Vhaheberu 10:1-39
10 Samusi Mulayo u na murunzi wa zwithu zwavhuḓi zwine zwa khou ḓa, fhedzi u si zwenezwo zwithu, vhathu vha nga si vhuye vha kona u ita uri vhane vha ya ha Mudzimu vha vhe vho fhelelaho nga zwiṱhavhelo zwi fanaho zwine vha bvela phanḓa vha tshi zwi ṋekedza ṅwaha muṅwe na muṅwe.
2 Arali zwi vhe zwo ralo, naa ho vha hu sa ḓo litshwa u ṋekedzwa zwiṱhavhelo? Ngauri vhane vha ita tshumelo khethwa vho ṱanzwiwaho luthihi tshoṱhe vho vha vha sa ḓo vha na luvalo lune lwa ḓivhona mulandu wa zwivhi na kathihi.
3 Zwo fhambanaho na zwenezwo, zwiṱhavhelo zwenezwi zwo vha zwi tshi vha humbudza zwivhi ṅwaha muṅwe na muṅwe,
4 ngauri a zwi konadzei uri malofha a dzimboho na a dzimbudzi a fhelise zwivhi.
5 Musi a tshi ḓa shangoni o ri: “‘A wo ngo ṱoḓa tshiṱhavhelo na tshipfumelelo, fhedzi wo nndugisela muvhili.
6 A wo ngo takalela zwipfumelelo zwoṱhe zwa u fhiswa na tshipfumelelo tsha tshivhi.’
7 Nda mbo ri, ‘Ndo ḓa (ho ṅwalwa nga ha nṋe kha mupombo wa bugu) u ita zwine wa zwi funa, Iwe Mudzimu.’”
8 Musi o no thoma a ri: “A wo ngo ṱoḓa kana u takalela zwiṱhavhelo na zwipfumelelo, zwipfumelelo zwoṱhe zwa u fhiswa na tshipfumelelo tsha tshivhi”—zwiṱhavhelo zwine zwa ṋekedzwa u ya nga Mulayo—
9 a dovha a ri: “Ndo ḓa u ita zwine wa zwi funa.” O fhelisa zwa u thoma uri a khwaṱhise zwa vhuvhili.
10 Nga u amba uri “zwine wa zwi funa” ro itwa vhakhethwa nga u ṋekedzwa ha muvhili wa Yesu Kristo lwa tshoṱhe.
11 Zwiṅwe hafhu, tshifhe muṅwe na muṅwe o vha a tshi ima ḓuvha ḽiṅwe na ḽiṅwe uri a shume na u ṋekedza zwiṱhavhelo zwi fanaho lunzhi, zwe zwa vha zwi sa koni u fhelisa tshoṱhe zwivhi.
12 Fhedzi onoyu muthu o ṋekedza tshiṱhavhelo tshithihi a tshi itela zwivhi lwa tshoṱhe nahone a dzula thungo ya tshanḓa tsha u ḽa tsha Mudzimu,
13 u bva zwenezwo a lindela u swika maswina awe a tshi vhewa sa vhukando ha milenzhe yawe.
14 Ngauri nga u ṋekedza tshiṱhavhelo tshithihi o ita uri vhane vha itwa vhakhethwa vha vhe vho fhelelaho lwa tshoṱhe.
15 Zwiṅwe hafhu, muya mukhethwa u dovha wa ri ṱanzielela, ngauri nga murahu wo ri:
16 “‘Hoyu ndi mulanga une nda ḓo u vhofha navho nga murahu ha eneo maḓuvha,’ Yehova u ralo. ‘Ndi ḓo vhea milayo yanga mbiluni dzavho, nahone ndi ḓo i ṅwala mihumbuloni yavho,’”
17 nga murahu a ri: “A thi tsha ḓo vhuya nda humbula zwivhi zwavho na mishumo yavho ya u pfuka mulayo.”
