Vhaheberu 7:1-28
7 Ngauri onoyo Melkizedeke, khosi ya Saleme, tshifhe wa Mudzimu wa Ṱaḓulu-ṱaḓulu, o ṱanganedza Abrahamu musi a tshi bva u vhulaha mahosi na u mu fhaṱutshedza
2 nahone Abrahamu o mu ṋea tshafumi tsha zwithu zwoṱhe. Dzina ḽa Melkizedeke ḽi amba uri “Khosi ya U Luga,” nahone u dovha a vha khosi ya Saleme, zwine zwa amba uri “Khosi ya Mulalo.”
3 O vha a si na khotsi, a si na mme, a si na lushaka, a si na u ranga ha maḓuvha na u guma ha vhutshilo hawe, fhedzi o vha a tshi fana na Murwa wa Mudzimu, u dzula e tshifhe u ya nga hu sa fheli.
4 Vhonani uri onoyo munna o vha e muhulwane lungafhani nahone Abrahamu ṱhoho ya muṱa, o mu ṋea tshafumi kha zwe a thuba zwa khwine-khwine.
5 Ndi ngoho uri u ya nga Mulayo, vhane vha bva kha vharwa vha Levi vho ṋewa mushumo wa vhotshifhe na ndaela ya u kuvhanganya tshafumi kha vhathu, vhane vha vha vhahavho, naho vhenevho vho vha vhe vhaḓuhulu vha Abrahamu.
6 Fhedzi onoyo munna we a vha a sa bvi kha lushaka lwavho o ṱanganedza tshafumi tshi bvaho ha Abrahamu nahone a fhaṱutshedza we a vha o fulufhedziswa.
7 Huno a hu na ane a nga hanedza uri ane a fhaṱutshedza u fhira ane a fhaṱutshedzwa.
8 Kha ḽiṅwe sia ndi vhathu vhane vha khou fa vhane vha ṱanganedza tshafumi, fhedzi kha ḽiṅwe sia ndi muthu ane ha ṱanzielwa nga hae uri u a tshila.
9 Hu nga kha ḓi ambiwa uri na Levi, we a ṱanganedza tshafumi, o bvisa tshafumi a tshi shumisa Abrahamu,
10 ngauri o vha a tshi kha ḓi vha kha makhulukuku wawe* musi a tshi ṱangana na Melkizedeke.
11 Arali u fhelela zwo vha zwi tshi swikelelwa nga u vha muṅwe wa vhotshifhe vha Levi (ngauri zwo vha zwi tshi katelwa kha Mulayo we wa vha wo ṋewa vhathu,) huno ho vha hu tshi kha ḓi ḓo ṱoḓiwa muṅwe tshifhe wa mini ane ha ambiwa uri o vhewa nga maitele a Melkizedeke nahone hu si nga maitele a Aroni?
12 Samusi mushumo wa vhotshifhe wo shandulwa, zwi ḓo vha zwo tea uri na mulayo u shandulwe.
13 Ngauri muthu we zwenezwi zwithu zwa ambiwa nga hae u bva kha ḽiṅwe tsinde, hune ha si vhe na muthu ane a shuma kha aletare.
14 Zwi tou vha khagala uri Murena washu u bva Yuda, fhedzi Mushe ho ngo amba tshithu nga ha vhotshifhe vha bvaho kha ḽeneḽo tsinde.
15 Zwenezwi zwi bvela khagala musi hu tshi vha na muṅwe tshifhe we a vha a tshi fana na Melkizedeke,
16 we a vha tshifhe nga maanḓa a vhutshilo a sa tshinyali, hu si nga zwe zwa vha zwi tshi ṱoḓwa nga mulayo une wa ḓitika nga lushaka lune muthu a bva khalwo.
17 Ngauri ho ṱanzielwa nga hae ha pfi: “U tshifhe lini na lini nga maitele a Melkizedeke.”
18 Nga zwenezwo, ndaela ya tshifhingani tsho fhiraho yo fheliswa ngauri yo vha i si na maanḓa nahone i sa shumi.
19 Ngauri Mulayo a wo ngo vhuya wa ita uri hu vhe na tshithu na tshithihi tsho fhelelaho, fhedzi tsho vha hone nga fulufhelo ḽa khwine, ḽine ḽa ri sendedza tsini na Mudzimu.
20 Zwiṅwe hafhu, hezwo a zwo ngo itwa hu si na muano
21 (ngauri hu na vhathu vhe vha vha vhotshifhe hu songo itwa muano, fhedzi onoyu o vha tshifhe nge ha itwa muano u tshimbidzanaho nae nga We a ri: “Yehova o ana, (nahone ha ḓisoli), ‘U tshifhe lini na lini,’”)
22 Yesu ndi ene we a khwaṱhisedza mulanga wa khwine.
23 Zwiṅwe hafhu, vhanzhi vho vha vha tshi fanela u vha vhotshifhe nga u tou tevhekana ngauri lufu lwo vha thivhela uri vha bvele phanḓa nga u ralo,
24 fhedzi ngauri Yesu u bvela phanḓa a tshi tshila nga hu sa fheli, a hu na ane a mu tevhela kha u vha hawe tshifhe.
25 Nga zwenezwo, u a kona u tshidza nga ho fhelelaho vhane vha sendela tsini na Mudzimu nga ene, ngauri u ḓi dzula a tshi tshila uri a vha pfumelele.
26 Huno zwo tea uri ri vhe na tshifhe muhulu o raloho ane a fulufhedzea, a si na mulandu, a songo tshikafhadzwaho, o fhambanaho na vhaitazwivhi, o huliswaho u fhira maṱaḓulu.
27 Ha fani na vhenevho vhotshifhe vhahulu, ha tei u ṋekedza zwiṱhavhelo ḓuvha ḽiṅwe na ḽiṅwe, nga u thoma a itela zwivhi zwawe nahone nga murahu a itela vhenevho vhathu, ngauri o ita zwenezwi luthihi tshoṱhe musi a tshi ḓiṋekedza.
28 Ngauri Mulayo u vhea vhanna vha re na vhushayanungo uri vha vhe vhotshifhe vhahulu, fhedzi muano we wa itwa nga murahu ha Mulayo, u vhea Murwa, we a itwa o fhelelaho nga hu sa fheli.
Ṱhaluso dzi re magumoni a siaṱari
^ Zwine zwa amba uri “o vha a tshi fanela u bebwa uri a vhe muḓuhulu wa Abrahamu.”
