Vhaheberu 1:1-14
1 Mudzimu o amba kale-kale na vhomakhulukuku washu kha zwiitea zwinzhi nga nḓila nnzhi a tshi shumisa vhaporofita.
2 Huno vhufheloni ha enea maḓuvha o amba na riṋe a tshi shumisa Murwa wawe, we a mu vhea uri a vhe muḽaifa wa zwithu zwoṱhe, we a ita maitele a zwithu a tshi shumisa ene.
3 Ndi ene ane a sumbedza vhugala ha Mudzimu na tshifanyiso tsha zwine a vha zwone, nahone o ita uri zwithu zwoṱhe zwi tshile nga ipfi ḽa maanḓa awe; musi o no ri ṱanzwa zwivhi zwashu o ya a dzula tshanḓani tsha wa Vhugala ngei ṱaḓulu-ṱaḓulu.
4 A mbo ḓi vha a fhiraho vharuṅwa, lwe a wana ifa ḽa dzina ḽavhuḓi ḽi fhiraho ḽavho.
5 Sa tsumbo, o no vhuya a amba na ufhio wa vharuṅwa a ri: “U murwa wanga; ndi khotsi au ṋamusi”? Nahone a dovha a ri: “Nṋe ndi ḓo vha khotsi awe, ene a vha murwa wanga”?
6 Musi a tshi dovha a ḓisa Tanzhe ḽawe kha ḽifhasi, o ri: “Vharuṅwa vhoṱhe vha Mudzimu nga vha mu gwadamele.”
7 U dovha a amba nga ha vharuṅwa a ri: “Vharuṅwa vhawe u vha ita zwivhumbwa zwa muya, nahone vhaḓinḓa vhawe u vha ita khavhu dza mulilo.”
8 Fhedzi a tshi amba nga ha Murwa wawe u ri: “Mudzimu ndi khuluṋoni yau lini na lini, nahone lubaḓa lwa muvhuso wau ndi lubaḓa lwa u luga.
9 Wo funa zwivhuya, wa vhenga vhutshinyi. Ndi zwone zwe Mudzimu, ane a vha Mudzimu wau, o u ḓodza nga mapfura, a ita uri u takale zwihulu u fhira vhavhusi nga iwe.”
10 A dovha a ri: “Iwe Murena, ndi iwe we mathomoni wa thea mutheo wa ḽifhasi ḽone ḽiṋe, nahone maṱaḓulu ndi mishumo ya zwanḓa zwau.
11 Zwenezwo zwi ḓo fhela, fhedzi iwe u ḓo dzula u hone; nahone vhoṱhe vha ḓo ṱahala u fana na tshiambaro,
12 nahone u ḓo vha peta u fana na nguvho, u fana na tshiambaro tsha nga nnḓa; vha ḓo shandulwa, fhedzi u ḓo dzula wo ralo, nahone miṅwaha yau a i nga ḓo vhuya ya fhela.”
13 Fhedzi o no vhuya a amba na ufhio wa vharuṅwa a ri: “Dzula thungo ya tshanḓa tshanga tsha u ḽa, u vhuya u swika ndi tshi vhea maswina au sa vhukando ha milenzhe yau”?
14 Naa vhoṱhe a si zwivhumbwa zwa muya zwa u ita tshumelo khethwa, vho rumiwaho u shumela vhane vha ḓo tshidzwa?
