Vhakolosa 4:1-18
4 Inwi vhane na vha vhaṋe, ni fare vhalanda vhaṋu nga nḓila yo lugaho na yo teaho, ni tshi ḓivha uri na inwi ni na Muṋe ngei ṱaḓulu.
2 Konḓelelani thabeloni, ni dzule no i fhaṱutshela ni tshi livhuha.
3 Ni ri rabelele uri Mudzimu a ri vulele muṋango wa u huwelela ipfi ḽawe, ri ḓivhadze tshiphiri tshikhethwa nga ha Kristo, tshone tshe tsha ita uri ndi vhofhiwe nga ngeḓane dzhele;
4 uri ndi tshi ambe zwavhuḓi nga nḓila ine nda tea uri ndi tshi ambe ngayo.
5 Bvelani phanḓa ni tshi tshimbila nga vhuṱali kha vhane vha vha nnḓa ha tshivhidzo, ni tshi shumisa tshifhinga tshaṋu nga vhuṱali.
6 Tshifhinga tshoṱhe ni ambe maipfi a vhuthu, a nge o lungwa muṋo, uri ni kone u ḓivha nḓila ine na tea u fhindula ngayo muthu muṅwe na muṅwe.
7 Tixiko, wahashu a funwaho, ane a vha muḓinḓa a fulufhedzeaho na mulanda nga nṋe Murenani, u ḓo ni vhudza mafhungo anga oṱhe.
8 Ndi khou mu ruma ha inwi uri ni ḓivhe nga ha mutakalo washu, uri a ni khuthadze.
9 Ndo mu ruma na Onesimo, wahashu a fulufhedzeaho na a funwaho, a bvaho ha inwi, vha ḓo ni vhudza zwoṱhe zwine zwa khou itea ngeno.
10 Aristariko ane nda vha nae fhano dzhele u a ni lumelisa, na Marko shaka ḽa Baranaba (we na wana nyeletshedzo ya uri ni mu ṱanganedze arali a ḓa ha inwi,)
11 na Yesu ane a vhidzwa Yusto, vhenevha ndi vhaṅwe vha vho fumbiswaho. Vhenevha ndi vhone fhedzi vhe vha shumisana na nṋe kha zwa muvhuso wa Mudzimu, nahone vho nkhuthadza vhukuma.
12 Epafra mulanda wa Kristo Yesu a bvaho ha inwi, u a ni lumelisa. U dzula a tshi ḓidina nga u ni rabelela, uri ni vhuye ni ime no khwaṱha kha u tenda zwoṱhe zwine Mudzimu a zwi funa.
13 Ngauri ndi a ṱanziela uri o ita vhuḓidini vhuhulwane a tshi itela inwi na vha ngei Laodikea na vha ngei Hierapoli.
14 Luka ṅanga* i funwaho u a ni lumelisa, na Dema na ene u a ni lumelisa.
15 Ni lumelise vhahashu vha ngei Laodikea na khaladzi ashu Nimfa na tshivhidzo tshine tsha ṱanganela nḓuni yawe.
16 Musi no no vhala honovhu vhurifhi, ni dzudzanye uri vhu dovhe vhu vhalwe tshivhidzoni tsha Vhalaodikea na inwi ni vhale vhu bvaho Laodikea.
17 Zwiṅwe hafhu, ni vhudze Arakipo uri: “Dzula u tshi ṱhogomela vhuḓinḓa he wa vhu ṱanganedza Murenani u vhu ite nga vhuḓalo.”
18 Nṋe Paulo, ndi khou ni ṅwalela yeneyi ndumeliso nga tshanḓa tshanga. Ni dzule ni tshi humbula u vhoxwa hanga dzhele. Vhuthu vhuhulu vhu vhe na inwi.
Ṱhaluso dzi re magumoni a siaṱari
^ Dokotela.
