Yohane 1:1-51
1 Ipfi o vha e hone u bva mathomoni, hone Ipfi o vha e na Mudzimu, nahone Ipfi o vha e mudzimu.
2 O vha e na Mudzimu u bva mathomoni.
3 Zwithu zwoṱhe zwo vha hone nga nṱhani hawe, a hu na tshithu na tshithihi tshe tsha vha hone arali hu si nga ene.
Vhutshilo ho vha hone
4 nga nṱhani hawe, nahone vhutshilo honoho ho vha tshedza tsha vhathu.
5 Tshedza tshi vhonetshela swiswi, fhedzi swiswi a ḽo ngo kona u tiba tshedza.
6 Ho vha hu na muṅwe munna we a vha o rumiwa uri a vhe muimeli wa Mudzimu: dzina ḽawe o vha a tshi pfi Yohane.
7 Onoyu munna o ḓela uri a vhe ṱhanzi, uri a ṱanziele nga ha tshedza, uri vhathu vhoṱhe vha tende nga vhuṱanzi hawe.
8 Ho vha hu si ene tshedza, fhedzi o vha o ḓa u ṱanziela nga ha tshedza.
9 Tshedza tsha ngoho tshi vhonetshelaho vhathu vhoṱhe tsho vha tshi tsini na u ḓa shangoni.
10 O vha e shangoni, hone shango ḽo vha hone nga ene, fhedzi shango a ḽo ngo mu ḓivha.
11 O ḓa muḓini wa hawe, fhedzi vhathu vha hawe a vho ngo mu ṱanganedza.
12 Naho zwo ralo, vhathu vhanzhi vhe vha mu ṱanganedza, o vha ṋea maanḓa a uri vha vhe vhana vha Mudzimu, ngauri vho vha na lutendo dzinani ḽawe;
13 nahone a vho ngo bebwa nga malofha kana nga u funa ha ṋama kana nga u funa ha muthu, fhedzi vho bebwa nga Mudzimu.
14 Ngauralo, Ipfi a vha muthu wa ṋama a dzula na riṋe, ra vhona vhugala hawe, vhugala he murwa mubebwa e eṱhe a vhu ṋewa nga khotsi; o vha a tshi takalelwa vhukuma nga Mudzimu nahone o vha a tshi amba ngoho.
15 (Yohane o ṱanziela nga hae. O huwelela a ri: “A ḓaho murahu hanga o nthanga phanḓa, ngauri o tshila ndi sa athu vha hone.”)
16 Ngauri o vha e na vhuthu vhuhulu, ro bvela phanḓa ri tshi ṱanganedza vhuthu vhuhulu.
17 Ngauri Mulayo wo ṋewa hu tshi shumiswa Mushe, vhuthu vhuhulu na ngoho zwo vha hone nga Yesu Kristo.
18 A hu na muthu we a vhuya a vhona Mudzimu; mudzimu mubebwa e eṱhe a re tsini-tsini na Khotsi ndi ene we a ri ṱalutshedza nga hae.
19 Hezwi ndi zwe Yohane a zwi ṱanziela musi Vhayuda vha tshi ruma vhotshifhe na Vhalevi vha bvaho Yerusalema uri vha mu vhudzise uri: “Ndi iwe nnyi?”
20 Ho ngo hanedza, fhedzi o amba ngoho yo fhelelaho a ri: “A si nṋe Kristo.”
21 Vha mu vhudzisa vha ri: “Zwino ri ḓo ri ndi iwe nnyi? U Elia?” Yohane a ri: “A si nṋe Elia.” “Naa u Muporofita?” A fhindula a ri: “Hai!”
22 Ndi hone vha tshi amba nae vha ri: “U nnyi? uri ri kone u fhindula vhe vha ri ruma. Zwino u nnyi?”
23 A ri: “Ndi nṋe ane a khou vhidzelela e sogani ndi tshi ri: ‘Lugisani nḓila ya Yehova,’ samusi muporofita Yesaya o amba.”
24 Vhe vha vha vho rumiwa vho vha vha tshi bva ha Vhafarisei.
25 Ngauralo, vha mu vhudzisa vha ri: “Zwino ndi ngani u tshi lovhedza arali u si Kristo kana Elia kana Muporofita?”
26 Yohane a vha fhindula a ri: “Nṋe ndi lovhedza nga maḓi. Vhukati haṋu ho ima muthu ane ni si mu ḓivhe,
27 a ḓaho murahu hanga, fhedzi a thi fanelei u vhofholola thambo dza thovho dzawe.”
28 Zwenezwi zwithu zwo itea Bethania seli ha mulambo wa Yorodane, he Yohane a vha a tshi khou lovhedzela hone.
29 Nga ḓuvha ḽi tevhelaho a vhona Yesu a tshi khou ḓa khae, nahone a ri: “Vhonani Ngwana ya Mudzimu i hwalaho zwivhi zwa shango!
