Vhaheberu 12:1-29
12 Ngauralo-ha, samusi ri na gole ḽingafha ḽa ṱhanzi dzo ri tangaho, kha ri laṱe na mihwalo yoṱhe na tshivhi tshine tsha ri piringedza nga hu leluwaho, ri gidime mbambe ye ra vhetshelwa yone nga u konḓelela,
2 musi ro livhisa ṱhogomelo kha Murangaphanḓa Muhulwane na Muvuledzi wa lutendo lwashu, Yesu. Nga nṱhani ha dakalo ḽe a vha o vhetshelwa ḽone, o konḓelela danda ḽa tshengedzo, a si londe musi a tshi shoniswa, nahone o dzula thungo ya tshanḓa tsha u ḽa tsha khuluṋoni ya Mudzimu.
3 Vhukuma, ṱhogomelani nga vhuronwane we a konḓelela musi a tshi semiwa nga vhaitazwivhi vhe vha vha vha tshi khou ḓihuvhadza vhone vhaṋe, hu u itela uri ni si nete na u kulea nungo.
4 Kha u lwa haṋu na tshenetsho tshivhi, a ni athu lwa natsho u swika malofha aṋu a tshi shululwa,
5 fhedzi no hangwa tshoṱhe ṱhuṱhuwedzo ine ya amba na inwi sa vharwa, ine ya ri: “Murwa wanga, u songo nyadza ndayo i bvaho ha Yehova, kana wa kulea nungo musi a tshi u khakhulula;
6 ngauri Yehova u laya ane a mu funa; zwi re zwone ndi uri u rwa muṅwe na muṅwe ane a mu dzhia sa murwa.”
7 Konḓelelani nahone ni dzhie zwenezwo sa iṅwe nḓila ya u laiwa. Mudzimu u khou ni fara sa vharwa vhawe. Ndi murwa-ḓe ane khotsi awe a si mu laye?
8 Fhedzi arali ni songo wana yeneyo ndayo, no vha ni tshi ḓo vha ni vhana vha si vha mulayoni, nahone ni si vharwa.
9 Zwiṅwe hafhu, vhokhotsi ashu vha ṋama vho vha vha tshi dzulela u ri laya, nahone ro vha ri tshi vha ṱhonifha. Ri nga kundwa hani u ḓiṱukufhadzela Khotsi a vhutshilo hashu ha lwa muya nga u ḓifunela uri ri kone u tshila?
10 Ngauri vho ri laya lwa tshifhinganyana vha tshi tevhedza zwe vha vha vha tshi vhona zwo luga, fhedzi ene u ita nga u ralo uri ri vhuyelwe, uri ri vhe vhakhethwa u fana nae.
11 Ndi ngoho uri a hu na ndayo ine ya takadza musi i tshi ṋewa nga tshenetsho tshifhinga, fhedzi i a vhavha; huno nga murahu i bveledza mutshelo wa mulalo une wa vha u luga kha vhe vha gudiswa ngayo.
12 Nga zwenezwo, khwaṱhisani zwanḓa na magona a si na nungo,
13 ni dzule ni tshi lugisela milenzhe yaṋu nḓila, uri o huvhalaho a si ṋaṋe u huvhala, fhedzi a fhole.
14 Tovholani mulalo na vhathu vhoṱhe, na vhukhethwa vhune arali muthu a si naho a nga si kone u vhona Murena.
15 Ni ṱhogomele uri hu si vhe na ane a kundwa u wana vhuthu vhuhulu ha Mudzimu na uri hu si mele mudzi u re na mulimo wa vusa khakhathi na uri vhanzhi vha si tshikafhadzwe ngawo;
16 nahone vhukati haṋu hu songo vha na phombwe kana naho e nnyi a sa dzhieliho nṱha zwithu zwikhethwa, u fana na Esau, we a rengisa ndugelo ya vhutanzhe nga ndilo nthihi ya zwiḽiwa.
17 Ni a zwi ḓivha uri nga murahu a tshi vho ṱoḓa u ḽa ifa ḽa phaṱhutshedzo o landulwa, naho o lila ho ngo kona u shandula yeneyo phetho.
18 Ngauri a no ngo sendela tsini ha thavha i dugaho mulilo, i re na gole ḽitswu na swiswi na ḓumbu ḽihulu,
19 na u lila ha phalaphala na u pfala ha maipfi, musi vhathu vha tshi pfa zwenezwo vha humbela uri vha songo tsha dovha vha vhudzwa zwiṅwe.
20 Ngauri a vho ngo kona u konḓelela ndaela ine ya ri: “Arali tshifuwo tsha kanda yeneyo thavha, tshi fanela u kanḓwa nga matombo.”
21 Zwiṅwe hafhu, zwe vha zwi vhona zwo vha zwi tshi ofhisa lwe Mushe a ri: “Ndi khou ofha nahone ndi khou tetemela.”
22 Fhedzi inwi no sendela Thavhani ya Tsioni na muḓini wa Mudzimu a tshilaho, Yerusalema wa ṱaḓulu, na mavhuthu a vharuṅwa,
23 vhe guvhanganoni, na tshivhidzoni tsha matanzhe o ṅwaliswaho ṱaḓulu, na Mudzimu ane a vha Muhaṱuli wa vhoṱhe, na vhutshilo ha lwa muya ha vho lugaho vhe vha itwa vho fhelelaho,
24 na Yesu mupfumedzanyi wa mulanga muswa, na u shashiwa ha malofha, ane a amba khwine u fhira malofha a Abele.
25 Ni ite vhungoho ha uri ni thetshelesa ane a khou amba. Ngauri vhe vha kundwa u thetshelesa we a vha a tshi khou ṋea tsevho ya Mudzimu kha ḽifhasi a vho ngo ponyoka, na riṋe ri nga si ponyoke arali ra furalela ane a amba e ṱaḓulu.
26 Nga tshenetsho tshifhinga ipfi ḽawe ḽo dzinginyisa ḽifhasi, fhedzi zwino o fulufhedzisa a ri: “Ndi ḓo dovha nda dzinginyisa ḽifhasi khathihi na ḽiṱaḓulu.”
27 Huno mubulo une wa ri “Ndi ḓo dovha” u sumbedza u bviswa ha zwithu zwo dzinginyiswaho, zwine zwa vha zwithu zwo itwaho—uri zwithu zwi songo dzinginyiswaho zwi sale.
28 Ngauralo, samusi ri tshi ḓo wana muvhuso une wa sa ḓo dzinginyiswa, kha ri bvele phanḓa ri tshi takalela vhuthu vhuhulu, vhune ngaho ra ḓo kona u itela Mudzimu tshumelo khethwa nga u mu ofha na u mu hulisa.
29 Ngauri Mudzimu washu u dovha a vha mulilo u lozwaho.
