Yohane 13:1-38
13 Vhuṱambo ha Paseka ho swika a tshi vho zwi ḓivha uri tshifhinga tshawe tsho swika tsha uri a ṱuwe kha ḽino shango a humele ha Khotsi awe, nahone Yesu a ḓi dzula a tshi funa vha re vhawe vha re shangoni, u swika vhufheloni.
2 Musi vha tshi khou ḽa zwiḽiwa zwa nga madekwana, Diabolo o vha o no ṱuṱuwedza Yudasi uri a fheṱe Yesu. Yudasi onoyu ndi murwa wa Simoni Iskariote.
3 Ngauri Yesu o vha a tshi ḓivha uri Khotsi o mu kumedza zwithu zwoṱhe na uri o ḓa a tshi bva ha Mudzimu nahone u khou ya ha Mudzimu,
4 a takuwa musi hu tshi khou ḽiwa tshilalelo a bvula zwiambaro zwawe zwa nga nnḓa. A dzhia thaula a ḓivhofha kha khundu ngayo.
5 Nga murahu ha zwenezwo, a shela maḓi sambeloni, a thoma u ṱanzwa milenzhe ya vhafunziwa vhawe a i phumula nga thaula ye a vha o ḓivhofha khundu ngayo.
6 Simoni Petro a amba na Yesu musi a tshi swika a ri: “Murena, naa u khou ṱanzwa milenzhe yanga?”
7 Yesu a mu fhindula a ri: “Zwine nda khou zwi ita kha iwe u nga si kone u zwi ṱalukanya zwino, fhedzi u ḓo zwi ṱalukanya nga murahu.”
8 Petro a amba nae a ri: “U nga si ḓo vhuya wa nṱanzwa milenzhe.” Yesu a mu fhindula a ri: “Arali nda sa u ṱanzwa a u nga vhi na mukovhe na nṋe.”
9 Simoni Petro a ri: “Murena, u songo nṱanzwa milenzhe fhedzi, fhedzi u nṱanzwe na zwanḓa na ṱhoho.”
10 Yesu a amba nae a ri: “We a ṱanzwiwa a zwi tsha ṱoḓea uri a dovhe a ṱanzwiwe na huṅwe nga nnḓa ha u ṱanzwiwa milenzhe fhedzi, fhedzi o kuna tshoṱhe. Inwi no kuna, fhedzi a no ngo kuna noṱhe.”
11 Ngauri o vha a tshi ḓivha muthu we a vha a tshi ḓo mu fheṱa. Ndi ngazwo o ri: “A no ngo kuna noṱhe.”
12 Musi o no fhedza u vha ṱanzwa milenzhe nahone o no ambara zwiambaro zwawe zwa nga nnḓa, a vhuyelela vhudzuloni hawe, a vha vhudzisa a ri: “Naa ni a pfesesa zwe nda ni ita?
13 Ni tshi mmbidza ‘Mufunzi’ na ‘Murena’ ni vha ni tshi khou amba zwone, ngauri ndi ene.
14 Arali nṋe ane nda vha Murena na Mufunzi ndo ni ṱanzwa milenzhe, na inwi ni fanela u ṱanzwana milenzhe.
15 Ngauralo, ndo ni vhetshela tsumbo, zwe nda ni ita zwone, na inwi ni ite nga u ralo.
16 Ngoho-ngoho ndi a ni vhudza ndi ri: Mulanda ha fhiri muṋe wawe, na o rumiwaho ha fhiri we a mu ruma.
17 Arali ni tshi ḓivha zwenezwi zwithu, ni ḓo takala arali na zwi ita.
18 A thi ambi nga ha inwi noṱhe; ndi a ḓivha vhe nda vha nanga. Fhedzi ndi uri hu ḓadzee Maṅwalo o ambaho uri: ‘We a vha a tshi ḽa na nṋe tshinkwa o ntshandukela.’
