Yohane 18:1-40
18 Musi o no amba zwenezwo, Yesu na vhafunziwa vhawe vha ya tsimuni, ye ya vha i seli ha Muedzi wa Kidironi.
2 Yudasi we a mu fheṱa o vha a tshi ḓivha henefho fhethu, ngauri Yesu o vha a tshi anzela u ṱangana na vhafunziwa vhawe henefho.
3 Nga zwenezwo, Yudasi na tshigwada tsha maswole na vhaḓinḓa vha vhotshifhe vhahulu na Vhafarisei vha ḓa henefho tsimuni vho fara maḓenzhe na dzimbone na zwihali.
4 Nge Yesu a vha a tshi ḓivha zwoṱhe zwe zwa vha zwi tshi ḓo bvelela khae, a sendela tsini navho a ri: “Ni khou ṱoḓa nnyi?”
5 Vha mu fhindula vha ri: “Yesu wa Nazareta.” Ene a amba navho a ri: “Ndi nṋe.” Na Yudasi o mu fheṱaho o vha o ima henefho navho.
6 Naho zwo ralo, musi a tshi vha vhudza uri: “Ndi nṋe,” vha huma nga tsha murahu vha wela fhasi.
7 A dovha a vha vhudzisa a ri: “Ni khou ṱoḓa nnyi?” Vha ri: “Yesu wa Nazareta.”
8 Yesu a vha fhindula a ri: “Ndo ni vhudza uri ndi nṋe. Arali ni tshi khou ṱoḓa nṋe, litshani avha vha ṱuwe”;
9 zwenezwo ho vha hu u ḓadzisa zwe a amba a tshi ri: “Kha vhe wa nṋea vhone a hu na na muthihi we nda mu xedza.”
10 Nga zwenezwo, Simoni Petro we a vha e na banga, a ḽi ṱomola a tumula nḓevhe ya tsha u ḽa ya mulanda wa tshifhe muhulu. Onoyo mulanda o vha a tshi pfi Malixo.
11 Nga zwenezwo, Yesu a amba na Petro a ri: “Vhuyedzedza banga ḽau vhudzuloni haḽo. Naa a tho ngo fanela u nwa tshinwelo tshe Khotsi a nṋea tshone?”
12 Ndi hone maswole na mulangammbi na vhaḓinḓa vha Vhayuda vha tshi fara Yesu vha mu vhofha.
13 Vha thoma nga u mu isa ha Anasi; ngauri o vha e khotsi a mufumakadzi wa Kayafa we a vha e tshifhe muhulu nga wonoyo ṅwaha.
14 Zwi re zwone ndi uri Kayafa ndi ene we a eletshedza Vhayuda uri zwi ḓo vha vhuyedza arali ha fa muthu muthihi a tshi fela vhathu vhoṱhe.
15 Simoni Petro na muṅwe mufunziwa vho vha vha tshi khou tevhela Yesu. Onoyo mufunziwa o vha a tshi ḓivhiwa nga tshifhe muhulu, nahone a dzhena muṱani wa tshifhe muhulu khathihi na Yesu,
16 fhedzi Petro o vha o sala o ima khoroni. Nga zwenezwo, uḽa muṅwe mufunziwa, we a vha a tshi ḓivhiwa nga tshifhe muhulu, a bvela nnḓa uri a ambe na mulinda-muṋango nahone a dzhenisa Petro nga ngomu.
17 Musidzana wa mulanda we a vha e mulinda-muṋango a amba na Petro a ri: “Naa a u muṅwe wa vhafunziwa vha uyu munna?” Petro a fhindula a ri: “Hai.”
18 Vhalanda na vhaḓinḓa vho vha vho ima henefho. Vho vha vho vhasa mulilo, ngauri ho vha hu tshi khou rothola, vha tshi khou ora. Petro o vha o ima henefho navho a tshi khou ora mulilo.
19 Nga tshenetsho tshifhinga, tshifhe muhulu o vha a tshi khou vhudzisa Yesu nga ha vhafunziwa vhawe na nga pfunzo yawe.
20 Yesu a mu fhindula a ri: “Ndo amba na vhathu vhoṱhe khagala. Tshifhinga tshoṱhe ndo vha ndi tshi funza sinagogoni na thembeleni, hune Vhayuda vhoṱhe vha kuvhangana hone; a hu na zwe nda zwi amba tshiphirini.
