Yohane 15:1-27
15 “Ndi nṋe munḓirivhe wa vhukuma, Khotsi anga ndi ene mulimi.
2 Tavhi ḽiṅwe na ḽiṅwe ḽi re kha nṋe ḽi sa aṋwi mitshelo u a ḽi rema, nahone ḽi aṋwaho mitshelo u a ḽi khwathela,* uri ḽi kone u aṋwa mitshelo minzhi.
3 Inwi no no ḓi khwathelwa nga nṱhani ha zwe nda ni vhudza.
4 Dzulani ni na vhuthihi na nṋe, na nṋe ndi ḓo dzula ndi na vhuthihi na inwi. Samusi tavhi ḽi sa koni u aṋwa mitshelo arali ḽo tumulwa kha munḓirivhe, na inwi ni nga si aṋwe mitshelo arali ni si na vhuthihi na nṋe.
5 Ndi nṋe munḓirivhe, inwi ni matavhi. Ane a dzula e na vhuthihi na nṋe, na nṋe ndi na vhuthihi nae, onoyo u ḓo aṋwa mitshelo minzhi; ngauri a hu na na tshithihi tshine na nga tshi ita arali ni si na vhuthihi na nṋe.
6 Muṅwe na muṅwe ane a si vhe na vhuthihi na nṋe, u a laṱwa sa tavhi ḽo omaho; nahone vhathu vha kuvhanganya eneo matavhi vha a posa muliloni a swa.
7 Arali na dzula ni na vhuthihi na nṋe na dzula ni tshi humbula zwe nda ni vhudza, tshiṅwe na tshiṅwe tshine na tshi tama ni ḓo tshi wana.
8 Khotsi anga u a ṋewa vhugala musi ni tshi dzula ni tshi aṋwa mitshelo minzhi na u sumbedza uri ni vhafunziwa vhanga.
9 Samusi Khotsi anga o mpfuna na nṋe ndo ni funa, dzulani ni lufunoni lwanga.
10 Arali ni tshi tevhedza ndaela dzanga, ndi ḓo dzula ndi tshi ni funa, vhunga na nṋe ndo tevhedza ndaela dza Khotsi, nahone a dzula a tshi mpfuna.
11 “Ndo ni vhudza zwenezwi zwithu uri ni takale samusi na nṋe ndo takala.
12 Ndaela yanga ndi ya uri ni funane vhunga na nṋe ndo ni funa.
13 A hu na muthu a re na lufuno lu fhiraho ulu, lune muṅwe muthu a nga kumedza vhutshilo hawe a tshi itela khonani dzawe.
14 Inwi ni khonani dzanga arali ni tshi ita zwine nda ni laya.
15 A thi tsha ni vhidza vhalanda, ngauri mulanda ha ḓivhi zwine muṋe wawe a zwi ita. Fhedzi ndo ni vhidza dzikhonani, ngauri zwithu zwoṱhe zwe nda zwi pfa kha Khotsi anga ndo ni vhudza zwone.
16 Inwi a no ngo nnanga, fhedzi ndo nanga inwi, ndo ni vhea uri ni bvele phanḓa ni tshi aṋwa mitshelo na uri mitshelo yaṋu i sa kuvhe; uri Khotsi a ni ṋee tshiṅwe na tshiṅwe tshine na humbela dzinani ḽanga.
17 “Ndo ni laedza zwenezwi, uri ni funane.
18 Arali shango ḽi tshi ni vhenga, ni ḓivhe uri ḽo thoma u vhenga nṋe ḽi sa athu vhenga inwi.
19 Arali ni vhe ni vha shango, shango ḽo vha ḽi tshi ḓo funa vha re vhaḽo. Zwino ngauri a ni tshipiḓa tsha shango, fhedzi nṋe ndo ni nanga uri ni bve shangoni, nga nṱhani ha zwenezwo shango ḽi a ni vhenga.
20 Dzulani ni tshi humbula zwe nda ni vhudza nda ri, mulanda ha fhiri muṋe wawe. Arali vho ntovhola, na inwi vha ḓo ni tovhola-vho; arali vho tevhedza zwe nda zwi amba, vha ḓo tevhedza na zwine na ḓo zwi amba-vho.
21 Fhedzi vha ḓo ni ita zwenezwi zwithu nga nṱhani ha dzina ḽanga, ngauri a vha ḓivhi we a nthuma.
22 Arali ndi vhe ndi songo ḓa nda amba navho, vho vha vha tshi ḓo vha vhe si na tshivhi; fhedzi zwino vha nga si kone u vhuyafhedza zwivhi zwavho.
23 Ane a mmbenga u vhenga na Khotsi anga.
24 Arali ndi vhe ndi songo ita mishumo i sa athu itwa nga muṅwe muthu, vho vha vha tshi ḓo vha vhe si na tshivhi; fhedzi vho i vhona nahone vha mmbenga khathihi na Khotsi anga.
25 Fhedzi zwenezwi zwo itea uri zwo ṅwalwaho Mulayoni wavho zwi ḓadzee, ‘Vho mmbenga vha si na tshiitisi.’
26 Musi muthusi* ane nda ḓo ni rumela ene a tshi bva ha Khotsi anga a tshi swika, muya mukhethwa une wa dzumbulula ngoho, u bvaho ha Khotsi, onoyo u ḓo nṱanzielela;
27 nahone na inwi ni ḓo nṱanzielela, ngauri no vha na nṋe u bva mathomoni.
Ṱhaluso dzi re magumoni a siaṱari
^ Ṱhalutshedzelo ya ipfi nga ipfi i ri “u kunakisa.”
^ Hafha muya mukhethwa u fanyiswa na muthu.