30 Onoyu ndi ene we nda amba nga hae nda ri: A ḓaho murahu hanga o nthanga phanḓa, ngauri o tshila nṋe ndi sa athu vha hone.
31 Naho ndo vha ndi sa mu ḓivhi, zwo itaho uri ndi lovhedze nga maḓi ndi uri a ḓivhiwe Isiraele.”
32 Yohane a dovha a ṱanziela a ri: “Ndo vhona muya mukhethwa u tshi tsa sa ḽiivha u tshi bva ṱaḓulu, nahone wa dzula khae.
33 Na nṋe ndo vha ndi sa mu ḓivhi, fhedzi o nthumaho uri ndi lovhedze maḓini o mmbudza uri: ‘Ane na ḓo vhona muya mukhethwa u tshi tsa wa dzula khae, onoyo ndi ene ane a ḓo lovhedza nga muya mukhethwa.’
34 Ndo zwi vhona, nda ṱanziela uri ndi ene Murwa wa Mudzimu.”
35 Huno nga ḓuvha ḽi tevhelaho musi Yohane o ima na vhafunziwa vhawe,
36 a vhona Yesu a tshi khou fhira, a ri: “Vhonani Ngwana ya Mudzimu!”
37 Musi vhafunziwa vhavhili vha tshi mu pfa a tshi amba zwenezwo, vha tevhela Yesu.
38 Yesu a tshi rembuluwa a vhona vha tshi khou mu tevhela, a amba navho a ri: “Ni khou ṱoḓa mini?” Vha mu fhindula vha ri: “Rabi, (musi zwi tshi ṱalutshedzelwa zwi amba uri Mufunzi,) u dzula ngafhi?”
39 Ene a vha fhindula a ri: “Iḓani, ni ḓo hu vhona.” Vha mbo ḓi ṱuwa nae vha ya u vhona he a vha a tshi dzula hone nahone vha dzula nae ḽeneḽo ḓuvha; ho vha hu tshifhinga tshi ṱoḓaho u vha tsha vhufumi.*
40 Andrea murathu wa Simoni Petro o vha e muṅwe wa vhenevho vhavhili vhe vha pfa zwe Yohane a zwi amba nahone vha tevhela Yesu.
41 A thoma nga u wana mukomana wawe Simoni, a amba nae a ri: “Ro wana Messia” (musi zwi tshi ṱalutshedzelwa zwi amba uri Kristo).
42 A ṱuwa nae ha Yesu. Musi Yesu a tshi mu lavhelesa a ri: “Iwe Simoni murwa wa Yohane, u ḓo vhidzwa Kefa” (musi zwi tshi ṱalutshedzelwa zwi amba uri Petro).
43 Nga ḓuvha ḽi tevhelaho Yesu o vha a tshi ṱoḓa u ya Galilea. Ngauralo, a wana Filipo a amba nae a ri: “Ivha mutevheli wanga.”
44 Filipo o vha a tshi bva Betsaida, muḓini we ha vha hu tshi dzula Andrea na Petro.
45 Filipo a wana Nathanaele a amba nae a ri: “Ro wana Yesu murwa wa Yosefa, a bvaho Nazareta we Mushe a ṅwala nga hae Mulayoni, na we Vhaporofita vha ṅwala nga hae.”
46 Fhedzi Nathanaele a mu fhindula a ri: “Naa Nazareta hu nga bva tshithu tshavhuḓi?” Filipo a mu fhindula a ri: “Iḓa u vhone.”
47 Yesu a vhona Nathanaele a tshi khou ḓa khae nahone a amba nae a ri: “Vhonani Muisiraele ane khae ha si vhe na vhufhura.”
48 Nathanaele a ri: “U nḓivhela ngafhi?” Yesu a mu fhindula a ri: “Musi Filipo a sa athu u vhidza, ndo u vhona u fhasi ha muhuyu.”
49 Nathanaele a fhindula a ri: “Rabi, u Murwa wa Mudzimu, u Khosi ya Isiraele.”
50 Yesu a ri: “Naa u vho tenda nge nda amba uri ndo u vhona u fhasi ha muhuyu? U ḓo vhona zwithu zwihulwane u fhira zwenezwi.”
51 A dovha a amba nae a ri: “Ngoho ndi a ni vhudza ndi ri, ni ḓo vhona ḽiṱaḓulu ḽi tshi vulea na vharuṅwa vha Mudzimu vha tshi gonya na u tsela kha Murwa-muthu.”
Ṱhaluso dzi re magumoni a siaṱari
^ Hu ṱoḓaho u vha nga awara ya vhuṋa nga masiari.
