Yakobo 1:1-27
1 Nṋe Yakobo, mulanda wa Mudzimu na wa Murena Yesu Kristo, ndi lumelisa tshaka dza fumi-mbili (12) dzo balanganaho.
2 Ni takale vhahashu, musi ni tshi sedzana na milingo yo fhamba-fhambanaho,
3 ni tshi ḓivha uri musi ni tshi ita zwenezwo, honoho u lingwa ha lutendo lwaṋu hu ḓisa u konḓelela.
4 Fhedzi u konḓelela hu fanela u khunyeledza mushumo waho, uri ni vhe vho khunyeledzaho na vha sa solei kha masia oṱhe, ni sa shayi tshithu na tshithihi.
5 Arali muṅwe waṋu a tshi shaya vhuṱali, nga a dzule a tshi humbela Mudzimu, ngauri u ṋea vhoṱhe nga mafunda a sa gunguli; nahone u ḓo vhu ṋewa.
6 Fhedzi nga a dzule a tshi humbela e na lutendo, a sa timatimi na luthihi, ngauri ane a timatima u nga gabelo ḽa lwanzhe, ḽine ḽa vhudzulwa nga muya ḽa poswa ngeno na ngei.
7 Zwi re zwone ndi uri onoyo muthu a songo lavhelela u wana naho tshi tshini tshi bvaho ha Yehova;
8 ndi muthu ane a timatima, ha fulufhedzei kha nḓila dzawe dzoṱhe.
9 Fhedzi wahashu ane a ḓiṱukufhadza nga a takalele u hudzwa hawe,
10 o pfumaho a takalele u ṱukufhadzwa hawe, ngauri u ḓo puta sa luvha ḽa tsimuni.
11 Ngauri ḓuvha ḽi a ṱavha na u fhisa, ḽa putisa zwimela nahone maluvha azwo a a fhufhurea na lunako lwazwo lwa fhela. Na mupfumi u ḓo fa musi a tshi kha ḓi tovhola nḓila yawe ya vhutshilo.
12 Hu takala muthu ane a dzula a tshi konḓelela mulingo, ngauri musi o no takalelwa nga Mudzimu u ḓo wana khare ya vhutshilo, ye Yehova a fulufhedzisa vhane vha dzula vha tshi mu funa.
13 Hu songo vha na ane musi a tshi lingwa a ri: “Ndi lingwa nga Mudzimu.” Ngauri Mudzimu ha lingwi nga vhuvhi na ene muṋe ha lingi muthu.
14 Fhedzi muṅwe na muṅwe u lingwa a tshi kokodzwa na u kungwa nga nyemulo yawe.
15 Musi nyemulo yo no hulela, i bveledza tshivhi; musi tshivhi tsho no itwa, tshi ḓisa lufu.
16 Vhahashu vha funwaho, ni songo fhurwa.
17 Tshifhiwa tshiṅwe na tshiṅwe tshavhuḓi na tsho fhelelaho tshi bva ṱaḓulu, tshi tsa tshi tshi bva ha Khotsi wa tshedza tsha ṱaḓulu a sa shanduki u fana na mirunzi i sudzuluwaho.
18 Ngauri yo vha i ndivho yawe u ita uri ri vhe hone a tshi shumisa ipfi ḽawe ḽa ngoho, uri ri vhe zwiranzhe vhukati ha vhe a vha sika.
19 Vhahashu vha funwaho, ḓivhani hezwi. Muṅwe na muṅwe u fanela u ṱavhanya u thetshelesa, a lenge u amba, a lenge u sinyuwa;
20 ngauri u sinyuwa ha muthu a hu bveledzi u luga ha Mudzimu.
21 Nga zwenezwo, laṱani tshika dzoṱhe na vhuvhi hoṱhe ho andaho, nga u ḓiṱukufhadza ni tendele Mudzimu a tshi zwala ipfi ḽawe nga ngomu haṋu ḽine ḽa kona u tshidza vhutshilo haṋu.
22 Naho zwo ralo, ivhani vhaiti vha zwine ipfi ḽa amba zwone, ni songo vha vhapfi fhedzi, vhane vha ḓifhura nga mahumbulele a mazwifhi.
23 Ngauri arali muthu e mupfi wa zwine ipfi ḽa amba zwone, e si muiti, onoyo u fana na muthu ane a sedza tshifhaṱuwo tshawe kha tshivhoni.
24 Hone u a ḓisedza, musi a tshi ṱuwa henefho, nga u ṱavhanya u a hangwa uri u muthu wa mufuda-ḓe.
25 Fhedzi ane a sedzesa mulayo wo fhelelaho une wa vha wa mbofholowo a futelela khawo, ha tsha ḓo vha mupfi ane a vha na khangwa, fhedzi u ḓo vha muiti wa mushumo, u ḓo takala musi a tshi khou u shuma.
26 Arali muthu naho e ufhio a tshi humbula uri u mugwadameli wa Mudzimu, fhedzi a sa koni u langa lulimi lwawe, u khou fhura mbilu yawe ene muṋe nahone vhurabeli hawe ndi ha mahandana.
27 Mufuda wa vhurabeli ho kunaho na vhu si na tshika u ya nga mavhonele a Mudzimu washu na Khotsi ndi hovhu: u ṱhogomela zwisiwana na dzitshilikadzi vhuṱunguni havho, na u dzula u si na tshika i bvaho kha ḽino shango.
