Vhaheberu 3:1-19
3 Ngauralo, vhahashu vhakhethwa, vha re na mukovhe wa u vhidzelwa ṱaḓulu, ṱhogomelani muapostola na tshifhe muhulu ane ra ṱanziela nga hae—Yesu.
2 O fulufhedzea kha We a mu vhea, vhunga na Mushe o ralo kha nnḓu yoṱhe ya Onoyo.
3 Ngauri u dzhiiwa o tewa nga u vha na vhugala vhunzhi u fhira Mushe, samusi mufhaṱi wa nnḓu a tshi rendwa u fhira yeneyo nnḓu.
4 I ngoho, nnḓu iṅwe na iṅwe i na mufhaṱi, fhedzi o fhaṱaho zwoṱhe ndi Mudzimu.
5 Samusi Mushe o vha e mulanda a fulufhedzeaho nḓuni yoṱhe ya Onoyo u itela vhuṱanzi ha zwithu zwe zwa vha zwi tshi ḓo ambiwa nga murahu,
6 na Kristo o fulufhedzea sa Murwa nḓuni ya Onoyo. Ri nnḓu ya Onoyo, arali ra farelela ro khwaṱha kha mbofholowo yashu ya u amba na fulufhelo ḽashu ḽine ra ḓikhoḓa ngaḽo u swika vhufheloni.
7 Nga zwenezwo, vhunga muya mukhethwa u tshi ri: “Ṋamusi arali na thetshelesa ipfi ḽawe,
8 ni songo rindidza mbilu dzaṋu sa zwiḽa ni tshi mu sinyusa zwihulu, nga ḓuvha ḽa u lingwa sogani,
9 musi vhomakhulukuku waṋu vha tshi nndinga, naho vho vhona mishumo yanga miṅwaha ya fuiṋa (40).
10 Ndi ngazwo ndo sinyuswa nga wonoyu murafho nahone nda ri, ‘Vha dzulela u ntshandukela mbiluni dzavho, nahone nḓila dzanga a vha dzi ḓivhi.’
11 Nga zwenezwo, nda ana ndo sinyuwa nda ri: ‘A vha nga dzheni kha vhuawelo hanga.’”
12 Vhahashu, ṱhogomelani uri hu si vhe na muthihi kha inwi ane a vha na mbilu mmbi i si na lutendo nga u ṱutshela Mudzimu a tshilaho;
13 fhedzi dzulani ni tshi ṱuṱuwedzana ḓuvha ḽiṅwe na ḽiṅwe, musi hu tshi kha ḓi pfi ndi “Ṋamusi,” uri hu si vhe na muthihi kha inwi ane a rindidzwa nga maanḓa a vhufhura a tshivhi.
14 Zwi re zwone ndi uri ri vha na mukovhe na Kristo arali ra farelela ro khwaṱha u swika vhufheloni ri na fulufhelo ḽe ra vha ri naḽo u bva mathomoni.
15 Samusi hu tshi pfi: “Ṋamusi arali na thetshelesa ipfi ḽawe, ni songo rindidza mbilu dzaṋu sa zwiḽa ni tshi mu sinyusa zwihulu.”
16 Ndi vhonnyi vhe vha pfa, fhedzi vha mu sinyusa? Naa a si vhaḽa vhoṱhe vhe Mushe a vha ranga phanḓa musi vha tshi pfuluwa Egipita?
17 Zwiṅwe hafhu, ndi vhafhio vhe vha sinyusa Mudzimu miṅwahani ya fuiṋa (40)? Naa a si vhaḽa vho itaho zwivhi, vhe zwitumbu zwavho zwa balangana sogani?
18 Ndi vhafhio vhe a vha anela uri a vha nga dzheni vhuaweloni hawe? Naa a si vhaḽa vhe vha si thetshelese?
19 Ngauralo, ri a zwi vhona uri a vho ngo kona u dzhena nge vha si vhe na lutendo.
