Yakobo 5:1-20
5 Hee inwi vhapfumi, lilani ni tou ṱavha mukosi nga nṱhani ha vhuṱungu vhune ha khou ni ḓela.
2 Lupfumo lwaṋu lwo sina, na zwiambaro zwaṋu zwa nga nnḓa zwo ḽiwa nga tsole.
3 Musuku waṋu na tsimbi-tseṱha yaṋu zwo ḽiwa nga vhulali, vhulali hazwo vhu ḓo vha vhuṱanzi ha u ni vhona mulandu, vhu ḓo ḽa ṋama yaṋu. Zwe na zwi vhulunga zwi ḓo nga mulilo maḓuvhani a vhufhelo.
4 Vhonani vhashumi vhe vha kaṋa masimu aṋu na vha dzima malamba vha dzulela u lila, nahone zwililo zwavho zwo swika nḓevheni dza Yehova wa mavhuthu.
5 Kha ḽifhasi no tshila vhutshilo ha u ḓiphiṋa na u ḓifusha. Mbilu dzaṋu dzi nga zwipuka zwine zwa nona u swika ḓuvha ḽine zwa ṱhavhiwa ngaḽo.
6 No vhona mulandu o lugaho nahone na mu vhulaha. Naa ha khou ni hanedza?
7 Nga zwenezwo vhahashu, ni songo fhela mbilu, u swika tshifhingani tsha u vha hone ha Murena. Vhonani! Mulimi u dzula o lindela mutshelo wa ndeme wa kha ḽifhasi a sa u fheleli mbilu u vhuya u swika tshifhinga tsha mvula ya u thoma na tsha ya u fhedza.
8 Na inwi ni songo fhela mbilu; khwaṱhisani mbilu dzaṋu, ngauri u vha hone ha Murena ho sendela.
9 Vhahashu, ni songo gungulelana uri ni sa ḓo haṱulwa. Vhonani! Muhaṱuli o ima phanḓa ha miṋango.
10 Vhahashu, tevhelani tsumbo yavhuḓi ya vhaporofita vho ambaho dzinani ḽa Yehova, vhe vha tambudzwa nahone vha si fhele mbilu.
11 Huno ri ri vha a takala vhe vha konḓelela. No pfa nga ha u konḓelela ha Yobo na u vhona mvelelo ye Yehova a ita uri i vhe hone, uri Yehova u na lufuno luhulu na khathutshelo.
12 Zwihuluhulu vhahashu, litshani u ana nga ḽiṱaḓulu kana nga ḽifhasi kana u ana nga tshiṅwe tshithu naho tshi tshifhio. Fhedzi Ee yaṋu nga i vhe Ee, nahone Hai yaṋu i vhe Hai, uri ni sa ḓo haṱulwa.
13 Naa hu na ane a vha na vhuleme vhukati haṋu? Nga a dzule a tshi rabela. Naa hu na o takalaho? Nga a imbe dzipsalme.
14 Naa hu na ane a lwala vhukati haṋu? Nga a vhidze vhahulwane vha tshivhidzo uri vha mu rabelele, vha mu ḓodze mapfura dzinani ḽa Yehova.
15 Thabelo ya lutendo i ḓo ita uri ane a khou lwala a fhole, huno Yehova u ḓo mu vusa. Zwiṅwe hafhu, arali o ita zwivhi, u ḓo hangwelwa.
16 Nga zwenezwo, ni bulelane zwivhi zwaṋu nahone ni rabelelane, uri ni fhodzwe. Thabelo ya o lugaho ya u humbela i na maanḓa nahone i a shuma.
17 Elia o vha e muthu a re na maḓipfele a fanaho na ashu, fhedzi o rabela zwi tshi bva mbiluni uri i si ne; huno a yo ngo na shangoni miṅwaha miraru na miṅwedzi ya rathi.
18 A dovha a rabela, ḽiṱaḓulu ḽa nisa mvula na shango ḽa bveledza mitshelo.
19 Vhahashu, arali naho e nnyi vhukati haṋu a kheluwa ngohoni nahone muṅwe a mu vhuyedzedza ngohoni,
20 ḓivhani uri muthu naho e ufhio ane a rembulusa muitazwivhi kha vhukhakhi hawe u ḓo mu tshidza lufuni nahone u ḓo fukedza vhunzhi ha zwivhi.
