Yohane 14:1-31
14 “Ni songo vhilaela. Ivhani na lutendo kha Mudzimu, ni dovhe ni vhe na lutendo kha nṋe.
2 Nḓuni ya Khotsi anga hu na vhudzulo vhunzhi. Arali zwi vhe zwi songo ralo, ndo vha ndi tshi ḓo vha ndo ni vhudza, huno zwino ndi khou ya u ni lugisela vhudzulo.
3 Zwiṅwe hafhu, arali nda ya u ni lugisela vhudzulo, ndi ḓo dovha nda vhuya nda ni dzhia, uri hune nṋe nda vha hone na inwi ni vhe henefho.
4 Nahone ni a ḓivha nḓila ya hune nda khou ya hone.”
5 Thomasi a amba nae a ri: “Murena, a ri ḓivhi uri u khou ya ngafhi. Ri nga ḓivha hani nḓila?”
6 Yesu a amba nae a ri: “Ndi nṋe nḓila na ngoho na vhutshilo. A hu na ane a nga ḓa ha Khotsi a songo fhira kha nṋe.
7 Arali inwi ni vhe no nnḓivha, no vha ni tshi ḓo ḓivha na Khotsi anga; u bva zwino ni a mu ḓivha nahone no mu vhona.”
8 Filipo a amba nae a ri: “Murena, ri sumbedze Khotsi, ndi hone ri si tsha ḓo vhilaela.”
9 Yesu a amba nae a ri: “Filipo, u bva tshee nda vha na iwe tshifhinga tshilapfu nga u ralo, a u athu nnḓivha? A vhonaho nṋe u vhona na Khotsi. Naa u amba hani u tshi ri, ‘Ri sumbedze Khotsi’?
10 Naa a u tendi uri ndi na vhuthihi na Khotsi na uri Khotsi u na vhuthihi na nṋe? Zwine nda ni vhudza a thi ambi zwi bvaho kha nṋe; fhedzi Khotsi ane a vha na vhuthihi na nṋe u khou ita mishumo yawe.
11 Tendani uri ndi na vhuthihi na Khotsi na uri Khotsi u na vhuthihi na nṋe; arali zwi songo ralo, tendani nga nṱhani ha mishumo yone iṋe.
12 Ngoho ndi a ni vhudza ndi ri: Ane a vha na lutendo kha nṋe, na ene u ḓo ita mishumo ine nda i ita; nahone u ḓo ita mishumo i fhiraho yeneyi, ngauri ndi khou ya ha Khotsi.
13 Zwiṅwe hafhu, zwoṱhe zwine na zwi humbela nga dzina ḽanga, ndi ḓo zwi ita, uri Khotsi a ṋewe vhugala nga nṱhani ha Murwa.
14 Tshiṅwe na tshiṅwe tshine na humbela nga dzina ḽanga, ndi ḓo tshi ita.
15 “Arali ni tshi mpfuna, ni ḓo ita zwine nda zwi amba;
16 nahone ndi ḓo humbela Khotsi uri a ni ṋee muṅwe muthusi* uri a vhe na inwi nga hu sa fheli,
17 muya mukhethwa une wa dzumbulula ngoho, une shango ḽa sa ḓo u wana, ngauri a ḽi u vhoni nahone a ḽi u ḓivhi. Inwi ni a u ḓivha, ngauri u dzula u na inwi nahone u kha inwi.
18 A thi nga ḓo ni sia no ṱungufhala.* Ndi ḓo vhuya kha inwi.
19 Hu si kale shango a ḽi tsha ḓo mmbona, fhedzi inwi ni ḓo mmbona, ngauri ndi a tshila na inwi ni a tshila.
20 Nga ḽeneḽo ḓuvha ni ḓo zwi ḓivha uri ndi na vhuthihi na Khotsi anga nahone inwi ni na vhuthihi na nṋe, na nṋe ndi na vhuthihi na inwi.
21 Ane a ḓivha ndaela dzanga nahone a dzi tevhedza ndi ene ane a mpfuna. Ane a mpfuna u ḓo funwa nga Khotsi anga, na nṋe ndi ḓo mu funa nahone ndi ḓo ḓisumbedza zwavhuḓi khae.”
22 Yudasi, ane a si vhe Iskariote, a ri: “Murena, ndi ngani u tshi ṱoḓa u ḓisumbedza zwavhuḓi kha riṋe hu si kha shango?”
23 Yesu a mu fhindula a ri: “Ane a mpfuna, u ḓo ita zwine nda amba, na Khotsi anga u ḓo mu funa, ri ḓo ḓa khae nahone ra vha nae.
24 Ane a si mpfune ha tevhedzi zwine nda zwi amba; nahone zwine na khou zwi pfa a zwi bvi kha nṋe, fhedzi zwi bva kha Khotsi o nthumaho.
25 “Ndo ni vhudza zwenezwi zwithu musi ndi tshi kha ḓi vha na inwi.
26 Fhedzi muthusi ane a vha muya mukhethwa, ane Khotsi a ḓo mu ruma dzinani ḽanga, onoyo u ḓo ni funza zwithu zwoṱhe na u ni humbudza zwithu zwoṱhe zwe nda ni vhudza.
27 Ndi ni siela mulalo, ndi ni ṋea mulalo wanga. Mulalo une nda ni ṋea wone wo fhambana na une shango ḽa ni ṋea wone. Ni songo vhilaela kana u ofha.
28 No zwi pfa ndi tshi ri ndi khou ṱuwa nahone ndi ḓo dovha nda vhuya kha inwi. Arali ni tshi mpfuna, no vha ni tshi ḓo takala musi ndi tshi ri ndi khou ya ha Khotsi, ngauri Khotsi ndi muhulwane kha nṋe.
29 Zwino ndo ni vhudza zwi sa athu itea, u itela uri musi zwi tshi itea, ni tende.
30 A thi tsha ḓo amba zwinzhi na inwi, ngauri muvhusi wa shango u khou ḓa. Hone a hu na tshine a ḓo ita kha nṋe,
31 fhedzi uri shango ḽi zwi ḓivhe uri ndi a funa Khotsi, ndi khou ita zwe Khotsi a nndaedza uri ndi zwi ite. Takuwani ri ṱuwe fhano.
Ṱhaluso dzi re magumoni a siaṱari
^ Hafha muya mukhethwa u fanyiswa na muthu.
^ Kana “ni zwisiwana.”
