Vhaheberu 6:1-20
6 Ngauralo, samusi ro no fhira kha pfunzo dza mutheo dza Kristo, kha ri bvele phanḓa ri vhe vho vhibvaho, ri si dovhe ra adza mutheo, une wa vha u rembuluwa kha mishumo yo faho, na u vha na lutendo kha Mudzimu,
2 na pfunzo ya ndovhedzo na u vhea zwanḓa, u vuswa ha vhafu na khaṱulo ya tshoṱhe.
3 Nahone zwenezwi ri ḓo zwi ita, arali nangoho Mudzimu a ri tendela.
4 Ngauri a zwi konadzei u vusulusa vhe vha vhuya vha vhonetshelwa, vhe vha thetshela tshifhiwa tsha fhedzi tshi bvaho ṱaḓulu, na vhe vha wana mukovhe wa muya mukhethwa,
5 vhe vha thetshela ipfi ḽavhuḓi ḽa Mudzimu na maanḓa a maitele a zwithu a ḓaho,
6 vha litsha pfunzo dza ngoho, ngauri vho dovha vha ombela Murwa wa Mudzimu vha tshi itela vhone vhaṋe na u mu nyadzisa nga vhathu.
7 Ngauri mavu ane a ṋukadzwa nga mvula ine kanzhi ya na nahone a medza zwimela zwine zwa vhuyedza vhe vha lima, a fhaṱutshedzwa nga Mudzimu.
8 Fhedzi arali mavu a medza mipfa na tsheṋe, ha takalelwi nahone a vha e tsini na u seṅwa; nahone mafheleloni a fhiswa.
9 Fhedzi malugana na inwi vhafunwa, ri fulufhela zwa khwine zwi tshimbidzanaho na u tshidzwa, naho ri tshi khou amba nga yeneyi nḓila.
10 Ngauri Mudzimu o luga, ha nga hangwi mushumo waṋu na lufuno lwe na lu sumbedza ni tshi itela dzina ḽawe, ngauri no shumela vhakhethwa nahone ni khou bvela phanḓa ni tshi vha shumela.
11 Fhedzi ri tama uri muṅwe na muṅwe waṋu a shume nga maanḓa u fana na u thomani uri ni vhe na fulufhelo ḽo khwaṱhaho u swika vhufheloni,
12 uri ni si vhe vhabva, fhedzi ni edzise vhe nga lutendo na u konḓelela vha ḽa ifa ḽe vha fulufhedziswa.
13 Musi Mudzimu a tshi fulufhedzisa Abrahamu, o ana nga ene muṋe vhunga ho vha hu si na muṅwe we a vha a tshi mu fhira we a vha a tshi nga ana ngae,
14 a ri: “Vhukuma ndi ḓo u fhaṱutshedza nahone nda andisa vhana vhau.”
15 Musi Abrahamu o sumbedza u sa fhela mbilu, o wana zwe a fulufhedziswa.
16 Ngauri vhathu vha ana nga ane a vha fhira, nahone u ana havho hu fhelisa u hanedzana naho hu hufhio, samusi i khwaṱhisedzo ya mulayo khavho.
17 Nga nḓila i fanaho, musi Mudzimu a tshi nanga u sumbedza zwavhuḓi maḽaifa a fulufhedziso u sa shanduka ha ndivho yawe, o mbo ḓi ana,
18 uri nga zwithu zwivhili zwi sa shanduki zwine khazwo zwi si konadzee uri Mudzimu a zwifhe, riṋe vho shavhelaho vhukhudoni ri nga ṱuṱuwedzwa nga ho khwaṱhaho uri ri farelele fulufhelo ḽi re phanḓa hashu ro khwaṱha.
19 Ri na ḽeneḽi fulufhelo ḽi ngaho thikho ya vhutshilo hashu, ḽa ngoho na ḽo khwaṱhaho, ḽi dzhenaho ngei phanḓa ha labi ḽo tsiraho,
20 he Yesu we a ri ranga phanḓa a dzhena a tshi itela riṋe, we a vha tshifhe muhulu lini na lini nga maitele a Melkizedeke.