21 Ndi ngani u tshi mmbudzisa? Vhudzisa vhe vha pfa zwe nda vha vhudza zwone. Vhenevho vha a ḓivha zwe nda zwi amba.”
22 Musi o no amba zwenezwo, muṅwe wa vhaḓinḓa we a vha o ima henefho tsini, a vhanda Yesu khofheni a ri: “Naa yeneyi ndi nḓila ine wa fhindula ngayo tshifhe muhulu?”
23 Yesu a mu fhindula a ri: “Arali ndo amba zwithu zwo khakheaho, amba uri ndi zwifhio; fhedzi arali ndo amba zwone, ndi ngani u tshi nthwa?”
24 Ndi hone Anasi a tshi mu vhofha a mu isa ha tshifhe muhulu Kayafa.
25 Simoni Petro o vha o ima henefho a tshi khou ora mulilo. Vha amba nae vha ri: “Naa a u muṅwe wa vhafunziwa vhawe?” Petro a landula a ri: “Hai.”
26 Muṅwe wa vhalanda vha tshifhe muhulu, we a vha e shaka ḽa muthu we Petro a mu tumula nḓevhe, a amba nae a ri: “Naa a tho ngo u vhona u nae ngei tsimuni?”
27 Petro a dovha a hanedza; mukukulume wa mbo ḓi lila.
28 Nga matsheloni, vha bva na Yesu ha Kayafa vha mu isa nḓuni ya muvhusi. Fhedzi vhone vha si dzhene nḓuni ya muvhusi, uri vha si ḓishate dzitshika uri vha kone u ḽa paseka.
29 Pilato a bvela nnḓa a amba navho a ri: “Uyu muthu ni khou mu pomoka mini?”
30 Vha mu fhindula vha ri: “Arali uyu muthu o vha e si muitazwivhi, ro vha ri sa ḓo mu ḓisa kha iwe.”
31 Ngauralo, Pilato a amba navho a ri: “Mu dzhieni inwi vhaṋe ni mu haṱule u ya nga mulayo waṋu.” Vhayuda vha mu fhindula vha ri: “Mulayo a u ri tendeli uri ri vhulahe muthu.”
32 Zwenezwi zwo vha zwi tshi khou ḓadzisa zwe Yesu a zwi amba u itela u sumbedza nḓila ine a ḓo fa ngayo.
33 Pilato a dovha a dzhena nḓuni ya muvhusi a vhidza Yesu a amba nae a ri: “Naa u khosi ya Vhayuda?”
34 Yesu a fhindula a ri: “Naa zwine wa khou zwi amba zwi bva kha iwe, kana wo tou vhudzwa nga ha nṋe?”
35 Pilato a fhindula a ri: “Naa nṋe ndi Muyuda? Vhathu vha lushaka lwa hau na vhotshifhe vhahulu vho u ḓisa kha nṋe. Wo ita mini?”
36 Yesu a fhindula a ri: “Muvhuso wanga a si tshipiḓa tsha ḽino shango. Arali muvhuso wanga wo vha u tshipiḓa tsha ḽino shango, vhatevheli vhanga vho vha vha tshi ḓo vha vho ḓa vha nndwela uri ndi si kumedzwe kha Vhayuda. Fhedzi zwi re zwone ndi uri muvhuso wanga a si wa ḽino shango.”
37 Nga zwenezwo, Pilato a amba nae a ri: “Naa u khosi?” Yesu a fhindula a ri: “Ndi iwe ane wa khou amba uri ndi khosi. Ndo bebelwa zwone, ndo ḓela zwenezwi shangoni, uri ndi ṱanziele nga ha ngoho. Muṅwe na muṅwe ane a funa ngoho u thetshelesa ipfi ḽanga.”
38 Pilato a mu vhudzisa a ri: “Ngoho ndi mini?”
Musi o no amba zwenezwo, a dovha a bvela nnḓa kha Vhayuda a amba navho a ri: “A thi mu vhoni mulandu.
39 Hu na mukhuvha we na u vhea wa uri ndi ni vhofhololele muthu muthihi nga paseka. Naa ni ṱoḓa ndi tshi vhofholola khosi ya Vhayuda?”
40 Vha zhamba vha ri: “U songo ri vhofhololela uyo muthu, fhedzi vhofholola Baraba!” Onoyo Baraba o vha e ḽivemu.
