Yohane 19:1-42
19 Nga tshenetsho tshifhinga, Pilato a laedza uri Yesu a dzhiiwe nahone a rwiwe.
2 Maswole a luka khare ya mipfa a i vhea kha ṱhoho yawe a mu ambadza tshiambaro tsha nga nnḓa tsha muvhala wa phephulu;
3 a ḓa khae a ri: “Ri a vusa, iwe Khosi ya Vhayuda!” A mu vhanda tshifhaṱuwo.
4 Pilato a dovha a bvela nnḓa a amba navho a ri: “Ndi khou mu bvisela nnḓa kha inwi uri ni vhone uri nṋe a thi mu vhoni mulandu.”
5 Nga zwenezwo, Yesu a bvela nnḓa o ambara khare ya mipfa na tshiambaro tsha nga nnḓa tsha muvhala wa phephulu. Huno Pilato a amba na vhathu a ri: “Vhonani uyu muthu.”
6 Musi vhotshifhe vhahulu na vhaḓinḓa vha tshi mu vhona, vha zhamba vha ri: “Kha ombelwe kha danda! Kha ombelwe kha danda!” Pilato a amba navho a ri: “Inwi mu dzhieni ni mu ombele kha danda, ngauri nṋe a thi mu vhoni mulandu.”
7 Vhayuda vha mu fhindula vha ri: “Ri na mulayo, nahone u ya nga wonoyo mulayo u fanela u fa, ngauri u ḓiita murwa wa Mudzimu.”
8 Musi Pilato a tshi pfa zwe vha vha vha tshi khou zwi amba, a ofha zwihulu;
9 a mbo ḓi dovha a dzhena nḓuni ya muvhusi a amba na Yesu a ri: “U bva ngafhi?” Fhedzi Yesu a si mu fhindule.
10 Pilato a ri: “Naa a u mphinduli? Naa a u zwi ḓivhi uri ndi na maanḓa a u u vhofholola na maanḓa a u u ombela kha danda?”
11 Yesu a mu fhindula a ri: “Wo vha u tshi ḓo vha u si na maanḓa na luthihi kha nṋe arali u vhe u songo tou a ṋewa a tshi bva ṱaḓulu. Ndi ngazwo na muthu o nkumedzaho kha iwe e na tshivhi tshihulwane.”
12 Pilato a tshi pfa zwenezwo a ṱoḓa nḓila dza u mu vhofholola. Fhedzi Vhayuda vha zhamba vha ri: “Arali wa vhofholola uyu muthu, zwi amba uri a u khonani ya Kesare.* Muṅwe na muṅwe ane a ḓiita khosi u lwisana na Kesare.”
13 Musi Pilato o no pfa zwine vha khou zwi amba, a bvisela Yesu nnḓa, a dzula tshiduloni tsha khaṱulo muṱani wo itwaho nga matombo, hune nga Tshiheberu ha pfi Gabatha.
14 Ho vha hu tshi khou lugiselelwa paseka; hu nga tshifhinga tsha vhurathi.* A amba na Vhayuda a ri: “Vhonani khosi yaṋu!”
15 Naho zwo ralo, vha zhamba vha ri: “Kha vhulahwe! Kha vhulahwe! Mu ombele kha danda!” Pilato a amba navho a ri: “Naa ndi ombele khosi yaṋu?” Vhotshifhe vhahulu vha fhindula vha ri: “Riṋe a ri na iṅwe khosi nga nnḓa ha Kesare.”
16 Nga tshenetsho tshifhinga, a vha kumedza Yesu uri vha mu ombele kha danda.
Vha mu dzhia vha ṱuwa nae.
17 A ḓihwalela danda ḽawe ḽa tshengedzo, vha ya hune ha pfi Fhethu ha Madethele, hune nga Tshiheberu ha pfi Golgotha;
18 vha ombela Yesu kha danda vhukati ha vhaṅwe vhanna vhavhili.
19 Pilato a dovha a ṅwala nḓivhadzo a i vhea kha danda ḽa tshengedzo. Yo vha i tshi ri: “Yesu wa Nazareta Khosi ya Vhayuda.”
20 Ngauralo, Vhayuda vhanzhi vho vhala yeneyo nḓivhadzo, ngauri he Yesu a vha o ombelwa hone ho vha hu tsini na muḓi; nahone yeneyo nḓivhadzo yo vha yo ṅwalwa nga Luheberu, Lulathini na Lugerika.
21 Naho zwo ralo, vhotshifhe vhahulu vha Vhayuda vha amba na Pilato vha ri: “U songo ṅwala uri ‘Khosi ya Vhayuda,’ fhedzi ṅwala uri o amba a ri, ‘Ndi Khosi ya Vhayuda.’”
22 Pilato a vha fhindula a ri: “Zwe nda ṅwala ndo ṅwala.”
23 Musi maswole o no ombela Yesu kha danda, a dzhia zwiambaro zwawe zwa nga nnḓa a ita mikovhe miṋa, swole ḽiṅwe na ḽiṅwe ḽa dzhia mukovhe waḽo. Fhedzi tshiambaro tshawe tsha nga ngomu tsho vha tshi si na he tsha ṱumiwa, tsho vha tsho tou lukwa tshoṱhe.
