Yakobo 2:1-26
2 Vhahashu, naa ni khou farelela lutendo lwa Murena washu Yesu Kristo wa vhugala, ngeno ni tshi khou ṱalula?
2 Ngauri arali hune na kuvhanganela hone ha dzhena muthu o ambaraho rinngi dza musuku kha minwe yawe na zwiambaro zwavhuḓi, ha dovha ha dzhena munna a shayaho o ambara zwiambaro zwi re na tshika,
3 naa ni takalela o ambaraho zwiambaro zwavhuḓi na ri: “Dzula afha fhethu havhuḓi,” nahone na amba na munna a shayaho na ri: “Iwe ima zwau,” kana na ri: “Dzula henefho kha vhukando ha milenzhe yanga”?
4 Arali zwo ralo, naa a ni nga ḓo vha ni tshi khou dzhia vhaṅwe vhe vha vhuimo ha nṱha u fhira vhaṅwe na u haṱula luvhi?
5 Vhahashu vha funwaho thetshelesani. Naa Mudzimu ho ngo nanga vhane shango ḽa vha dzhia vhe vhashayi uri vha pfume kha lutendo na u vha maḽaifa a muvhuso, we a fulufhedzisa vhane vha mu funa?
6 Fhedzi no nyadza a shayaho. Naa a si vhapfumi vhane vha ni tsikeledza na u ni isa khothe?
7 Naa a vha ni semi nga dzina ḽavhuḓi ḽe na ṋewa ḽone?
8 Huno arali ni tshi tevhedza mulayo wa vhuhosini u ya nga luṅwalo lune lwa ri: “U tea u funa wahau vhunga u tshi ḓifuna,” ni khou ita zwavhuḓi vhukuma.
9 Fhedzi arali ni tshi bvela phanḓa ni tshi ṱalula, ni khou ita tshivhi, nahone ni khou kaidzwa nga mulayo sa vhapfuki vhawo.
10 Arali naho e nnyi a tshi tevhedza milayo yoṱhe, fhedzi a pfuka muthihi, o no vha mupfuki wa milayo yoṱhe.
11 Ngauri we a ri: “U songo ṱonḓola,” o dovha a ri: “U songo vhulaha.” Huno arali u sa ṱonḓoli, fhedzi u tshi vhulaha, wo no vha mupfuki wa mulayo.
12 Bvelani phanḓa ni tshi amba na u ḓifara nga nḓila i fanaho na ya vhane vha ḓo haṱulwa nga mulayo wa vhathu vho vhofholowaho.
13 Ane a si sumbedze khathutshelo ha nga ḓo sumbedzwa khathutshelo musi a tshi haṱulwa. U sumbedza khathutshelo zwi fhira u haṱula.
14 Vhahashu, zwi vhuyedza’ni arali muthu a tshi ri u na lutendo, fhedzi a si na mishumo? Naa lwonolwo lutendo lu nga mu tshidza?
15 Arali munna a re mutendi kana mufumakadzi a re mutendi o ṱahelelwa nga zwiambaro nahone a si na zwiḽiwa zwo linganaho zwa ḽeneḽo ḓuvha,
16 fhedzi muṅwe waṋu a amba navho a ri: “Tshimbilani nga mulalo, ni fuke ni ḽe ni fure,” zwi ḓo vhuyedza nga’ni arali ni songo vha ṋea zwine mivhili yavho ya zwi shaya?
17 Zwi ngaho zwenezwo, lutendo nga lwoṱhe lu si na mishumo lwo fa.
18 Naho zwo ralo, muṅwe u ḓo ri: “Iwe u na lutendo, nṋe ndi na mishumo. Ntsumbedze lutendo lwau lu si na mishumo, nahone nṋe ndi ḓo u sumbedza lutendo lwanga nga mishumo yanga.”
19 Naa u a tenda uri hu na Mudzimu muthihi? U khou ita zwavhuḓi vhukuma. Fhedzi na madimoni a a tenda a tshi tetemela.
20 Naa u a ṱoḓa u ḓivha, iwe muthu a si na ṱhalukanyo, uri lutendo lu si na mishumo a lu shumi tshithu?
21 Naa a ho ngo pfi khotsi ashu Abrahamu o luga nga mishumo musi o ṋekedza Isaka murwa wawe kha aletare?
22 U a zwi vhona uri lutendo lwawe lwo tshimbidzana na mishumo yawe nahone lutendo lwawe lwo khunyeledzwa nga mishumo yawe,
23 huno ho ḓadzea luṅwalo lune lwa ri: “Abrahamu o vha na lutendo kha Yehova, nahone a dzhiiwa sa o lugaho,” a vhidzwa “khonani ya Yehova.”
24 Ni a zwi vhona uri muthu hu pfi o luga nga mishumo, hu si nga lutendo lu lwoṱhe.
25 Zwi fanaho na zwenezwo, naa Rahaba wa phombwe ho ngo pfi o luga nga mishumo, nga murahu ha u ṱanganedza vhaḓinḓa zwavhuḓi nahone a vha bvisa nga iṅwe nḓila?
26 I ngoho, vhunga muvhili u si na muya wo fa, na lutendo lu si na mishumo lwo fa.
