Yakobo 3:1-18
3 Vhahashu, a si vhanzhi kha inwi vhane vha fanela u vha vhagudisi, ngauri ri a zwi ḓivha uri ri ḓo haṱulwa nga nḓila i vhavhaho.
2 Ngauri roṱhe ri a khakha lunzhi. Arali muthu naho e ufhio a sa khakhi musi a tshi amba, uyo ndi muthu o fhelelaho, ane a kona u dovha a langa muvhili wawe woṱhe.
3 Arali ra dzhenisa mihala milomoni ya bere uri dzi ri thetshelese, ri langa na mivhili yadzo yoṱhe.
4 Dovhani ni lavhelese na zwikepe, naho zwi zwihulwane vhukuma, zwi tshi tshimbidzwa nga mimuya ya maanḓa, zwi langwa nga thanda ṱhukhu dza u tshimbidza tshikepe zwa ya hune mutshimbidzi a ṱoḓa zwi tshi ya hone.
5 Ngauralo, na lulimi ndi muraḓo muṱuku wa muvhili, fhedzi lu zuwa zwihulu. Kudido naho ku kuṱuku ku funga ḓaka ḽihulwane lungafhani!
6 Vhukuma, lulimi ndi mulilo. Kha miraḓo yashu yoṱhe ya muvhili, lulimi ndi lwone lwo ḓalaho vhuvhi ngauri lu tshikafhadza muvhili woṱhe, lu nga lozwa vhutshilo ha muthu na u ḓisa ndozwo u fana na Gehena.*
7 Ngauri mufuda muṅwe na muṅwe wa tshipuka tsha ḓaka, wa tshiṋoni, wa tshikokovhi, wa tshivhumbwa tsha lwanzheni u nga fuiwa nahone vhathu vho no u fuwa.
8 Fhedzi a hu na muthu ane a nga kona u fuwa lulimi. A lu langei nahone lu na khombo, lwo ḓala mulimo u vhulayaho.
9 Ri renda Yehova, Khotsi ngalwo, fhedzi ngalwo ra sema vhathu vhe vha itwa nga “tshifanyiso tsha Mudzimu.”
10 Kha mulomo muthihi hu bva phaṱhutshedzo na maṱamba.
Vhahashu, a zwo ngo tea uri zwithu zwi itee nga yeneyi nḓila.
11 Naa maḓi avhuḓi na a vhavhaho a nga seluwa a tshi bva tshisimani tshithihi?
12 Vhahashu, naa muhuyu u nga aṋwa ṱhwari kana munḓirivhe wa aṋwa mahuyu? Na maḓi a dungaho muṋo a nga si bveledze maḓi avhuḓi.
13 Ndi nnyi o ṱalifhaho na ane a ṱalukanya vhukati haṋu? Nga u vha hawe na vhuḓifari havhuḓi, nga a sumbedze mishumo ine ya itwa nga u vuḓa hu bveledzwaho nga vhuṱali.
14 Fhedzi arali ni na vivho ḽihulu na u pikisana mbiluni dzaṋu, ni songo zuwa na zwifhela ngoho.
15 Hovhu a si vhuṱali vhune ha tsa vhu tshi bva ṱaḓulu, fhedzi ndi ha ḽifhasi, ndi ha vhupuka, na ha vhudimoni.
16 Ngauri huṅwe na huṅwe hune ha vha na vivho na u pikisana, hu ḓo dovha ha vha na u sa dzudzanyea na zwithu zwoṱhe zwivhi.
17 Fhedzi vhuṱali vhu bvaho ṱaḓulu zwihuluhulu ho kuna, ha dovha ha vha na mulalo, ha humbulela, ha ḓiimisela u thetshelesa, ha ḓala khathutshelo na mitshelo yavhuḓi, a vhu ṱaluli, a vhu na muhoyo.
18 Zwiṅwe hafhu, mbeu ya mutshelo wa u luga yo zwalwa hu na mulalo vhukati ha vhane vha ita uri hu vhe na mulalo.
Ṱhaluso dzi re magumoni a siaṱari
^ Ndi fhethu he ha vha hu tshi fhiswa mathukhwi nnḓa ha Yerusalema.
