Vhaheberu 5:1-14
5 Muthu muṅwe na muṅwe ane a nangwa uri a vhe tshifhe muhulu u shumela vhathu kha zwithu zwi tshimbidzanaho na vhurabeli havho kha Mudzimu, uri a ṋekedze zwifhiwa na zwiṱhavhelo a tshi itela zwivhi zwavho.
2 U a kona u pfela vhuṱungu vhane vha si ḓivhe na vhatshinyi samusi na ene e na vhushayanungo,
3 nga nṱhani ha zwenezwo, u fanela uri a ṋekedze zwiṱhavhelo a tshi itela zwivhi zwawe vhunga a tshi ita nga u ralo kha zwivhi zwa vhathu.
4 Zwiṅwe hafhu, muthu ha huliswi nga u funa hawe, fhedzi u huliswa musi o vhidzwa nga Mudzimu, vhunga Aroni o vhidzwa.
5 Kristo ho ngo ḓiṋea vhugala nga u vha tshifhe muhulu, fhedzi o ṋewa vhugala nga we a amba nae a ri: “U murwa wanga; nṋe ndi khotsi au ṋamusi.”
6 Nahone huṅwe fhethu o dovha a ri: “U tshifhe lini na lini nga maitele a Melkizedeke.”
7 Tshifhingani tsha vhutshilo hawe ha kha ḽifhasi, Kristo o vha a tshi humbela na u rabela we a vha a tshi kona u mu tshidza lufuni, nga mukosi muhulu na zwililo, nahone o pfiwa nga nṱhani ha u ofha hawe Mudzimu.
8 Naho e Murwa, o guda u pfa nga nṱhani ha u tambudzwa;
9 musi o no itwa o fhelelaho kha honoho u pfa, o ṋewa vhuḓifhinduleli ha u tshidza vhoṱhe vhane vha mu thetshelesa,
10 ngauri o nangwa nga Mudzimu uri a vhe tshifhe muhulu nga maitele a Melkizedeke.
11 Ri na zwinzhi zwine ra nga zwi amba nga hae, fhedzi zwi a konḓa u ṱalutshedza ngauri a ni ṱavhanyi u pfa.
12 Naho nga tshenetshi tshifhinga no vha no fanela u vha vhagudisi, ni kha ḓi dovha na ṱoḓa muthu wa u ni funza u bva mathomoni zwithu zwa mutheo zwa maambiwa makhethwa a Mudzimu; nahone no humela murahu ni vho ṱoḓa mafhi, hu si zwiḽiwa zwo dziaho.
13 Muṅwe na muṅwe ane a bvela phanḓa a tshi nuswa mafhi ho ngo ḓowelana na ipfi ḽo lugaho, ngauri u kha ḓi vha lutshetshe.
14 Fhedzi zwiḽiwa zwo dziaho ndi zwa vhathu vho vhibvaho, vhe vha gudisa maanḓa avho a u ṱalukanya uri vha kone u khethekanya zwo lugaho na zwo khakheaho.
