Vhaheberu 11:1-40
11 Lutendo ndi u lavhelela nga ho khwaṱhaho zwe zwa fulufhelwa, ndi u sumbedza u vha na vhuṱanzi kha zwithu zwi sa vhonali.
2 Vhathu vha zwifhingani zwa kale vho ṱanzielelwa nga nṱhani halwo.
3 Nga lutendo ri vhona uri maitele a zwithu o vha o dzudzanywa nga ipfi ḽa Mudzimu, zwine zwa vhonala zwo vha hone zwi tshi bva kha zwithu zwi sa vhonali.
4 Nga lutendo Abele o ṋekedza Mudzimu tshiṱhavhelo tshi fhiraho tsha Kaini, nahone nga lwonolwo lutendo o ṱanzielwa uri o luga, ngauri Mudzimu o ṱanziela a tshi ṱhogomela zwifhiwa zwawe; naho o fa, nga lutendo lwawe u kha ḓi amba.
5 Nga lutendo Henoxe o ṱuwiswa a si tsha vhona lufu, hu si tsha ḓivhea hune a vha hone ngauri Mudzimu o vha o mu ṱuwisa; fhedzi musi a sa athu ṱuwiswa ho ṱanzielwa uri o takadza nga maanḓa Mudzimu.
6 Zwiṅwe hafhu, u nga si kone u takadza Mudzimu arali u si na lutendo, ngauri ane a ya khae u fanela u tenda uri u hone na uri u lambedza vhane vha mu ṱoḓa zwi tshi bva mbiluni.
7 Nga lutendo Noaxe, musi o no ṋewa tsevho i bvaho ha Mudzimu ya zwithu zwe zwa vha zwi sa athu vhonwa, o sumbedza uri u ofha Mudzimu nahone a fhaṱa gungwa uri a tshidze muṱa wawe; nga lwonolwo lutendo a vhona shango mulandu, a ḽa ifa ḽa u luga ḽe ḽa bveledzwa nga u vha na lutendo.
8 Nga lutendo Abrahamu musi a tshi vhidzwa, o thetshelesa a pfulutshela fhethu he a vha a tshi ḓo wana hone ifa; a pfuluwa, naho o vha a sa ḓivhi he a vha a tshi khou ya hone.
9 Nga lutendo o dzula sa mutsinda kha ḽeneḽo shango ḽo fulufhedziswaho zwa nga u shangoni ḽi sili, nahone a dzula madenndeni na Isaka na Yakobo, vhe vha vha maḽaifa nae kha ḽeneḽo fulufhedziso.
10 Ngauri o vha o lindela muḓi u re na mutheo wa vhukuma, une muoli na mufhaṱi wao a vha Mudzimu.
11 Nga lutendo na Sara o dovha a wana maanḓa a u beba ṅwana, naho tshifhinga tshawe tsha u beba tsho vha tsho no fhira, samusi o dzhia we a mu fulufhedzisa a tshi fulufhedzea.
12 Nga tshenetshi tshiitisi, nga muthu muthihi, we a vha a tshi nga o fa, ho bebwa vhana vhane nga vhunzhi vha nga ṋaledzi dza ṱaḓulu nahone vha sa vhalei vhunga muṱavha u re khunzi-khunzini ya lwanzhe.
13 Vhoṱhe vho fa vhe na lutendo, naho vha songo vhona u ḓadzea ha mafulufhedziso, fhedzi vho a vhona a tshee kule nahone vha a ṱanganedza, vha ḓivhadza khagala uri vho vha vhe vhatsinda na vhadzulapo vha tshifhinganyana shangoni.
14 Ngauri vhane vha amba nga yeneyo nḓila vho zwi sumbedza uri vha khou ṱoḓa fhethu hune ha vha havho zwi tshi bva mbiluni.
15 Naho zwo ralo, arali vha dzule vha tshi humbula nga ha fhethu he vha pfuluwa hone, vho vha vha tshi ḓo vha vho wana tshibuli tsha u humela.
16 Huno vho vha vha tshi khou ṱoḓa fhethu ha khwine, hune ha vha ha ṱaḓulu. Naho zwo ralo, Mudzimu ho ngo farwa nga ṱhoni vha tshi vhidzwa nga dzina ḽawe, ngauri o vha o vha lugiselela muḓi.
17 Nga lutendo Abrahamu, musi a tshi lingwa, zwo nga o ṋekedza Isaka uri a vhe tshiṱhavhelo; muthu we a ṱanganedza mafulufhedziso o takala o lingedza u ṋekedza ṅwana wawe muthihi fhedzi sa tshiṱhavhelo,
18 naho o vhudzwa uri: “Ine ya ḓo pfi ‘mbeu yau’ i ḓo vha nga Isaka.”
