Vhaheberu 2:1-18
2 Ndi ngazwo zwo ri fanela uri ri thetshelese nga vhuronwane zwe ra zwi pfa, uri ri sa ḓo pambuwa.
2 Arali ipfi ḽo ambiwaho nga vharuṅwa ḽi ḽa ngoho, na mudzia-u-pfuka mulayo muṅwe na muṅwe na a sa thetshelesi, vho pfiswa vhuṱungu u tendelana na khaṱulokwayo;
3 ri nga ponyoka hani arali ri sa londi u tshidzwa honoho huhulwane he Murena washu a thoma u hu amba nahone ra khwaṱhisedzelwa hone nga vhe vha mu pfa,
4 ngeno Mudzimu na ene o ṱanziela nga zwiga na zwithu zwi mangadzaho na mishumo ya maanḓa yo fhamba-fhambanaho na muya mukhethwa we a ri kovhela wone u ya nga hune a funa ngaho?
5 Ho ngo vhea vharuṅwa uri vha vhe vhavhusi vha ḽifhasi ḽi ḓaho ḽine ra khou amba ngaḽo.
6 Fhedzi iṅwe ṱhanzi yo zwi khwaṱhisedza huṅwe fhethu, ya ri: “Muthu u tou vha mini ane wa dzula u tshi elekanya nga hae, kana murwa-muthu ane wa mu ṱhogomela u tou vha mini?
7 Wo mu ita uri a vhe muṱuku kha vharuṅwa; wo mu ambadza khare ya vhugala na khuliso, wa mu vhea uri a vhuse mishumo ya zwanḓa zwau.
8 Zwithu zwoṱhe wo zwi vhea nga fhasi ha milenzhe yawe.” Nga u ita uri a vhuse zwithu zwoṱhe, a hu na na tshithihi tshe Mudzimu a si tshi vhee khae. Huno zwino a ri koni u vhona zwithu zwoṱhe zwe zwa vhewa nga fhasi hawe.
9 Fhedzi ri vhona uri Yesu, we a itwa uri a vhe muṱuku kha vharuṅwa, zwino o ambadzwa khare ya vhugala na khuliso nge a tambula u swika a tshi fa, uri nga vhuthu vhuhulu ha Mudzimu, a fele vhoṱhe.
10 Ngauri zwo vha zwo tea uri ene we zwithu zwoṱhe zwa vha hone nga nṱhani hawe na we zwithu zwoṱhe zwa vha hone nga ene, nga u isa vharwa vhanzhi vhugalani, a ite uri Murangaphanḓa Muhulwane a tambule. Nga yeneyo nḓila o fanelea u vha tshidza.
11 Ene ane a ita uri vhathu vha vhe vhakhethwa na vhane vha khou itwa vhakhethwa, vhoṱhe vha bva kha muthihi nahone nga tshiitisi tshenetsho ha shoni u vha vhidza “vhahashu,”
12 musi a tshi ri: “Ndi ḓo ḓivhadza dzina ḽau kha vhahashu; ndi ḓo u renda nga nyimbo ndi vhukati ha tshivhidzo.”
13 A dovha a ri: “Ndi ḓo u fulufhela.” Hafhu a ri: “Vhonani nṋe na vhana vhe Yehova a nṋea vhone.”
14 Nga zwenezwo, vhunga “vhana” vhe vhathihi nga malofha na ṋama, na ene o vha na mukovhe kha zwithu zwi fanaho, uri nga u fa hawe a fhelise Diabolo ane a vha na maanḓa a u ita uri hu vhe na lufu;
15 na uri a vhofholole vhoṱhe vhe vha vha vhe phuli dza u ofha lufu vhutshiloni havho hoṱhe.
16 Ngoho ndi ya uri ha khou thusa vharuṅwa, fhedzi u khou thusa mbeu ya Abrahamu.
17 Nga zwenezwo, o vha a tshi fanela u fana na “vhahawe” kha masia oṱhe, uri a vhe tshifhe muhulu a khathutshelaho na ane a fulufhedzea kha zwithu zwi tshimbidzanaho na Mudzimu, uri a ṋekedze tshiṱhavhelo tsha u pfumelela zwivhi zwa vhathu.
18 Samusi ene o tambudzwa musi a tshi lingwa, u a kona u thusa vhane vha khou lingwa.
