Vhagalata 5:1-26
5 Ro vhofhololwa nga Kristo uri ri vhe na mbofholowo. Nga zwenezwo, imani no khwaṱha, nahone ni songo dovha na vha nga fhasi ha dzhogo ya vhupuli.
2 Nṋe Paulo ndi khou ni vhudza uri arali na fumbiswa, Kristo a nga si ni vhuyedze nga tshithu.
3 Zwiṅwe hafhu, ndi humbudza muthu muṅwe na muṅwe ane a khou fumbiswa uri u a kombetshedzea u tevhedza Mulayo woṱhe.
4 No fhambanywa na Kristo, inwi vhane na lingedza u ḓivhadza u luga ni tshi shumisa mulayo; ni kule na vhuthu vhuhulu hawe.
5 Riṋe nga maanḓa a Mudzimu na nga lutendo, ro lindela na u fulufhela u dzhiiwa sa vho lugaho.
6 Vhane vha vha na vhuthihi na Kristo Yesu, u fumba kana u sa fumba a si zwa ndeme, fhedzi lutendo lu bveledzwaho nga lufuno ndi lwa ndeme.
7 No vha ni tshi khou gidima zwavhuḓi. Ndi nnyi o ni thivhelaho uri ni si bvele phanḓa ni tshi thetshelesa ngoho?
8 Ṱhuṱhuwedzo yo raloho a i bvi kha Ane a khou ni vhidza.
9 Mbiliso ṱhukhu i dungisa fulauru yoṱhe yo sukwaho.
10 Ndi fulufhela uri inwi vha re na vhuthihi na Murena a ni nga ḓo humbula nga iṅwe nḓila; fhedzi ane a khou ni dina, hu sa londwi uri ndi nnyi, u ḓo haṱulwa nga nḓila yo mu teaho.
11 A vha nṋe, vhahashu, arali ndi tshi kha ḓi huwelela nga ha u fumba, ndi ngani ndi tshi kha ḓi tovholwa? Arali zwo ralo, danda ḽa tshengedzo a ḽi tsha vha tshikhukhulisi.
12 Ndi tama uri vhanna vhane vha khou lingedza u ni thithisa vha ḓifhahule vhone vhaṋe.
13 Vhahashu, no vhidzwa uri ni vhe na mbofholowo; fhedzi ni songo shumisa yeneyo mbofholowo sa tshibuli tsha u tovhola nyemulo dza ṋama, tshaṋu nga hu vhe u shumelana nga lufuno.
14 Ngauri Mulayo woṱhe wo katelwa kha ndaela nthihi, ine ya ri: “U tea u funa wahau vhunga u tshi ḓifuna.”
15 Arali ni tshi dzulela u lumana na u ḽana, ni ṱhogomele uri ni sa ḓo fhedzana.
16 Fhedzi ndi ri: Dzulani ni tshi tshimbila lwa muya uri ni si ite zwine ṋama ya emula zwone.
17 Ngauri ṋama i lwisana na muya nga nṱhani ha nyemulo dzayo, na muya u lwisana na ṋama; zwenezwi zwi a lwisana, uri ni si ite zwithu zwine na ṱoḓa u zwi ita.
18 Zwiṅwe hafhu, arali ni tshi livhiswa nga muya, a ni tsha vha nga fhasi ha mulayo.
19 Huno mishumo ya ṋama i khagala, ndi vhupombwe, vhuyaḓa, u ḓifara nga nḓila i shonisaho,
20 u rabela midzimu ya zwifanyiso, vhungome, vhuswina, dzinndwa, vivho, u sinyuwa, u vhangisana, dziphambano, u vhumba zwigwada,
21 vhutshivha, vhudakwa, zwimima zwi sa langei, na zwithu zwi fanaho na zwenezwi. Ndi khou dzula ndo ni sevha nga ha zwenezwi zwithu, samusi ndo no ḓi dzula ndo ni sevha nga hazwo, uri vhane vha ita zwenezwo zwithu a vha nga ḽi ifa ḽa Muvhuso wa Mudzimu.
22 Kha ḽiṅwe sia, zwiaṋwiwa nga muya ndi lufuno, dakalo, mulalo, u sa fhela mbilu, vhuthu, vhulenda, lutendo,
23 u vuḓa, na u ḓifara. Mulayo a u lwi na zwithu zwo raloho.
24 Zwiṅwe hafhu, vhane vha vha vha Kristo Yesu vha vhulaha* vhudugambilu na nyemulo dza ṋama.
25 Arali ri tshi tshila lwa muya, kha ri bvele phanḓa ri tshi tshimbila lwa muya nga nḓila yo dzudzanyeaho.
26 Ri songo ḓikukumusa, u ṱaṱisana, na u itelana vhutshivha.
Ṱhaluso dzi re magumoni a siaṱari
^ Ṱhalutshedzelo ya ipfi nga ipfi i ri “u ombela kha danda.”
