Yohane 16:1-33
16 “Ndo ni vhudza haya mafhungo uri ni si khukhuliswe.
2 Vhathu vha ḓo ni pandela sinagogoni. Zwi re zwone ndi uri tshifhinga tshi khou ḓa tshine muthu ane a ni vhulaha a ḓo humbula uri o itela Mudzimu tshumelo khethwa.
3 Fhedzi vha ḓo ita zwenezwi zwithu nga nṱhani ha uri a vha ḓivhi Khotsi kana nṋe.
4 Ndi khou ni vhudza enea mafhungo uri musi tshifhinga tshi tshi swika tsha uri zwi itee, ni humbule zwauri ndo ni vhudza.
“Naho zwo ralo, a tho ngo ni vhudza enea mafhungo mathomoni ngauri ndo vha ndi na inwi.
5 Huno zwino ndi khou ya kha we a nthuma, fhedzi a hu na na muthihi waṋu a mmbudzisaho uri, ‘U khou ya ngafhi?’
6 Fhedzi no ṱungufhala zwihulu ngauri ndo ni vhudza enea mafhungo.
7 Naho zwo ralo, ndi khou ni vhudza ngoho, u ṱuwa hanga zwi ḓo ni vhuyedza. Arali nda sa ṱuwa, muthusi a nga si ḓe na luthihi kha inwi. Fhedzi arali nda ṱuwa, ndi ḓo ni rumela ene.
8 Musi onoyo muthusi a tshi swika u ḓo ṋea shango vhuṱanzi vhu fushaho malugana na tshivhi na u luga na khaṱulo:
9 u ḓo thoma nga u ṋea vhuṱanzi malugana na tshivhi, ngauri a vha ntendi;
10 a ṋea vhuṱanzi nga ha u luga, ngauri ndi khou ya ha Khotsi nahone a ni tsha ḓo dovha na mmbona;
11 a dovha a ṋea vhuṱanzi nga ha khaṱulo, ngauri muvhusi wa ḽino shango o haṱulwa.
12 “Ndi kha ḓi vha na zwithu zwinzhi zwine nda nga ni vhudza zwone, fhedzi ni nga si kone u zwi pfesesa zwino.
13 Naho zwo ralo, musi onoyo a tshi swika, muya une wa dzumbulula ngoho, u ḓo ni livhisa kha ngoho yoṱhe, ha nga ambi zwi bvaho khae, fhedzi u ḓo amba zwithu zwine a ḓo zwi pfa, nahone u ḓo ni ḓivhadza zwithu zwine zwa ḓo ḓa.
14 Onoyo muthusi u ḓo ita uri ndi ṋewe vhugala, ngauri u ḓo ni ḓivhadza zwe a zwi pfa kha nṋe.
15 Zwithu zwoṱhe zwine zwa vha zwa Khotsi ndi zwanga. Ndi ngazwo ndi tshi ri u ḓo ni ḓivhadza zwe a zwi pfa kha nṋe.
16 Hu si kale a ni tsha ḓo mmbona, nahone hu si kale ni ḓo dovha na mmbona.”
17 Nga zwenezwo, vhaṅwe vhafunziwa vhawe vha amba nga tshavho vha ri: “U amba mini musi a tshi ri, ‘Hu si kale a ni tsha ḓo mmbona, nahone hu si kale ni ḓo dovha na mmbona,’ nahone a dovha a ri, ‘ngauri ndi khou ya ha Khotsi’?”
18 Ngauralo, vho vha vha tshi khou ri: “U amba mini musi a tshi ri, ‘hu si kale’? A ri ḓivhi zwine a khou zwi amba.”
19 Yesu o vha a tshi zwi ḓivha uri vha khou ṱoḓa u mu vhudzisa, ngauralo a amba navho a ri: “Naa ni khou vhudzisana zwe nda ri, hu si kale a ni tsha ḓo mmbona, nahone hu si kale ni ḓo dovha na mmbona?
20 Ngoho ndi a ni vhudza ndi ri: Inwi ni ḓo lila na u zhamba, fhedzi shango ḽi ḓo takala; inwi ni ḓo ṱungufhala, fhedzi vhuṱungu haṋu vhu ḓo ita uri ni takale.
21 Musi mufumakadzi a tshi beba u a pfa vhuṱungu ngauri tshifhinga tshawe tshi vha tsho swika; musi o no beba ṅwana ha tsha humbula nga ha vhuṱungu nga nṱhani ha dakalo ḽa uri ṅwana o bebwa fhano shangoni.
22 Na inwi zwino no ṱungufhala; fhedzi ndi ḓo dovha nda ni vhona nahone ni ḓo takala, a hu na muthu ane a ḓo ita uri ni si takale.
23 Nga ḽeneḽo ḓuvha a ni tsha ḓo mmbudzisa tshithu na tshithihi. Ngoho ndi a ni vhudza ndi ri: Arali na humbela Khotsi tshithu naho tshi tshini u ḓo ni ṋea tshone nga dzina ḽanga.
24 U swika zwino a ni athu humbela tshithu na tshithihi nga dzina ḽanga. Humbelani, ni ḓo ṋewa, ndi hone ni tshi ḓo dzula no takala vhukuma.
25 “Ndo ni vhudza enea mafhungo nga zwifanyiso. Tshifhinga tshi ḓo swika tshine nda sa tsha ḓo dovha nda ni vhudza nga zwifanyiso, fhedzi ndi ḓo ni vhudza zwavhuḓi nga ha Khotsi.
26 Nga tshenetsho tshifhinga ni ḓo humbela Khotsi nga dzina ḽanga; ndi tshi amba zwenezwi, a thi khou ri ndi ḓo ni humbelela.
27 Ngauri Khotsi u a ni funa, ngauri no vha ni tshi mpfuna nahone no vha ni tshi tenda uri ndi muimeli wa Khotsi.
28 Ndo ḓa shangoni ndi tshi bva ha Khotsi. Zwino ndi khou ṱuwa shangoni ndi khou vhuyelela ha Khotsi.”
29 Vhafunziwa vhawe vha ri: “Zwino u khou amba nga ho livhaho, nahone a u khou shumisa zwifanyiso.
30 Zwino ri a zwi ṱhogomela uri u ḓivha zwithu zwoṱhe nahone a zwi ṱoḓei uri muthu a u vhudzise. Nga nṱhani ha zwenezwi, ri a tenda zwauri u bva ha Mudzimu.”
31 Yesu a ri: “Naa zwino ni a tenda?
32 Tshifhinga tshi khou ḓa, huno tsho no swika, musi muṅwe na muṅwe a tshi ḓo balanganywa a ya nḓuni yawe na ntsia ndi ndoṱhe; naho zwo ralo, ndi ḓo vha ndi si ndoṱhe, ndi ḓo vha ndi na Khotsi.
33 Ndo ni vhudza haya mafhungo uri ni vhe na mulalo nga u vha na vhuthihi na nṋe. Fhano shangoni ni vhuṱunguni, fhedzi ivhani na tshivhindi! Nṋe ndo kunda shango.”
