Yohane 20:1-31
20 Nga ḓuvha ḽa u thoma ḽa vhege, Maria Magdalena a ya vhiḓani nga matsheloni, hu tshi kha ḓi vha na swiswi, a vhona uri tombo ḽo no ḓi piguluselwa thungo ha vhiḓa.
2 Nga zwenezwo, a mbo ḓi gidimela kha Simoni Petro na muṅwe mufunziwa we Yesu a vha a tshi mu funa, a amba navho a ri: “Vho bvisa Murena vhiḓani, a ri ḓivhi he vha mu vhea hone.”
3 Nga zwenezwo, Petro na muṅwe mufunziwa vha ya vhiḓani.
4 Vhuvhili havho vha thoma u gidima, fhedzi muṅwe mufunziwa a gidima a fhirela Petro a swika vhiḓani u thoma.
5 A kotama a ṱolela, a wana ho sala malabi fhedzi, hone a si dzhene nga ngomu.
6 Na Simoni Petro a mu tevhela, a dzhena vhiḓani. A vhona malabi henefho fhasi.
7 Labi ḽe ḽa vha ḽo pomba ṱhoho ya Yesu ḽo vha ḽi si fhethu huthihi na maṅwe malabi, fhedzi ḽo vha ḽo petiwa ḽo vhetshelwa thungo.
8 Nga murahu ha dzhena na uḽa mufunziwa we a swika vhiḓani u thoma, a ri a tshi zwi vhona a tenda.
9 Vho vha vha sa athu ṱalukanya luṅwalo lune lwa amba uri u ḓo vuswa vhafuni.
10 Nga zwenezwo, vhafunziwa vha humela mahayani avho.
11 Maria ene a sala o ima henefho tsini na vhiḓa, a tshi khou lila. Nga zwenezwo, musi a tshi khou lila, a kotama a sedza nga ngomu vhiḓani
12 a vhona vharuṅwa vhavhili vho ambara zwiambaro zwitshena vho dzula he ha vha hu na tshitumbu tsha Yesu nahone muṅwe o dzula he ha vha hu na ṱhoho ya Yesu muṅwe o dzula he ha vha hu na milenzhe.
13 Huno vha amba nae vha ri: “Ndi ngani u tshi khou lila?” A vha fhindula a ri: “Vho bvisa Murena wanga vhiḓani, nahone a thi ḓivhi he vha mu vhea hone.”
14 Musi o no amba zwenezwo, a rembuluwa a vhona Yesu o ima, fhedzi ho ngo zwi ṱalukanya uri o vha e Yesu.
15 Yesu a amba nae a ri: “U khou lilela’ni? U khou ṱoḓa nnyi?” Ene a humbula u nga u khou amba na mulindi wa tsimu, a amba nae a ri: “Muṋe wanga, arali wo mu dzhia, mmbudze he wa mu vhea hone, uri ndi ye u mu dzhia.”
16 Yesu a amba nae a ri: “Maria!” Musi Maria a tshi rembuluwa, a amba nae nga Luheberu a ri: “Raboni!” (zwine zwa amba uri “Mufunzi!”)
17 Yesu a amba nae a ri: “Litsha u nkwambatela. Ngauri a thi athu gonya ha Khotsi. Fhedzi iya ha vharathu vhanga u vha vhudze uri, ‘Ndi khou gonya ha Khotsi anga ane a vha Khotsi aṋu na ha Mudzimu wanga ane a vha Mudzimu waṋu.’”
18 Maria Magdalena a ya a vhudza vhafunziwa a ri: “Ndo vhona Murena!” A vha vhudza zwe Yesu a mu vhudza zwone.
19 Musi ḓuvha ḽo no kovhela, nga ḽeneḽo ḓuvha ḽa u thoma ḽa vhege, vhafunziwa vho vha vho ḓihoṋela ngauri vho vha vha tshi khou ofha Vhayuda, Yesu a dzhena a ima vhukati havho a amba navho a ri: “Mulalo nga u vhe na inwi.”
20 Musi o no amba zwenezwi, a vha sumbedza zwanḓa zwawe na lurumbu lwawe. Ngauralo, vhafunziwa vha takala nge vha vhona Murena.
21 Yesu a dovha a amba navho a ri: “Mulalo nga u vhe na inwi. Samusi Khotsi o nthuma, na nṋe ndi khou ni ruma.”
22 Musi o no amba zwenezwo a vha vhudzulela muya nahone a amba navho a ri: “Ṱanganedzani muya mukhethwa.
23 Arali ni tshi hangwela vhathu zwivhi, vha ḓo vha vho hangwelwa; vhane na sa vha hangwele; a vha nga ḓo hangwelwa.”
24 Fhedzi Thomasi, muṅwe wa vha fumi-mbili (12), we a vha a tshi vhidzwa Ḽifhaṱa, o vha e si navho musi Yesu a tshi bvelela vhukati havho.
25 Vhaṅwe vhafunziwa vha mu vhudza u ri: “Ro vhona Murena!” Fhedzi ene a ri: “Arali nda sa vhona mbonzhe dza zwibigiri zwanḓani zwawe nahone nda longa munwe wanga khadzo na u longa tshanḓa tshanga kha lurumbu lwawe, a thi nga ḓo vhuya nda tenda.”
26 Ho no fhela maḓuvha a malo vhafunziwa vha Yesu vha dovha vha ḓihoṋela nḓuni, nahone vho vha vhe na Thomasi. Naho miṋango yo vha yo hoṋiwa, Yesu a ḓa a ima vhukati havho a ri: “Mulalo nga u vhe na inwi.”
27 Nga murahu ha zwenezwo a amba na Thomasi a ri: “Longa munwe wau hafha, hone vhona zwanḓa zwanga. U longe tshanḓa tshau kha lurumbu lwanga, litsha u timatima fhedzi u tende.”
28 Thomasi a mu fhindula a ri: “Murena wanga na Mudzimu wanga!”
29 Yesu a amba nae a ri: “Naa u khou tenda ngauri wo mmbona? Hu takala vhane naho vha songo vhona vha tenda.”
30 Ngoho ndi ya uri Yesu o dovha a ita zwiṅwe zwiga zwinzhi vhafunziwa vha tshi khou zwi vhona, zwi songo ṅwalwaho kha uyu mupombo.
31 Fhedzi zwenezwi zwithu zwo ṅwalwa uri ni tende uri Yesu ndi ene Kristo Murwa wa Mudzimu, uri nga u tenda honoho ni kone u wana vhutshilo dzinani ḽawe.
