Vhagalata 6:1-18
6 Vhahashu, arali muthu a ita vhukhakhi a songo zwi ṱhogomela, inwi vhane na vha na pfaneleo dza muya ni lingedze u mu khakhulula nga muya wa u vuḓa. Fhedzi ni ḓiṱhogomele, ni tshi ofha uri na inwi ni si lingwe.
2 Bvelani phanḓa ni tshi ṱhaḓulana mihwalo, nga yeneyi nḓila ni ḓo vha ni tshi khou ḓadzisa mulayo wa Kristo.
3 Ngauri arali muthu a tshi humbula uri u wa ndeme ngeno e si tshithu, u khou ḓifhura.
4 Fhedzi muṅwe na muṅwe kha ṱolisise mishumo yawe, nga zwenezwo u ḓo vha na tshiitisi tsha u takala ene muṋe, a sa ḓivhambedzi na muṅwe muthu.
5 Ngauri muṅwe na muṅwe u ḓo hwala muhwalo wawe.
6 Zwiṅwe hafhu, muṅwe na muṅwe ane a khou funzwa fhungo a kovhele ane a mu funza zwithu zwoṱhe zwivhuya.
7 Ni songo fhurwa: Mudzimu ni nga si mu fhure. Ngauri tshiṅwe na tshiṅwe tshine muthu a zwala u ḓo kaṋa tshenetsho;
8 ngauri ane a zwala ṋamani yawe u ḓo kaṋa u sina zwi tshi bva kha ṋama, fhedzi ane a zwala kha muya u ḓo kaṋa vhutshilo vhu sa fheli zwi tshi bva kha muya.
9 Nga zwenezwo, ri songo litsha u ita zwo lugaho, ngauri nga tshifhinga tsho teaho ri ḓo kaṋa arali ri sa neti.
10 Ngauralo, samusi ri na tshibuli, kha ri itele vhathu vhoṱhe zwivhuya, fhedzi zwihuluhulu vhane vha vha na lutendo lu fanaho na lwashu.
11 Vhonani vhuhulwane ha maḽeḓere e nda ni ṅwalela nga tshanḓa tshanga!
12 Vhoṱhe vhane vha ni kombetshedza u fumba ndi vhane vha ṱoḓa u takalelwa nga vhathu, fhedzi vha ita zwenezwi uri vha iledze u tovholelwa danda ḽa tshengedzo ḽa Kristo Yesu.
13 Ngauri vhane vha fumbiswa a vha tevhedzi Mulayo vhone vhaṋe, fhedzi vha ṱoḓa inwi ni tshi fumbiswa uri vha wane tshiitisi tsha u zuwa nga inwi.
14 Fhedzi a thi ṱoḓi u zuwa, nga nnḓa ha u zuwa nga ha danda ḽa tshengedzo ḽa Murena washu Yesu Kristo, we nga ene shango ḽa ombelelwa nṋe, nahone nṋe nda ombelelwa shango.
15 Ngauri u fumba kana u sa fumba a si zwa ndeme, fhedzi zwa ndeme ndi tshivhumbwa tshiswa.
16 Ngavhe vhoṱhe vhane vha tshila u tendelana na wonoyo mulayo wa vhuḓifari vha tshi vha na mulalo na khathutshelo, na kha Isiraele wa Mudzimu.
17 Zwino ndi songo tsha dinwa nga muthu, ngauri ndi na mavhadzi ane a nṱalula sa mulanda wa Yesu.
18 Vhahashu, vhuthu vhuhulu ha Murena washu Yesu Kristo vhu vhe na mavhonele aṋu avhuḓi ane na a sumbedza. Amen.
