Yohane 21:1-25
21 Nga murahu ha zwenezwo zwithu, Yesu a dovha a ḓisumbedza kha vhafunziwa ngei lwanzheni lwa Tiberia. O ḓisumbedza nga heyi nḓila:
2 Simoni Petro, Thomasi, we a vha a tshi vhidzwa Didimo,* Nathanaele a bvaho Kana ngei Galilea, vharwa vha Sebedeo, na vhaṅwe vhafunziwa vhawe vhavhili vho vha vho kuvhangana fhethu huthihi.
3 Simoni Petro a amba navho a ri: “Ndi kha ḓi ya u rea khovhe.” Vha amba nae vha ri: “Na riṋe ri khou ṱuwa na iwe.” Vha ṋamela tshikepe, fhedzi vha si fashe tshithu vhusiku hoṱhe.
4 Nga maḓautsha, Yesu a ima khunzi-khunzini, fhedzi vha si zwi ṱalukanye uri o vha e Yesu.
5 Nga zwenezwo, Yesu a amba navho a ri: “Vhana’nga, naa ni na zwiḽiwa?” Vha fhindula vha ri “Hai!”
6 A amba navho a ri: “Arali na posela mambule kha tshanḓa tsha u ḽa tsha tshikepe ni ḓo fasha.” Vha ita nga u ralo, fhedzi vha si tsha kona u kokodza mambule ngauri vho vha vho fasha khovhe nnzhi.
7 Ngauralo, mufunziwa we Yesu a vha a tshi mu funa a amba na Petro a ri: “Ndi Murena!” Musi Simoni Petro a tshi pfa uri ndi Murena a ambara tshiambaro tshawe tsha nga nṱha, ngauri o vha a songo ambara tshithu nga nṱha, nahone a fhufhela lwanzheni.
8 Fhedzi vhaṅwe vhafunziwa vha tevhela vhe kha tshikepe tshiṱuku vha tshi khou kokodza mambule e a vha o ḓala nga khovhe, ngauri vho vha vhe tsini na khunzi-khunzi, vha tshi tou vha mithara dzi ṱoḓaho u vha ḓana u bva henefho.
9 Musi vha tshi tou tsa tshikepeni, vha vhona ho vhewa khovhe kha mahale na tshinkwa.
10 Yesu a amba navho a ri: “Ḓisani dziṅwe khovhe kha dze na dzi fasha zwino.”
11 Ngauralo, Simoni Petro a humela tshikepeni a kokodzela mambule khunzi-khunzini e a vha e na khovhe khulwane dza ḓana na mahumi maṱanu na ntharu (153). Naho dzo vha dzi nnzhi nga u ralo mambule ho ngo kheruwa.
12 Yesu a amba navho a ri: “Iḓani ni ḽe.” A ho ngo vha na muthihi wa vhafunziwa we a vha na tshivhindi tsha u mu vhudzisa uri: “Ndi iwe nnyi?” ngauri vho vha vha tshi zwi ḓivha uri ndi Murena.
13 Yesu a sendela a dzhia tshinkwa a vha ṋea, a dovha a vha ṋea na khovhe.
14 Lwo vha lu lwa vhuraru Yesu a tshi ḓisumbedza kha vhafunziwa vhawe musi o no vuswa vhafuni.
15 Musi vho no fhedza u ḽa, Yesu a amba na Simoni Petro a ri: “Simoni murwa wa Yohane, naa u a mpfuna u fhira izwi?” Simoni a fhindula a ri: “Ee, Murena, u a zwi ḓivha uri ndi a u funa.” Yesu a amba nae a ri: “Kanzwa ngwana dzanga.”
16 A dovha a amba nae lwa vhuvhili a ri: “Simoni murwa wa Yohane, naa u a mpfuna?” Simoni a fhindula a ri: “Ee, Murena, u a zwi ḓivha uri ndi a u funa.” Yesu a amba nae a ri: “Lisa ngwana dzanga.”
17 A amba nae lwa vhuraru a ri: “Simoni murwa wa Yohane, naa u a mpfuna?” Petro a ṱungufhala ngauri o vha o mu vhudzisa lwa vhuraru a ri: “Naa u a mpfuna?” Nga zwenezwo, a fhindula a ri: “Murena, u a ḓivha zwithu zwoṱhe; u a zwi ḓivha uri ndi a u funa.” Yesu a amba nae a ri: “Kanzwa ngwana dzanga.
18 Ngoho ndi a u vhudza ndi ri, musi u tshee muṱuku, wo vha u tshi ḓiambadza wa ya hune wa funa hone. Fhedzi musi u tshi kalaha u ḓo isa zwanḓa muṅwe muthu a u ambadza nahone a u isa hune wa si fune hone.”
19 O vha a tshi khou zwi ambela uri a sumbedze nḓila ye lufu lwa Petro lwa vha lu tshi ḓo rendisa ngayo Mudzimu. Musi o no amba zwenezwo, a amba na Petro a ri: “Bvela phanḓa u tshi ntevhela.”
20 Petro a rembuluwa a lavhelesa a vhona mufunziwa we Yesu a vha a tshi mu funa a tshi khou tevhela, ndi uḽa we musi vha tshi khou ḽa tshilalelo a vha o ḓitika nga khana ya Yesu a ri: “Murena, ndi nnyi ane a khou u fheṱa?”
21 Musi Petro a tshi mu vhona, a amba na Yesu a ri: “Murena, hu ḓo itea mini nga uyu munna?”
22 Yesu a mu fhindula a ri: “Arali hu lutamo lwanga uri uyu a dzule e hone u swika ndi tshi vhuya, a si mafhungo au. Iwe bvela phanḓa u tshi ntevhela.”
23 Nga nṱhani ha zwenezwo, mafhungo a uri onoyo mufunziwa a nga si fe, a phaḓalala kha vhafunziwa. Naho zwo ralo, Yesu o vha a sa khou amba uri onoyo mufunziwa a nga si fe, fhedzi o vha a tshi khou ri: “Arali hu lutamo lwanga uri uyu a dzule e hone u swika ndi tshi vhuya, zwenezwo zwi ni kwama ngani?”
24 Onoyu ndi ene mufunziwa ane a ṱanziela nga ha zwenezwi zwithu na we a zwi ṅwala, nahone ri a ḓivha uri vhuṱanzi he a vhu ṋea ndi ha ngoho.
25 Hu na zwiṅwe zwithu zwinzhi zwe Yesu a zwi ita, zwine arali zwi vhe zwo ṅwalwa nga vhuḓalo, ndi vhona u nga mipombo yazwo yo vha i tshi ḓo ḓadza shango ya ḓi sala.
Ṱhaluso dzi re magumoni a siaṱari
^ Kana “ḽifhaṱa.”
