Vhaheberu 8:1-13
8 Huno mbuno khulwane ya zwine ra khou zwi amba ndi heyi: Ri na tshifhe muhulu o raloho, o dzula kha tshanḓa tsha u ḽa tsha khuluṋoni ya wa Vhugala ya ṱaḓulu,
2 ndi mulanda wa fhethu hukhethwa na wa dennde ḽa ngoho, ḽe ḽa athwa nga Yehova, hu si nga muthu.
3 Ngauri tshifhe muhulu muṅwe na muṅwe u vhewa uri a ṋekedze zwifhiwa na zwiṱhavhelo; nga zwenezwo, zwo vha zwi tshi ṱoḓea uri na onoyo a vhe na tshine a tshi ṋekedza.
4 Huno arali a vhe e kha ḽifhasi, o vha a sa ḓo vha tshifhe, samusi ho vha ho no ḓi vha na vhanna vhane vha ṋekedza zwifhiwa u ya nga Mulayo.
5 Vhenevha vhanna vha khou ita tshumelo khethwa ine ya sokou vha tsumbo na murunzi wa zwithu zwa ṱaḓulu; vhunga Mushe musi a tshi ṱoḓa u atha dennde, o ṋewa ndaela nga Mudzimu: Ngauri o ri: “U vhe na vhungoho ha uri u ita zwithu zwoṱhe u ya nga maitele azwo, e wa sumbedzwa one thavhani.”
6 Fhedzi zwino Yesu o ṋewa vhuḓinḓa havhuḓi vhu fhiraho hoṱhe, ngauri u dovha a vha mupfumedzanyi wa mulanga wa khwine musi u tshi vhambedzwa na wa kale, we wa vhewa nga lwa mulayo kha mafulufhedziso a khwine.
7 Arali mulanga wa u thoma wo vha u si na vhukhakhi, ho vha hu sa ḓo ṱoḓea wa vhuvhili.
8 Ngauri Yehova u vhona vhathu mulandu musi a tshi ri: “Hu ḓo ḓa maḓuvha ane nda ḓo vhofha mulanga muswa na nnḓu ya Isiraele na nnḓu ya Yuda.”
9 Yehova a dovha a ri: “A u nga fani na mulanga we nda u vhofha na vhomakhulukuku wavho nga ḓuvha ḽe nda vha fara nga tshanḓa uri ndi vha bvise shangoni ḽa Egipita, ngauri a vho ngo bvela phanḓa vha tshi fulufhedzea kha mulanga wanga, ngauralo nda litsha u vha ṱhogomela.”
10 “‘Ngauri hoyu ndi mulanga une nda ḓo u vhofha na nnḓu ya Isiraele nga murahu ha eneo maḓuvha,’ Yehova u ralo. ‘Ndi ḓo vhea milayo yanga mihumbuloni yavho, nahone ndi ḓo i ṅwala na mbiluni dzavho. Ndi ḓo vha Mudzimu wavho, vhone vha ḓo vha vhathu vhanga.
11 “‘Nahone muthu a nga si tsha ḓo gudisa muhura wawe na wahawe a ri: “Ḓivha Yehova!” Ngauri vhoṱhe vha ḓo nnḓivha u bva kha muṱuku u ya kha muhulwane wavho.
12 Ngauri ndi ḓo vha khathutshela kha mishumo yavho i songo lugaho, nahone a thi tsha ḓo vhuya nda humbula zwivhi zwavho.’”
13 Musi a tshi ri “mulanga muswa” ndi uri wa u ranga a u tsha ṱoḓea. Huno u si tsha ṱoḓeaho une wa vha wa kale u tsini na u ngala-ngala.
