Vhaheberu 13:1-25
13 Bvelani phanḓa ni tshi funana sa vharathu na vhakomana.
2 Ni songo hangwa u ṱanganedza vhaeni, ngauri musi vhaṅwe vha tshi ita nga u ralo, vho ṱanganedza vharuṅwa vha sa zwi ḓivhi.
3 Ni dzule ni tshi humbula vha re dzhele zwa tou nga na inwi no valelwa navho, na vhane vha tambudzwa, samusi na inwi ni muvhilini u fanaho na wavho.*
4 Mbingano kha i huliswe nga vhoṱhe, vhulalo ha mbingano vhu songo vha na tshika,* ngauri Mudzimu u ḓo haṱula dziphombwe na vhadzia-vhuṱonḓolo.
5 Nḓila ine na tshila ngayo i songo vha ya u funa tshelede, ni fushee nga zwine zwa vha hone. Ngauri o ri: “Ndi nga si vhuye nda u ṱutshela nahone ndi nga si vhuye nda u laṱa.”
6 U itela uri ri vhe na tshivhindi nahone ri ri: “Yehova ndi muthusi wanga; a thi nga ofhi. Muthu a nga nyita’ni?”
7 Ni humbule vhane vha ranga phanḓa vhukati haṋu, vhe vha ni vhudza ipfi ḽa Mudzimu, nahone musi ni tshi elekanya nga ha nḓila ye vhutshilo havho ha vha na mvelelo dzavhuḓi ngayo, ni edzise lutendo lwavho.
8 Yesu Kristo u ḓi dzula o ralo mulovha na ṋamusi, na nga hu sa fheli.
9 Ni songo xedzwa nga pfunzo dzo fhamba-fhambanaho na dzi sili; ngauri ndi khwine mbilu i tshi khwaṱhiswa nga vhuthu vhuhulu nṱhani ha u khwaṱhiswa nga zwiḽiwa, zwine zwi si vhuyedze vhane vha zwi ḽa.
10 Ri na aletare ine vhane vha ita tshumelo khethwa denndeni vha si vhe na maanḓa a u ḽa zwi re khayo.
11 Ngauri mitumbu ya zwipuka zwine malofha azwo a iswa fhethu hukhethwa uri a vhe tshipfumelelo tsha tshivhi nga tshifhe muhulu, i a fhiswa nnḓa ha mishasha.
12 Nga zwenezwo, na Yesu o tambudzwa nnḓa ha khoro uri vhathu vha vhe vhakhethwa nga malofha awe.
13 Nga zwenezwo, kha ri ye khae nnḓa ha mishasha, ro hwala u nyadzwa he a hu konḓelela,
14 ngauri fhano a ri na muḓi une wa ḓo bvela phanḓa u hone, fhedzi ri ṱoḓa nga mbilu yoṱhe une wa khou ḓa.
15 Kha ri dzule ri tshi ṋekedza Mudzimu tshiṱhavhelo tsha thendo ngae, tshine tsha vha tshiaṋwiwa tsha milomo yashu, ine ya ḓivhadza dzina ḽawe khagala.
16 Zwiṅwe hafhu, ni songo hangwa u ita zwivhuya na u kovhela vhaṅwe, ngauri Mudzimu u takadzwa nga maanḓa nga zwiṱhavhelo zwo raloho.
17 Ni thetshelese vhane vha ranga phanḓa vhukati haṋu nahone ni ḓiṱukufhadze, ngauri vha linda vhutshilo haṋu samusi vhe vhone vhane vha ḓo ḓifhindulela; uri vha ite zwenezwi vho takala vha songo ṱungufhala, ngauri zwenezwo zwi ḓo ni vhaisa.
18 Bvelani phanḓa ni tshi ri rabelela, ngauri ri fulufhela uri ri na luvalo lwo ṱambaho, samusi ri tshi tama u ḓifara nga nḓila i fulufhedzeaho kha zwithu zwoṱhe.
19 Fhedzi zwihuluhulu ndi a ni ṱuṱuwedza uri ni rabele uri ndi dovhe ndi ḓe ha inwi hu si kale.
20 Mudzimu wa mulalo, we a vusa vhafuni mulisa wa nngu muhulwane, Murena washu Yesu, nga malofha a mulanga wa lini na lini,
21 nga a ni shomedze nga zwithu zwoṱhe zwavhuḓi uri ni ite zwine a funa, o shumisa Yesu Kristo uri ri ite zwine zwa mu takadza vhukuma; ene o tewaho nga u rendwa lini na lini. Amen.
22 Vhahashu, zwino ndi a ni ṱuṱuwedza uri ni thetshelese ḽeneḽi ipfi ḽi ṱuṱuwedzaho ni sa fheli mbilu, ngauri ndo ni ṅwalela vhurifhi nga maipfi a si gathi.
23 Ḓivhani uri wahashu Timotheo o vhofhololwa. Arali a ḓa nga u ṱavhanya, ndi ḓo ḓa nae ra ni vhona.
24 Ni lumelise vhoṱhe vhane vha ranga phanḓa vhukati haṋu na vhakhethwa vhoṱhe. Vha re ngei Italia vha a ni lumelisa.
25 Vhuthu vhuhulu nga vhu vhe na inwi noṱhe.
Ṱhaluso dzi re magumoni a siaṱari
^ “Zwa tou nga no vha ni tshi khou tambula navho.”
^ Zwenezwi zwi ambela kha vhushaka ha vhudzekani.
