Yohane 10:1-42
10 “Ngoho-ngoho ndi a ni vhudza ndi ri, Ane a si dzhene tshitumbani tsha nngu nga muṋango, fhedzi a dzhena nga huṅwe, onoyo ndi mbava nahone ndi ḽivemu.
2 Fhedzi ane a dzhena nga muṋango ndi ene mulisa wa nngu.
3 Mulinda-muṋango u a vulela onoyo muthu, hone nngu dzi pfa ipfi ḽawe, u vhidza nngu dzawe nga madzina a bva nadzo o dzi ranga phanḓa.
4 Musi a tshi khou bva nadzo, u a dzi ranga phanḓa, nahone nngu dzi a mu tevhela, ngauri dzi ḓivha ipfi ḽawe.
5 Mutsinda a dzi nga mu tevheli na luthihi, fhedzi dzi ḓo mu shavha, ngauri a dzi ḓivhi ipfi ḽa mutsinda.”
6 Yesu o vha vhudza tshenetshi tshifanyiso; fhedzi vho vha vha sa ḓivhi uri zwine a khou vha vhudza zwone zwi amba mini.
7 Ngauralo, Yesu a dovha a ri: “Ngoho ndi a ni vhudza ndi ri, ndi nṋe muṋango wa nngu.
8 Vhoṱhe vhane vha ḓiita vhalisa ndi dzimbava na mavemu; fhedzi nngu a dzo ngo vha thetshelesa.
9 Ndi nṋe muṋango; a dzhenaho nga nṋe u ḓo tshidzwa, u ḓo dzhena a tshi bva nahone u ḓo wana pfulo.
10 Mbava i tshi ḓa i vha yo ḓela u tswa, u vhulaha na u tshinya. Fhedzi nṋe ndo ḓa uri vhathu vha vhe vhutshilo nga vhuḓalo.
11 Ndi mulisa wavhuḓi; mulisa wavhuḓi u kumedza vhutshilo hawe a tshi itela nngu.
12 Mushumi, ane a si vhe mulisa na ane nngu dzi si vhe dzawe, musi a tshi vhona phele i tshi khou ḓa u a shavha a sia nngu—nahone phele i a dzi vhulaha na u dzi balanganya—
13 ngauri ndi mushumi nahone ha ṱhogomeli nngu.
14 Ndi nṋe mulisa wavhuḓi, ndi a ḓivha nngu dzanga na dzone dzi a nnḓivha,
15 samusi Khotsi a tshi nnḓivha na nṋe ndi a mu ḓivha; nahone ndi kumedza vhutshilo hanga ndi tshi itela nngu.
16 “Ndi na dziṅwe nngu, dzine dzi si vhe dza hetshi tshitumba; na dzenedzo ndi fanela u dzi ḓisa, nahone dzi ḓo thetshelesa ipfi ḽanga, dzi ḓo vha sambi ḽithihi, dza vha na mulisa muthihi.
17 Ndi ngazwo Khotsi a tshi mpfuna, ngauri ndi kumedza vhutshilo hanga, uri ndi dovhe ndi vhu wane.
18 A hu na ane a nga ndzhiela vhutshilo, fhedzi ndi vhu kumedza nga u tou ḓifunela. Ndi na maanḓa a u vhu kumedza, nahone nda vha na maanḓa a u dovha nda vhu wana. Ndaela ya zwenezwi ndi i wana ha Khotsi anga.”
19 Zwe a zwi amba zwo dovha zwa vusa phambano vhukati ha Vhayuda.
20 Vhunzhi havho vho vha vha tshi ri: “U na dimoni nahone u a penga. Ndi ngani ni tshi mu thetshelesa?”
21 Vhaṅwe vho vha vha tshi ri: “Hezwi zwithu zwi nga si ambiwe nga muthu a re na dimoni. Naa dimoni ḽi nga bonyolosa maṱo a vhathu vho pofulaho?”
22 Nga tshenetsho tshifhinga ho vha hu na vhuṱambo ha u ṋekedza thembele Yerusalema. Ho vha hu vhuriha,
23 nahone Yesu o vha a tshi khou tshimbila thembeleni fhethu hune ha pfi phuphuni dza Salomo.
24 Vhayuda vha mu tanga vha amba nae vha ri: “U ḓo litsha lini u dzula wo ri fareledza? Arali u Kristo, ri vhudze zwi pfale.”
25 Yesu a vha fhindula a ri: “Ndo ni vhudza, fhedzi ni si tende. Mishumo ine nda i ita dzinani ḽa Khotsi anga, i a nṱanzielela.
26 Fhedzi inwi a ni tendi, ngauri a ni nngu dzanga.
27 Nngu dzanga dzi thetshelesa ipfi ḽanga, ndi a dzi ḓivha, nahone dzi a ntevhela.
28 Ndi dzi ṋea vhutshilo vhu sa fheli, dzi nga si ḓo vhuya dza fheliswa, a hu na ane a ḓo dzi thuba tshanḓani tshanga.
29 Zwe Khotsi anga a nṋea zwone ndi zwihulwane u fhira zwithu zwoṱhe, nahone a hu na ane a nga zwi dzhia tshanḓani tsha Khotsi anga.
30 Nṋe na Khotsi ri vhathihi.”
31 Vhayuda vha dovha vha doba matombo uri vha mu kanḓe ngao.
32 Yesu a vha fhindula a ri: “Ndo ni sumbedza mishumo minzhi yavhuḓi i bvaho ha Khotsi. Ndi mishumo ifhio ine na khou ṱoḓa u nkanḓela yone nga matombo?”
33 Vhayuda vha mu fhindula vha ri: “A ri khou ṱoḓa u u kanḓa nga matombo nga nṱhani ha mushumo wavhuḓi, fhedzi ndi nga nṱhani ha uri wo semana, na uri iwe u muthu, fhedzi u ḓiita mudzimu.”
34 Yesu a vha fhindula a ri: “Naa a zwo ngo ṅwalwa Mulayoni waṋu musi Mudzimu a tshi ri, ‘Ndo ri: “Ni midzimu”’?
35 Arali a tshi vhidza ‘midzimu’ avho vhe ipfi ḽa Mudzimu ḽa amba luvhi ngavho, naho zwo ralo, Maṅwalo a nga si shanduke,
36 naa ni vhudza nṋe we Khotsi a mu ita mukhethwa na u mu rumela shangoni na ri: ‘U sema Mudzimu,’ nge nda ri ndi Murwa wa Mudzimu?
37 Arali ndi sa khou ita mishumo ya Khotsi anga, ni songo ntenda.
38 Arali ndi tshi khou ita mishumo yeneyo, naho ni sa ntendi, tendani mishumo ine nda khou i shuma, uri ni ḓivhe nahone ni bvele phanḓa ni tshi ḓivha uri Khotsi u na vhuthihi na nṋe, nahone nṋe ndi na vhuthihi na Khotsi.”
39 Vha dovha vha lingedza u mu fara; fhedzi a ponyoka.
40 A dovha a wela seli ha Yorodane a ya fhethu he Yohane a vha a tshi lovhedza hone u thomani, a dzula henefho.
41 Vhathu vhanzhi vha ḓa khae, vha thoma u amba nae vha ri: “Naho Yohane a songo ita vhuṱolo na vhuthihi, fhedzi zwithu zwinzhi zwe Yohane a ri vhudza zwone nga ha onoyu muthu ndi ngoho.”
42 Henefho vhathu vhanzhi vha vha na lutendo khae.
