Vhagalata 4:1-31
4 Musi muḽaifa a tshi kha ḓi vha ṅwana u vha a songo fhambana na mulanda, naho e muṋe wa zwithu zwoṱhe,
2 fhedzi u nga fhasi ha vhalangi na vhalanda u swika tshifhinga tsho vhewaho nga khotsi awe hu tshee nga phanḓa.
3 Nga hu fanaho, musi ri tshi kha ḓi vha vhana ro vha ri vhalanda vha zwithu zwa vhuhana zwa ḽino shango.
4 Musi tshifhinga tsho khunyelelaho tshi tshi swika, Mudzimu o ruma Murwa wawe we a bebwa nga mufumakadzi nahone o vha e nga fhasi ha mulayo,
5 uri a rengulule vha re nga fhasi ha mulayo, uri Mudzimu a ri dzhie sa vharwa vhawe.
6 Ngauri ni vharwa, Mudzimu o rumela muya wa Murwa wawe mbiluni dzashu nahone u a vhidzelela, wa ri: “Aba,* Khotsi!”
7 Ngauralo, a u tsha vha mulanda, fhedzi u murwa; arali u murwa, Mudzimu o u ita uri u vhe muḽaifa.
8 Naho zwo ralo, musi ni sa athu ḓivha Mudzimu, no vha ni vhalanda vha midzimu ya mazwifhi.
9 Huno ni vho ḓivha Mudzimu, kana ni vho ḓivhiwa nga Mudzimu, zwino ndi ngani ni tshi nga dovha na vhuyelela kha zwithu zwa vhuhana na ṱoḓa u dovha na vha vhalanda vhazwo?
10 Ni dzhiela nṱha maḓuvha, miṅwedzi, dzikhalaṅwaha, na miṅwaha.
11 Ndi ofha uri ndi nga vha ndo ita vhuḓidini ha fhedzi ndi tshi itela inwi.
12 Vhahashu, ndi khou ni humbela ndi ri, edzisani nṋe ngauri na nṋe ndo vha ndi tshi fana na inwi. A no ngo nkhakhela.
13 Fhedzi ni a zwi ḓivha uri ndi vhulwadze he ha nṋea tshibuli lwa u thoma tsha uri ndi ni ḓivhadze mafhungo maḓifha.
14 Naho vhulwadze hanga ho vha hu mulingo kha inwi, a no ngo nnyadza kana u nnengwa; fhedzi no nṱanganedza u fana na muruṅwa wa Mudzimu, u fana na Kristo Yesu.
15 Nga zwenezwo, ḽi ngafhi dakalo ḽe na vha ni naḽo? Ngauri ndi na vhuṱanzi ha uri arali zwo vha zwi tshi konadzea no vha ni tshi ḓo nongola maṱo aṋu na nṋea one.
16 Ngauralo, naa ndo vha swina ḽaṋu ngauri ndi ni vhudza ngoho?
17 Vha khou fhisetshela u ni kunga nga ndivho i si yavhuḓi, fhedzi vha khou ṱoḓa u ni sendedzela kule na nṋe, uri ni vha tevhele nga u fhisea.
18 Naho zwo ralo, ndi zwavhuḓi arali tshifhinga tshoṱhe muthu a tshi ni kunga e na ndivho yavhuḓi, nahone hu si musi ndi na inwi fhedzi,
19 ngauri ndi khou dovha nda pfa vhuṱungu nga nṱhani haṋu vhu fanaho na ha mufumakadzi a tshi vhofholowa, u swika ni tshi sumbedza vhumuthu ha Kristo.
20 Ndi tama arali ndo vha ndi tshi nga vha na inwi zwino nda amba nga nḓila yo fhambanaho, ngauri a thi ḓivhi uri ndi ite mini nga inwi.
21 Mmbudzeni inwi vhane na ṱoḓa u vha nga fhasi ha mulayo, naa a ni pfi Mulayo?
22 Sa tsumbo, ho ṅwalwa uri Abrahamu o vha e na vharwa vhavhili, muṅwe o mu bebelwa nga musidzana wa mulanda nahone muṅwe a mu bebelwa nga mufumakadzi a re na mbofholowo;
23 fhedzi murwa o bebwaho nga musidzana wa mulanda o bebwa nga nḓila yo ḓoweleaho, muṅwe murwa o bebwa nga mufumakadzi ane a ḓilanga u ya nga fulufhedziso ḽa Mudzimu.
24 Zwenezwi zwithu ndi zwa pfanyisedzo; ngauri vhenevha vhafumakadzi vha imela milanga mivhili, muṅwe ndi wa Thavhani ya Sinai, we wa beba vhana vha vha dziphuli, onoyo ndi Hagara.
25 Huno Hagara u imela Sinai, thavha ya ngei Arabia, nahone u imela Yerusalema wa ṋamusi, ngauri u vhupulini na vhana vhawe.
26 Fhedzi Yerusalema wa ṱaḓulu o vhofholowa, nahone ndi mme ashu.
27 Ngauri ho ṅwalwa u pfi: “Takala iwe mufumakadzi a sa bebi; ṱavha mukosi wa dakalo, iwe mufumakadzi u sa pfi vhuṱungu ha u vhofholowa; ngauri vhana vha mufumakadzi o laṱwaho* vho ḓala u fhira vha mufumakadzi a re na munna.”
28 Vhahashu, na riṋe ri vhana vho fulufhedziswaho u fana na Isaka.
29 Ngauri we a bebwa nga lwa ṋama o thoma u tovhola we a bebwa nga lwa muya, na zwino zwi kha ḓi vha nga u ralo.
30 Naho zwo ralo, Luṅwalo lu ri mini? Lu ri: “Pandela musidzana wa mulanda na murwa wawe, ngauri murwa wa musidzana wa mulanda ha nga ḓo vha muḽaifa na murwa wa mufumakadzi a re na mbofholowo.”
31 Ngauralo vhahashu, a ri vhana vha musidzana wa mulanda, fhedzi ri vhana vha mufumakadzi a re na mbofholowo.
Ṱhaluso dzi re magumoni a siaṱari
^ Ḽeneḽo ndi ipfi ḽa Luaramiki ḽine ḽa amba uri “khotsi.” Ndi ipfi ḽine vhana vha ḽi shumisa musi vha tshi vhidza khotsi avho.
^ Kana “a sa bebi.”
