Yohane 17:1-26
17 Musi Yesu o no amba enea mafhungo, a lavhelesa ṱaḓulu a ri: “Khotsi, tshifhinga tsho swika; hulisa murwa wau, uri murwa wau a u ṋee vhugala,
2 samusi wo mu ṋea maanḓa kha vhathu vhoṱhe, uri a ṋee vhathu vhoṱhe vhe wa mu ṋea vhone vhutshilo vhu sa fheli.
3 Uri vha wane vhutshilo vhu sa fheli, vha fanela uri vha ḓivhe iwe Mudzimu wa ngoho u woṱhe, vha ḓivhe na Yesu Kristo we wa mu ruma.
4 Ndo u ṋea vhugala fhano shangoni, samusi ndo fhedza mushumo we wa nṋea uri ndi u ite.
5 Khotsi, zwino nṋee vhugala he nda vha ndi naho tsini na iwe musi shango ḽi sa athu vha hone.
6 “Ndo ḓivhadza dzina ḽau kha vhathu vhe wa nṋea vhone vha tshi bva shangoni. Vho vha vhe vhau, zwino wo nṋea vhone, nahone vho tevhedza zwe wa zwi amba.
7 Zwino vha vho ḓivha uri zwithu zwoṱhe zwe wa nṋea zwi bva ha iwe;
8 ngauri ndo vha vhudza zwe wa mmbudza, vho zwi ṱanganedza nahone vha a zwi ḓivha uri ndo ḓa sa muimeli wau, nahone vho tenda uri ndi iwe wo nthumaho.
9 Ndi humbelela vhone; a thi humbeleli shango, fhedzi ndi humbelela vhe wa nṋea vhone; ngauri ndi vhau,
10 nahone zwithu zwanga zwoṱhe ndi zwau, zwau ndi zwanga, nahone ndo ṋewa vhugala vhukati havho.
11 “Zwiṅwe hafhu, nṋe a thi tsha vha fhano shangoni, fhedzi vhone vha shangoni, hone nṋe ndi khou ḓa ha iwe. Khotsi mukhethwa, vha tsireledze nga nṱhani ha dzina ḽau ḽe wa nṋea ḽone, uri vha vhe vhathihi samusi na riṋe ri vhathihi.
12 Musi ndi navho ndo vha ndi tshi vha tsireledza nga nṱhani ha dzina ḽau ḽe wa nṋea ḽone; ndo vha tsireledza, a hu na na muthihi o xelaho nga nnḓa ha murwa we ha pfi u ḓo lozwiwa, u itela uri maṅwalo a ḓadzee.
13 Fhedzi zwino ndi khou ḓa ha iwe, ndi khou amba zwenezwi zwithu fhano shangoni uri vha vhe na dakalo ḽihulu vhunga nṋe.
14 Ndo vha vhudza zwe wa zwi amba, fhedzi shango ḽo vha vhenga, ngauri a vha tshipiḓa tsha shango, vhunga na nṋe ndi si tshipiḓa tsha shango.
15 “A thi humbeli uri u vha bvise fhano shangoni, fhedzi ndi humbela uri u vha tsireledze nga nṱhani ha muvhi.*
16 A vha tshipiḓa tsha shango vhunga na nṋe ndi si tshipiḓa tsha shango.
17 Vha ite vhakhethwa nga ngoho; ipfi ḽau ndi ngoho.
18 Samusi wo nthuma shangoni, na nṋe ndi khou vha ruma shangoni.
19 Ndi dzula ndi mukhethwa ndi tshi itela vhone, uri na vhone vha itwe vhakhethwa nga ngoho.
20 “A thi khou humbelela vhenevha fhedzi, fhedzi na vhane vha tenda nge vha pfa nga vhenevho;
21 uri vha vhe vhathihi, samusi iwe Khotsi u na vhuthihi na nṋe, na nṋe ndi na vhuthihi na iwe, uri vha vhe na vhuthihi na riṋe, uri shango ḽi tende zwauri wo nthuma.
22 Zwiṅwe hafhu, ndo vha ṋea vhugala he wa nṋea hone, uri vha vhe na vhuthihi samusi na riṋe ri na vhuthihi.
23 Nṋe ndi na vhuthihi navho na iwe u na vhuthihi na nṋe, uri vha vhe vhathihi, uri shango ḽi ḓivhe uri wo nthuma na uri u a vha funa samusi wo mpfuna.
24 Khotsi, ndi ṱoḓa uri vhathu vhe wa nṋea vhone na vhone vha vhe na nṋe hune nda vha hone, uri vha vhone vhugala hanga he wa nṋea hone, ngauri wo mpfuna shango ḽi sa athu vha hone.
25 Khotsi o lugaho, shango a ḽi u ḓivhi; fhedzi nṋe ndi a u ḓivha, na vhenevha vha a zwi ḓivha uri ndo rumiwa nga iwe.
26 Ndo vha ḓivhadza dzina ḽau nahone ndi ḓo ḓi ḽi ḓivhadza, uri vha vhe na lufuno lwe wa mpfuna ngalwo nahone ndi vhe na vhuthihi navho.”
Ṱhaluso dzi re magumoni a siaṱari
^ Ane a vha Sathane.