19 Fhedzi o humbula uri Mudzimu o vha a tshi nga kona u mu vusa na lufuni; nahone a dovha a mu wana nga nḓila ya lwa pfanyisedzo.
20 Nga lutendo na Isaka o dovha a fhaṱutshedza Yakobo na Esau malugana na zwithu zwe zwa vha zwi tshi ḓo ḓa.
21 Nga lutendo Yakobo, musi e tsini na u fa, o fhaṱutshedza murwa muṅwe na muṅwe wa Yosefa nahone a rabela o gogoḓela lubaḓa lwawe.
22 Nga lutendo Yosefa, musi e tsini na u fa, o amba nga ha u pfuluwa ha vharwa vha Isiraele; nahone a vha ṋea ndaela malugana na mbulungo* yawe.
23 Nga lutendo musi Mushe a tshi kha ḓi bva u bebwa, vhabebi vhawe vho mu dzumba miṅwedzi miraru, ngauri vho vhona uri onoyo ṅwana o vha o naka nahone a vho ngo ofha ndaela ya khosi.
24 Nga lutendo Mushe, musi o no aluwa, o hana u vhidzwa murwa wa ṅwananyana wa Farao,
25 a nanga u tambula na vhathu vha Mudzimu nṱhani ha u ḓiphiṋa nga tshivhi lwa tshifhinganyana,
26 ngauri o dzhia u nyadzwa ha Kristo sa lupfumo lu fhiraho madzanga a Egipita; ngauri o vha o lavhelela u ṋewa malamba.
27 Nga lutendo o pfuluwa Egipita, fhedzi a sa ofhi mbiti dza khosi, ngauri o bvela phanḓa o khwaṱha a tshi nga u khou vhona ane A si vhonale.
28 Nga lutendo o pembelela paseka na u shashiwa nga malofha, uri mulozwi a si huvhadze matanzhe avho.
29 Nga lutendo vho pfuka Lwanzhe Lutswuku zwa tou nga vha khou kanda shango ḽo omaho, fhedzi musi Vhaegipita vha tshi lingedza u pfuka, vho mbo ḓi kumbiwa.
30 Nga lutendo mbondo dza Yeriko dzo mbo ḓi wa musi dzo moniwa maḓuvha a sumbe.
31 Nga lutendo Rahaba wa phombwe ho ngo lozwiwa na vhe vha vha vha sa thetshelesi ngauri o ṱanganedza dziṱholi nga mulalo.
32 Ndi zwifhio zwiṅwe zwine nda nga zwi amba? Ngauri tshifhinga a tshi tsha ntendela ndi tshi anetshela nga ha Gidioni, Baraka, Simisoni, Yefeta, Davida khathihi na Samuele na vhaṅwe vhaporofita.
33 Nga lutendo vha kunda mivhuso, vha ita zwo lugaho, vha wana mafulufhedziso, vha thivha milomo ya dzindau,
34 vha dzima maanḓa a mulilo, vha ponyoka vhuhali ha banga, vha tshi shaya nungo vha ṋewa nungo, vha vha vhahali nndwani, vha kunda mmbi dze dza vha dzi tshi khou vha vutshela.
35 Vhafumakadzi vho ṱanganedza vhafu vhavho nga mvuwo; fhedzi vhaṅwe vhanna vho tambudzwa ngauri a vho ngo tenda u vhofhololwa nga tshiṅwe tshirengululi, uri vha wane mvuwo ya khwine.
36 Vhaṅwe vho lingwa nga u hoiwa na nga u rwiwa, zwa tou ṋaṋa musi vha tshi vhofhiwa nga dzingeḓane na u valelwa dzidzhele.
37 Vho kanḓwa nga matombo, vho lingwa, vho tshetshekanywa, vho vhulahwa nga banga, vho vha vha tshi tshimbila vho ambara mikumba ya dzinngu, ya dzimbudzi, ngeno vha tshi shaya, vhe maṱunguni, vha tshi farwa luvhi;
38 nahone shango ḽo vha ḽi songo vha tea. Vho mona-mona masogani na dzithavhani na mapakoni na milindini ya ḽifhasi.
39 Naho vhenevho vhoṱhe vho ṱanzielwa zwavhuḓi nga nṱhani ha lutendo lwavho, a vho ngo wana zwe vha fulufhedziswa,
40 samusi Mudzimu o vha o dzula o vhona zwithu zwa khwine malugana na riṋe, uri vha itwe vho fhelelaho khathihi na riṋe.
Ṱhaluso dzi re magumoni a siaṱari
^ Ṱhalutshedzelo ya ipfi nga ipfi i ri “marambo.”
