Yohane 12:1-50
12 Musi ho sala maḓuvha a rathi uri hu vhe ḓuvha ḽa Paseka, Yesu a swika Bethania, he ha vha hu tshi dzula Lazaro we a mu vusa vhafuni.
2 Henefho vha mu lugiselela tshilalelo, nahone Marita ndi ene we a vha a tshi khou vha bikela zwiḽiwa, fhedzi Lazaro o vha e muṅwe wa vhe vha vha vha tshi khou ḽa na Yesu.
3 Ngauralo, Maria a dzhia mudzio u re na mapfura a nukhelelaho a ḓuraho vhukuma a ṱoḓaho u vha hafu ya ḽithara, a ḓodza Yesu kha milenzhe nahone a i phumula nga mavhudzi awe. Nnḓu yoṱhe ya nukhelela eneo mapfura.
4 Fhedzi muṅwe wa vhafunziwa vhawe, Yudasi Iskariote, we a vha a tshi ḓo mu fheṱa, a ri:
5 “Ndi ngani enea mapfura a nukhelelaho a songo rengiswa nga dinari* dza maḓana mararu nahone dza ṋewa vhashai?”
6 Yudasi ho ngo amba zwenezwi nga nṱhani ha uri o vha a tshi vhilaelela vhashai, ndi nga nṱhani ha uri o vha e mbava. Ho vha hu ene we a vha a tshi ṱhogomela tshelede ya vhafunziwa nahone o vha a tshi i tswa.
7 Yesu a ri: “Mu litsheni a ite zwenezwi uri a lugiselele ḓuvha ḽa mbulungo yanga.
8 Ngauri vhashai ni ḓo dzula ni navho, fhedzi a ni nga dzuli na nṋe misi yoṱhe.”
9 Nga tshenetsho tshifhinga, gogo ḽihulu ḽa Vhayuda ḽa zwi ḓivha uri u henefho, ḽa mbo ḓi ḓa, hu si u itela u vhona Yesu fhedzi, fhedzi na u vhona Lazaro, we a mu vusa vhafuni.
10 Vhotshifhe vhahulu vha langana uri vha vhulahe na Lazaro,
11 ngauri Vhayuda vhanzhi vho vha vha tshi khou ya henengei nahone vha tshi khou vha na lutendo kha Yesu nga nṱhani ha Lazaro.
12 Nga ḓuvha ḽi tevhelaho, gogo ḽe ḽa vha ḽo ḓa vhuṱamboni ḽa pfa uri Yesu u khou ḓa Yerusalema.
13 Nga zwenezwo, ḽa ka matavhi a mutshevho ḽa ya ḽa mu ṱanganedza nahone ḽa thoma u vhidzelela ḽa ri: “Ri rabela uri u mu tshidze! Nga hu rendwe a ḓaho nga dzina ḽa Yehova, khosi ya Isiraele!”
14 Yesu a wana mbongolana nahone a i ṋamela, samusi zwo ṅwalwa ha pfi:
15 “U songo ofha iwe ṅwananyana wa Tsioni. Vhona! Khosi yau i khou ḓa yo ṋamela mbongolana.”
16 U thomani vhafunziwa vhawe vho vha vha sa pfesesi, fhedzi musi Yesu a tshi ṋewa vhugala, vha mbo ḓi humbula uri zwenezwi zwithu zwo vha zwo ṅwalwa nga hae na uri vha ḓo mu itela zwenezwi.
17 Na gogo ḽe a vha e naḽo musi a tshi vhidza Lazaro vhiḓani nahone a mu vusa vhafuni ḽo bvela phanḓa ḽi tshi ṱanziela.
18 Ndi ngazwo gogo ḽo ya ḽa mu ṱanganedza ngauri ḽo pfa uri o ita honoho vhuṱolo.
19 Nga zwenezwo, Vhafarisei vha amba nga tshavho vha ri: “Ni a zwi vhona uri zwoṱhe zwine na khou ita a zwi khou thusa nga tshithu. Vhonani! Shango ḽoṱhe ḽi khou mu tevhela.”
20 Vhukati ha vhenevho vhathu ho vha hu na Vhagerika vho ḓa vhuṱamboni u rabela.
21 Vha ya kha Filipo we a vha a tshi bva Betsaida kha ḽa Galilea, vha mu humbela vha ri: “Muṋe washu, ri khou ṱoḓa u vhona Yesu.”
22 Filipo a ya a vhudza Andrea. Andrea na Filipo vha ya vha vhudza Yesu.
23 Yesu a vha fhindula a ri: “Tshifhinga tsho swika tsha uri Murwa-muthu a ṋewe vhugala.
24 Ngoho ndi a ni vhudza ndi ri: Arali thoro ya goroi ya sa wela mavuni nahone ya sina, i ḓo ḓi dzula i thoro nthihi; fhedzi arali ya sina, i aṋwa dziṅwe thoro nnzhi.
25 A funaho vhutshilo hawe u ḓo vhu lozwa, fhedzi ane a vhenga vhutshilo hawe kha ḽino shango u ḓo vhu tsireledza nahone a wana vhutshilo vhu sa fheli.
