa mahandana.
