Vhaheberu 9:1-28
9 Mulanga wa kale wo vha u na ṱhoḓea dzawo dza mulayo dza u ita tshumelo khethwa na fhethu hawo hukhethwa kha ḽifhasi.
2 Ngauri ho vha ho athwa dennde ḽi re na lufhera lwa u thoma lwe lwa vha lu na tshiṱomambone na ṱafula na zwinkwa zwo vhewaho henefho; nahone ho vha hu tshi pfi “Fhethu Hukhethwa.”
3 Fhedzi nga murahu ha labi ḽa u tsira ḽa vhuvhili ho vha hu na lufhera lwa dennde lune lwa vhidzwa “Fhethu Hukhethwa-khethwa.”
4 Henefho ho vha hu na mudzio wa musuku na mbulungelo ya mulanga yo shatwaho yoṱhe nga musuku, ha dovha ha vha na mudzio wa musuku u re na mana na lubaḓa lwa Aroni lwe lwa ṱuma lurere na mbaba dza matombo dza mulanga;
5 fhedzi nga nṱha hayo ho vha hu na vhakerube vha vhugala vho tsira tshitibo tsha u pfumedzanya. Fhedzi zwino a si tshifhinga tsha u amba nga vhuḓalo nga ha zwenezwi zwithu.
6 Musi zwenezwi zwithu zwo no dzudzanywa nga yeneyo nḓila, vhotshifhe vha dzhena lufherani lwa u thoma lwa dennde tshifhinga tshoṱhe uri vha ite tshumelo khethwa;
7 fhedzi tshifhe muhulu o vha a tshi dzhena e eṱhe luthihi nga ṅwaha lufherani lwa vhuvhili, e na malofha, ane a a ṋekedza a tshi itela ene muṋe na zwivhi zwe vhathu vha zwi ita vha sa zwi ḓivhi.
8 Nga zwenezwo, muya mukhethwa wo zwi bvisela khagala uri nḓila ya u dzhena fhethu hukhethwa yo vha i sa athu dzumbululwa samusi ho vha hu na dennde ḽa u thoma.
9 Ḽeneḽo dennde ḽi fanyisela tshenetshi tshifhinga, nahone hu a ṋekedzwa zwifhiwa na zwiṱhavhelo u tendelana na yeneyo ndugiselelo. Naho zwo ralo, zwenezwo zwithu a zwi koni u ita uri muthu ane a khou ita tshumelo khethwa a vhe o fhelelaho kha luvalo lwawe.
10 Zwi tshimbidzana na zwiḽiwa na zwinwiwa na ndovhedzo dzo fhamba-fhambanaho. Ho vha hu ṱhoḓea dza mulayo dzi tshimbidzanaho na muvhili nahone dzo vha dzo vhewa u swika tshifhinga tsho vhewaho tsha u lugisa zwithu.
11 Naho zwo ralo, musi Kristo a tshi ḓa sa tshifhe muhulu wa zwithu zwavhuḓi zwe zwa vha zwo no itea, o fhira nga denndeni ḽihulu na ḽo fhelelaho ḽi songo itwaho nga zwanḓa, zwine zwa amba uri a si ḽa tsiko ino.
12 Ho ngo dzhena fhethu hukhethwa e na malofha a dzimbudzi na a dzimboho, fhedzi o dzhena nga malofha awe luthihi fhedzi, nahone a ri tshidza nga hu sa fheli.
13 Ngauri arali malofha a dzimbudzi na dzimboho na milora ya ṋamana zwo shashiwa vha re na tshika zwa vha ita vhakhethwa nga u ṱanzwa mivhili yavho,
14 malofha a Kristo we a ḓiṋekedza a sa solei nga hu sa fheli kha Mudzimu, a ḓo ṱanzwa vhukuma mvalo dzashu kha mishumo yo faho uri ri ṋekedze Mudzimu a tshilaho tshumelo khethwa.
15 Ndi ngazwo e mupfumedzanyi wa mulanga muswa, ngauri ho vha na lufu uri vha vhofhololwe nga tshirengululi kha vhutshinyi he vha vhu ita kha mulanga wa kale, uri vhe vha vhidzwa vha wane fulufhedziso ḽa ifa ḽi sa fheli.
16 Ngauri hune ha vha na mulanga, hu fanela u fa muṋe wa mulanga a re muthu.
17 Ngauri mulanga u khwaṱhiswa nga vho vhulahwaho, samusi u sa shumi nga tshifhinga tsha musi muṋe wa mulanga a re muthu a tshi kha ḓi tshila.
18 Ngauralo, mulanga wa kale a wo ngo vhofhiwa hu si na malofha.
19 Musi Mushe o no vhudza vhathu vhoṱhe ndaela yoṱhe ya Mulayo, o dzhia malofha a dzimboho na a dzimbudzi na maḓi na labi ḽitswuku na tshimela tsha hisopo nahone a shasha bugu khathihi na vhathu vhoṱhe,
20 a ri: “Haya ndi malofha a mulanga we Mudzimu a laedza uri ni u vhulunge.”
21 O shasha dennde na midzio yoṱhe ya tshumelo khethwa nga malofha.
22 U ya nga Mulayo, hu ṱoḓaho u vha zwithu zwoṱhe zwo vha zwi tshi ṱanzwiwa nga malofha, nahone ho vha hu si na u hangwelwa nga nnḓa ha u shululwa ha malofha.
23 Ngauralo, zwo vha zwi tshi ṱoḓea uri zwifanyiso zwi imelaho zwithu zwa ṱaḓulu zwi kunakiswe nga yeneyi nḓila, fhedzi zwithu zwa ṱaḓulu zwi ṱoḓa zwiṱhavhelo zwa khwine u fhira zwenezwi.
24 Ngauri Kristo ho ngo dzhena fhethu hukhethwa ho itwaho nga zwanḓa, hune ha vha tsumbo ya zwithu zwa vhukuma, fhedzi o dzhena kha ḽiṱaḓulu ḽone ḽiṋe, uri a vhonale phanḓa ha Mudzimu a tshi itela riṋe.
25 Ho vha hu si uri a ḓiṋekedze lunzhi, u fana na musi tshifhe muhulu a tshi dzhena fhethu hukhethwa ṅwaha muṅwe na muṅwe e na malofha ane a si vhe awe.
26 Arali zwi vhe zwo ralo, o vha a tshi ḓo tea u tambudzwa lunzhi u bva tshee shango ḽa sikwa. Fhedzi zwino o ḓisumbedza luthihi fhedzi, u swika vhufheloni ha maitele a zwithu uri a fhelise tshivhi nge a ḓiṋekedza ene muṋe.
27 Vhunga vhathu vha tshi fa luthihi, fhedzi nga murahu ha zwenezwo vha haṱulwa,
28 nga hu fanaho na Kristo o ṋekedzwa luthihi uri a hwale zwivhi zwa vhanzhi; nahone musi a tshi vhonala lwa vhuvhili u ḓo vha a songo tsha ḓela u fhelisa tshivhi nahone u ḓo vhonwa nga vhane vha mu ṱoḓa zwi tshi bva mbiluni uri vha tshidzwe.