26 Arali muthu a tshi funa u ntshumela, nga a ntevhele, hune nda ḓo vha ndi hone, na mushumeli wanga u ḓo vha e henefho-vho. Arali muthu a tshi funa u ntshumela, Khotsi u ḓo mu hulisa.
27 Zwino ndo ṱungufhala, nahone ndi ḓo ri mini? Khotsi, ntshidze kha tshino tshifhinga. Naho zwo ralo, ndi ngazwo ndo ḓa nga tshenetshi tshifhinga.
28 Khotsi hulisa dzina ḽau.” Ha pfala ipfi ḽi tshi bva ṱaḓulu ḽi tshi ri: “Ndo ḽi hulisa nahone ndi ḓo dovha nda ḽi hulisa.”
29 Musi gogo ḽe ḽa vha ḽo ima henefho ḽi tshi zwi pfa, ḽa ri ndi mubvumo. Vhaṅwe vha ri: “Muruṅwa o vha a tshi khou amba nae.”
30 Yesu a fhindula a ri: “Ipfi ḽeneḽi ḽo pfala hu si u itela nṋe, fhedzi hu u itela inwi.
31 Shango ḽeneḽi ḽi ḓo haṱulwa; nahone muvhusi waḽo u ḓo poswa nnḓa.
32 Musi ndi tshi imiselwa nṱha, ndi ḓo kokodza vhathu vha mifuda yoṱhe.”
33 Zwenezwi o vha a tshi khou zwi amba uri a sumbedze nḓila ye a vha a tshi ḓo fa ngayo.
34 Nga zwenezwo, gogo ḽa mu fhindula ḽa ri: “Ro pfa kha Mulayo uri Kristo u ḓo vha hone lwa tshoṱhe; fhedzi ndi ngani u tshi ri Murwa-muthu u fanela u imiselwa nṱha? Murwa-muthu ndi nnyi?”
35 Ngauralo, Yesu a amba navho a ri: “Tshedza tshi ḓo vha na inwi lwa tshifhinganyana. Tshimbilani hu tshi kha ḓi vha na tshedza, hu sa athu vha na swiswi; ane a tshimbila swiswini ha ḓivhi hune a khou ya hone.
36 Musi ni tshi kha ḓi vha na tshedza, ivhani na lutendo kha tshedza, uri ni vhe vhana vha tshedza.”
Yesu o amba zwenezwi zwithu a mbo ḓi ṱuwa a ya a dzumbama.
37 Naho vho zwi vhona a tshi ita vhuṱolo vhunzhi, a vho ngo mu tenda,
38 uri hu ḓadzee zwo ṅwalwaho nga muporofita Yesaya a tshi ri: “Yehova, ndi nnyi we a tenda zwe a zwi pfa nga riṋe? Ndi vhafhio vhe Yehova a vha sumbedza maanḓa* awe?”
39 Zwe zwa dovha zwa ita uri vha si tende ndi ngauri Yesaya o ri:
40 “O swingisa maṱo avho na u rindidza mbilu dzavho, uri vha si vhone nga maṱo avho na u zwi ṱalukanya nga mbilu dzavho na u rembuluwa uri ndi vha fhodze.”
41 Yesaya o amba zwenezwi zwithu ngauri o vhona vhugala hawe, nahone o amba nga hae.
42 Naho zwo ralo, vhathu vhanzhi u katela na vharangaphanḓa vho mu tenda, fhedzi nga nṱhani ha Vhafarisei vho vha vha sa ambi uri vha a mu tenda, uri vha sa ḓo pandelwa sinagogoni;
43 ngauri vho vha vha tshi funa u huliswa nga vhathu u fhira u huliswa nga Mudzimu.
44 Naho zwo ralo, Yesu a vhidzelela a ri: “Ane a ntenda ha tendi nṋe fhedzi, fhedzi u tenda na we a nthuma;
45 nahone ane a vhona nṋe u vhona na we a nthuma.
46 Ndo ḓa fhano shangoni sa tshedza, uri vhoṱhe vhane vha ntenda vha si dzule swiswini.
47 Fhedzi arali muṅwe na muṅwe a tshi pfa zwine nda zwi amba nahone a si zwi ite, a thi nga ḓo mu haṱula; ngauri a tho ngo ḓa u haṱula shango, fhedzi ndo ḓa u ḽi tshidza.
48 Ane a nnyadza nahone a si thetshelese zwine nda zwi amba hu na ane a ḓo mu haṱula. Zwe nda amba ndi zwine zwa ḓo mu haṱula nga ḓuvha ḽa vhufhelo;
49 ngauri a tho ngo amba zwi bvaho kha nṋe, fhedzi Khotsi we a nthuma o nndaedza zwine nda fanela u zwi amba na u zwi funza.
50 Ndi a zwi ḓivha uri ndaela yawe i isa vhutshiloni vhu sa fheli. Ngauralo, zwithu zwine nda zwi amba, ndi amba zwe Khotsi a mmbudza zwone.”
Ṱhaluso dzi re magumoni a siaṱari
^ Ndi tshelede ya Vharoma ya tsimbi.
^ Ṱhalutshedzelo ya ipfi nga ipfi i ri “tshanḓa.”