19 Ndi khou ni vhudza zwino zwi sa athu itea, uri musi zwi tshi itea ni tende uri ndi nṋe.
20 Ngoho ndi a ni vhudza ndi ri: Ane a ṱanganedza muṅwe na muṅwe ane nda mu ruma u ṱanganedza na nṋe. Nahone ane a nṱanganedza, u ṱanganedza na we a nthuma.”
21 Musi Yesu o no amba zwenezwo, a ṱungufhala, a ṱanziela a ri: “Ngoho ndi a ni vhudza ndi ri, muṅwe waṋu u ḓo mpheṱa.”
22 Vhafunziwa vha thoma u lavhelesana, vha sa ḓivhi uri u khou amba nnyi.
23 Tsini na Yesu ho vha ho dzula muṅwe mufunziwa wawe we a vha a tshi mu funa.
24 Ngauralo, Simoni Petro a mu itela tshiga nga ṱhoho a ri: “Ri vhudze uri u khou amba nnyi.”
25 Onoyo a ḓitika nga khana ya Yesu a amba nae a ri: “Murena, ndi nnyi onoyo?”
26 Yesu a fhindula a ri: “Ndi ane nda ḓo thotha kupiḓa kwa tshinkwa nda mu ṋea.” Nga murahu ha u thothedza tshenetsho tshinkwa, a tshi ṋea Yudasi, murwa wa Simoni Iskariote.
27 Musi Yudasi o no ḽa tshenetsho tshinkwa, a thoma u langwa nga Sathane. Ngauralo, Yesu a amba nae a ri: “Zwine wa khou zwi ita, zwi ite nga u ṱavhanya.”
28 Naho zwo ralo, kha vhoṱhe vhe vha vha vho dzula henefho zwiḽiwani a hu na na muthihi we a ḓivha uri ndi ngani a tshi khou amba nae nga u ralo.
29 Vhaṅwe vho vha vha tshi khou humbula uri samusi Yudasi o vha e ene ane a fara bogisi ḽa tshelede, Yesu o vha a tshi khou mu vhudza uri: “Rengani zwithu zwine ra ḓo zwi ṱoḓa vhuṱamboni,” kana uri u fanela u ṋea vhashai zwiṅwe zwithu.
30 Nga zwenezwo, musi o no ḽa tshinkwa, a bva nga u ṱavhanya. Ho vha hu vhusiku.
31 Musi o no ṱuwa, Yesu a ri: “Zwino Murwa-muthu u ḓo ṋewa vhugala, na Mudzimu u ḓo ṋewa vhugala ngae.
32 Mudzimu u ḓo mu ṋea vhugala, nahone u ḓo mu ṋea vhugala nga u ṱavhanya.
33 Vhana’nga, ndi kha ḓi vha na inwi lwa tshifhinganyana. Ni ḓo nṱoḓa; zwino ndi khou ni vhudza zwe nda vhudza Vhayuda nda ri, ‘Hune nda khou ya hone ni nga si kone u ḓa.’
34 Ndi khou ni ṋea mulayo muswa, wa uri ni funane; samusi na nṋe ndo ni funa.
35 Ndi zwine vhathu vhoṱhe vha ḓo ḓivha ngazwo uri ni vhafunziwa vhanga, arali ni tshi funana.”
36 Simoni Petro a amba nae a ri: “Murena, u khou ya ngafhi?” Yesu a fhindula a ri: “Hune nda khou ya hone u nga si kone u ntevhela zwino, fhedzi u ḓo tevhela nga murahu.”
37 Petro a ri: “Murena, ndi ngani ndi nga si kone u u tevhela zwino? Ndi ḓo kumedza vhutshilo hanga ndi tshi itela iwe.”
38 Yesu a fhindula a ri: “Naa u ḓo kumedza vhutshilo hau u tshi itela nṋe? Ngoho ndi a u vhudza ndi ri, musi mukukulume u sa athu lila u ḓo vha wo no nndandula luraru.”