18 He zwivhi zwa hangwelwa, a hu tsha ṱoḓea uri hu ṋekedzwe tshipfumelelo tsha tshivhi.
19 Nga zwenezwo, vhahashu, vhunga ri na tshivhindi tsha u dzhena nḓilani i yaho fhethu hukhethwa nga malofha a Yesu,
20 e a ri vulela nḓila ntswa na i tshilaho nga u pfuka labi ḽo tsiraho, ḽine ḽa vha ṋama yawe,
21 vhunga ri na tshifhe muhulu wa nnḓu ya Mudzimu,
22 kha ri ye nga mbilu yoṱhe ri na lutendo lwo fhelelaho, mbilu dzashu dzo ṱanzwiwa uri dzi si vhe na luvalo luvhi nga u shashiwa nahone mivhili yashu yo ṱanzwiwa nga maḓi o kunaho.
23 Kha ri bvele phanḓa nga ho khwaṱhaho ri tshi ḓivhadza fulufhelo ḽashu ri sa timatimi, ngauri we a fulufhedzisa u a fulufhedzea.
24 Kha ri ṱhogomelane uri ri ṱuṱuwedzane lufunoni na kha mishumo mivhuya,
25 ri songo litsha u kuvhangana nga tshashu, samusi vhaṅwe vho ḓowela u ita nga u ralo, fhedzi ri ṱuṱuwedzane, zwihuluhulu samusi ni tshi zwi vhona uri ḓuvha ḽi khou sendela.
26 Arali ri tshi ita tshivhi nga khole musi ro no vha na nḓivho yo teaho ya ngoho, a hu tsheena tshiṅwe tshiṱhavhelo tsha zwivhi zwashu,
27 fhedzi tsho salaho ndi u lindela khaṱulo i ofhisaho na u duga ha mbiti dzine dza ḓo lozwa vhane vha pikisa.
28 Ane a nyadza mulayo wa Mushe ha pfelwi vhuṱungu musi a tshi vhulahwa, arali hu na vhuṱanzi ha vhavhili kana vhararu.
29 Ni humbula uri muthu we a kandekanya Murwa wa Mudzimu, na u nyadza malofha a mulanga e a itwa ngao uri a vhe mukhethwa, na we a sema muya wa vhuthu vhuhulu, u ḓo pfiswa vhuṱungu lungafhani?
30 Ngauri ri a ḓivha we a ri: “Ndifhedzo ndi yanga, ndi ḓo lifhedza”; a dovha a ri: “Yehova u ḓo haṱula vhathu vhawe.”
31 Zwi a ofhisa u wela zwanḓani zwa Mudzimu a tshilaho.
32 Naho zwo ralo, dzulani ni tshi humbula maḓuvha o fhiraho, a musi no no vhonetshelwa, no konḓelela milingoni mihulu.
33 Nga zwiṅwe zwifhinga no semiwa khagala na u tambudzwa, nga zwiṅwe zwifhinga na ima na vhe vha vha vho sedzana na zwenezwo.
34 Ngauri no pfela vhuṱungu vha re dzhele nahone no takala musi ni tshi dzhielwa thundu dzaṋu, ni tshi ḓivha uri ni na thundu dza khwine na dzine dza ḓo dzula dzi hone.
35 Nga zwenezwo, ni songo laṱa mbofholowo yaṋu ya u amba, ine ya ḓo lambedzwa zwihulu.
36 Ngauri zwi a ṱoḓea uri ni konḓelele, uri musi no no ita zwine Mudzimu a zwi funa, ni wane zwe a fulufhedzisa.
37 Ngauri ho sala “tshifhinga tshiṱuku-ṱuku,” “uri ane a khou ḓa a swike nahone ha nga lengi.”
38 “Fhedzi o lugaho wanga u ḓo tshila zwi tshi itiswa nga lutendo,” nahone “arali a humela murahu, a thi nga mu takaleli.”
39 Huno riṋe a ri mufuda wa u humela murahu, zwine zwa isa ndozwoni, fhedzi ri na lutendo, lune lwa ḓo ita uri ri tshile.