24 Ngauralo, maswole a amba nga tshao a ri: “Ri songo tshi kherula, fhedzi kha ri ite mamvaṱe u itela u vhona uri tshi ḓo vha tsha nnyi.” Zwenezwo zwo vha zwi tshi khou itelwa uri hu ḓadzee luṅwalo lune lwa ri: “Vha kovhekana zwiambaro zwanga zwa nga nnḓa nahone tshiambaro tshanga tsha nga ngomu vha tshi itela mamvaṱe.” Ndi zwone zwe maswole a zwi ita.
25 Tsini na danda ḽa tshengedzo ḽa Yesu ho vha ho ima mme awe, murathu wa mme awe, Maria mufumakadzi wa Klopa, na Maria Magdalena.
26 Nga zwenezwo, musi Yesu a tshi vhona mme awe na mufunziwa we a vha a tshi mu funa vho ima nga henefho tsini, a amba na mme awe a ri: “Vhona murwa wau!”
27 Nga murahu a amba na onoyo mufunziwa a ri: “Vhona mme au!” Nahone u bva nga tshenetsho tshifhinga onoyo mufunziwa a ṱuwa na mme a Yesu hayani hawe.
28 Nga murahu ha zwenezwo, musi Yesu a tshi vho vhona uri zwithu zwoṱhe zwo khunyelela, u itela u ḓadzisa luṅwalo a ri: “Ndi na ḓora.”
29 Nga henefho ho vha hu na mvuvhelo ye ya vha i na waini i dungaho. Ngauralo, vha dzhia tshipontshi tsho mbwandamedzwaho kha waini i dungaho vha tshi ṱoma kha luṱanga lwa esopo vha tshi vhea mulomoni wawe.
30 Musi o no swiswina waini i dungaho, Yesu a ri: “Zwo ḓadzea!” a kotamisa ṱhoho nahone a fa.*
31 Samusi ḽo vha ḽi ḓuvha ḽa u Lugiselela ḽa nga phanḓa ha Sabatha, zwitumbu zwo vha zwi songo fanela u sala kha madanda a tshengedzo, (ngauri ḓuvha ḽa yeneyo Sabatha ḽo vha ḽi ḽihulwane,) ndi ngazwo Vhayuda vho humbela uri Pilato a vunḓe zwenezwo zwitumbu milenzhe, nahone vha zwi fhahulule.
32 Ngauralo, maswole a ḓa a vunḓa milenzhe ya vhanna vhavhili vhe vha vha vho ombelwa tsini na Yesu.
33 Musi maswole a tshi swika kha Yesu a wana o no fa, a si vunḓe milenzhe yawe.
34 Ngauralo, ḽiṅwe swole ḽa mu ṱhavha kha lurumbu nga pfumo, ha mbo ḓi bva malofha na maḓi.
35 We a zwi vhona u na vhuṱanzi nazwo, vhuṱanzi hawe ndi ha ngoho, onoyo muthu u a ḓivha uri zwithu zwe a zwi amba ndi ngoho, uri na inwi ni zwi tende.
36 Zwi re zwone ndi uri zwenezwo zwithu zwo itea uri hu ḓadzee luṅwalo lune lwa ri: “Ha nga vunḓiwi na shambo na ḽithihi.”
37 Nahone luṅwe luṅwalo lu ri: “Vha ḓo vhona we vha mu ṱhavha.”
38 Nga murahu ha zwenezwi zwithu, Yosefa a bvaho Arimathia, we a vha e mufunziwa wa Yesu, fhedzi wa tshiphirini nga nṱhani ha uri o vha a tshi ofha Vhayuda, a humbela Pilato arali a tshi nga dzhia tshitumbu tsha Yesu; nahone Pilato a mu tendela. A ya a tshi dzhia.
39 Nikodemo, munna we a ḓa ha Yesu vhusiku lwa u tou thoma, na ene o ḓa o fara zwiputo zwa mishonga i nukhelelaho na ṋonzhe na zwikhopha, zwi ṱoḓaho u vha khilogireme dza furaru (30).
40 Ngauralo, vha dzhia tshitumbu tsha Yesu vha tshi pomba nga malabi a re na yeneyo mishonga, vha tshi tevhedza nḓila ine Vhayuda vha lugiselela ngayo mbulungo.
41 Fhethu he a ombelwa hone ho vha hu na tsimu, henefho tsimuni ho vha hu na vhiḓa ḽiswa, ḽe ha vha hu sa athu vhulungwa muthu khaḽo.
42 Ngauri ḽo vha ḽi ḓuvha ḽa u Lugiselela ḽa Vhayuda nahone vhiḓa ḽo vha ḽi nga henefho tsini, vha mbo ḓi vhulunga Yesu henefho.
Ṱhaluso dzi re magumoni a siaṱari
^ Khosi.
^ Hu ṱoḓaho u vha nga awara ya vhufumi-mbili (12) nga masiari.
^ Ṱhalutshedzelo ya ipfi nga ipfi i ri “a welela.”
