Vharoma 16:1-27
16 Ndi khou ni ḓivhadza nga ha khaladzi ashu Foivhe, ane a vha muḓinḓa tshivhidzoni tsha ngei Kenkrea,
2 uri ni mu ṱanganedze Murenani nga nḓila yo fanelaho vhakhethwa, na uri ni mu thuse musi a tshi ṱoḓa thuso, ngauri na ene o thusa vhathu vhanzhi u katela na nṋe.
3 Ni lumelise Prisika na Akwila vhane ra shumisana roṱhe mushumoni wa Kristo Yesu,
4 vho vhea vhutshilo havho khomboni vha tshi itela nṋe, a vha livhuhiwi nga nṋe ndi ndoṱhe, fhedzi nga zwivhidzo zwoṱhe zwa vha dzitshaka.
5 Ni lumelise na tshivhidzo tshi kuvhanganaho nḓuni yavho. Ni lumelise na Epaineto a funwaho, we a vha e mutevheli wa Kristo wa u thoma wa ngei Asia.
6 Ni lumelise na Maria, we a ri shumela nga maanḓa.
7 Ni lumelise Androniko na Yunia mashaka anga na mathubwa nga nṋe, vhanna vha ḓivhiwaho vhukuma nga vhaapostola na vhe vha vha na vhuthihi na Kristo tshifhinga tshilapfu u fhira nṋe.
8 Ni lumelise na Amplia a funwaho Murenani.
9 Ni lumelise Uribani ane ra shumisana roṱhe na Kristo, na Staxi a funwaho.
10 Ni lumelise Apelesi, a takalelwaho nga Kristo. Ni lumelise na vha nnḓu ya Aristobulo.
11 Ni lumelise Herodio shaka ḽanga. Ni lumelise na vha nnḓu ya Narkiso vha re na nṋe Murenani.
12 Ni lumelise Tirifena na Tirifosa, vhafumakadzi vhe vha shuma nga maanḓa Murenani. Ni lumelise na Peresisi ane ra mu funa, o ita mishumo minzhi Murenani.
13 Ni lumelise Rufo munangiwa Murenani na mme awe ane nda mu dzhia sa mme anga.
14 Ni lumelise Asinkrito, Flego, Heremosi, Patiroba, Heremasi, na vhahashu vhane vha dzula navho.
15 Ni lumelise Filologo na Yulia, Nereo na khaladzi awe, Olimpasi, na vhakhethwa vhoṱhe vhane vha dzula navho.
16 Ni lumelisane nga khisi khethwa.* Zwivhidzo zwoṱhe zwa Kristo zwi khou ni lumelisa.
17 Zwino ndi a ni ṱuṱuwedza vhahashu, uri ni ṱhogomele vhane vha vusa dziphambano na vhane vha khukhulisa vhaṅwe nga zwithu zwo fhambanaho na pfunzo ye na i guda, ni vha iledze.
18 Vhathu vho raloho ndi phuli dza nyemulo dzavho dza ṋama, hu si dza Murena washu Kristo; nahone vha fhura vha sa ḓivhi tshithu nga maipfi a kungaho na a ḓifhelelaho.
19 U thetshelesa haṋu ho ṱhogomelwa nga vhoṱhe, nahone ni a ntakadza. Fhedzi ndi ṱoḓa uri ni ṱalifhe kha zwivhuya, huno ni vhe vha si na mulandu musi zwi tshi ḓa kha vhuvhi.
20 Hu si kale Mudzimu wa mulalo u ḓo ni ṋea maanḓa a u kandekanya Sathane. Ni vhe na vhuthu vhuhulu ha Murena washu Yesu.
21 Timotheo mushumisani na nṋe u a ni lumelisa, khathihi na Lukio, Yasoni, na Sosipatere mashaka anga.
22 Na nṋe Teresio, ane nda khou ṅwala honovhu vhurifhi ndi tshi khou vhudzwa nga Paulo, ndi a ni lumelisa Murenani.
23 Gayo we a nṱanganedza khathihi na tshivhidzo tshoṱhe, vha a ni lumelisa. Na Erasito mulangi wa muḓi u a ni lumelisa, khathihi na Kwarito murathu wawe.
24 * ——
25 Mudzimu ane a kona u ni khwaṱhisa nga mafhungo maḓifha a Yesu Kristo ane nda a huwelela, malugana na u dzumbululwa ha tshiphiri tshikhethwa tshe tsha vha tsho dzumbiwa kale-kale,
26 fhedzi zwino tsho dzumbuluwa nahone tsho ḓivhadzwa nga maṅwalo a vhaporofita vhukati ha tshaka dzoṱhe, u tendelana na ndaela ya Mudzimu wa nga hu sa fheli uri tshaka dzi mu tende nahone dzi mu thetshelese;
27 nga a rendwe ene wa vhuṱali e eṱhe, nga Yesu Kristo lini na lini. Amen.
Ṱhaluso dzi re magumoni a siaṱari
^ Yeneyo ndi nḓila ye Vhakriste vha vha vha tshi lumelisana ngayo musi vha tshi ṱangana.
